Langutelo Ra Bibele

Xana Xikwembu Xa Va Rivalela Vanhu Lava Endleke Swidyoho Leswikulu?

TINTSWALO i yin’wana ya timfanelo letikulu ta Xikwembu. (Pisalema 86:15) Xana tintswalo ta xona i tikulu ku fika kwihi? Mupisalema u tsarile: “Loko a wu languta swihoxo, Wena Yah, Oho Yehovha, i mani loyi a a ta yima? Hikuva u ni ndzivalelo wa ntiyiso, leswaku u ta chaviwa.” (Pisalema 130:3, 4) Tindzimana tin’wana ti hlayeka hi ndlela leyi: “Kukota leswi vuhuma-dyambu byi nga ekule ni vupela-dyambu, hi ndlela leyi fanaka, ku tlula ka hina milawu u ku veke ekule na hina. Kukota loko tatana a kombisa tintswalo eka vana vakwe, Yehovha u kombise tintswalo eka lava va n’wi chavaka. Hikuva yena u ku tiva kahle ku vumbeka ka hina, wa tsundzuka leswaku hi ntshuri.”—Pisalema 103:12-14.

Swi le rivaleni leswaku Yehovha u rivalela hi ku hetiseka, naswona loko a hi kombisa tintswalo a nga ku rivali ku tsana ka hina ni ku nga hetiseki ka hina ni leswaku hi “ntshuri.” Xiya swikombiso swin’wana swa le Bibeleni leswi kombisaka ndlela leyi Xikwembu xi kombisaka tintswalo ha yona.

Muapostola Petro u landzule Kreste kanharhu. (Marka 14:66-72) Loko a nga si va Mukreste, muapostola Pawulo u xanise valandzeri va Kreste. Loko valandzeri van’wana va Kreste va fanele va dlayiwa, Pawulo u pfumelelane na swona. U kale a seketela ni ku dlayiwa ka un’wana wa vona. (Mintirho 8:1, 3; 9:1, 2, 11; 26:10, 11; Vagalatiya 1:13) Swirho swin’wana swa le vandlheni ra le Korinto, loko swi nga si va Vakreste a swi ri swidakwa, vadyeleri ni makhamba. (1 Vakorinto 6:9-11) Kambe, vanhu lava hinkwavo va hetelele va tsakeriwe hi Xikwembu. Ha yini Xikwembu xi va rivalerile?

Magoza Manharhu Lama Nga Endlaka U Kuma Tintswalo Ta Xikwembu

Pawulo u tsarile: “Ndzi kombisiwe tintswalo, hikuva a ndzi pfumala vutivi naswona a ndzi endla hi ku pfumala ripfumelo.” (1 Timotiya 1:13) Marito ya yena lama kongomeke ma hi yisa eka goza ro sungula leri endlaka munhu a rivaleriwa hi Xikwembu—ku kuma vutivi lebyi kongomeke bya Yehovha ni milawu ya yena leyi hlamuseriweke eBibeleni. (2 Timotiya 3:16, 17) Entiyisweni, a hi nge swi koti ku tsakisa Muvumbi wa hina loko hi nga n’wi tivi kahle. Loko Yesu a khongela eka Tata wakwe u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Loko vanhu va timbilu letinene va kuma vutivi byolebyo, va tisola swinene hi swihoxo leswi va swi endleke enkarhini lowu hundzeke kutani va susumeteleka ku hundzuka hi mbilu hinkwayo. Rolero i goza ra vumbirhi leri endlaka leswaku munhu a rivaleriwa hi Xikwembu. Mintirho 3:19 yi ri: “Hikokwalaho, hundzukani mi hundzuluka leswaku ku hlanguriwa swidyoho swa n’wina.”

Ndzimana yoleyo yi tlhela yi vulavula hi goza ra vunharhu—ku nga ku hundzuluka. Ku hundzuluka swi vula ku tshika tindlela ta wena ta khale ni mikhuva ya kona kutani u hanya hi milawu ya Xikwembu. (Mintirho 26:20) Mhaka-nkulu hi leswaku, munhu u swi kombisa hi mahanyelo yakwe lamantshwa leswaku hakunene u tiyisile loko a byela Xikwembu a ku, “Ndza tisola.”

Xikwembu A Xi Rivaleli Swidyoho Hinkwaswo

Ku ni vanhu van’wana lava Xikwembu xi nga ta ka xi nga va rivaleli swidyoho swa vona. Pawulo u tsarile: “Loko hi hanya hi xidyoho hi vomu endzhaku ka loko hi amukele vutivi lebyi kongomeke bya ntiyiso, a ka ha salanga xitlhavelo xa swidyoho, kambe ku ni ku langutela kun’wana loku chavisaka ka vuavanyisi.” (Vaheveru 10:26, 27) Marito lama nge “hanya hi xidyoho hi vomu” ma vula leswaku munhu a nga lavi ku tisola eka swiendlo swo biha, u ni mbilu yo homboloka hakunene.

Yudasi Iskariyota a a ri ni mbilu yo tano. Yesu u te: “A swi ta va swinene ngopfu loko munhu yoloye a a nga velekiwanga.” (Matewu 26:24, 25) Naswona malunghana ni varhangeri van’wana va vukhongeri va le nkarhini wa yena, Yesu u te: “N’wina mi huma eka tata wa n’wina Diyavulosi . . . Loko a vulavula vunwa, u vulavula hi ku landza mboyamelo wa yena, hikuva i muhembi ni tata wa mavunwa.” (Yohane 8:44) Ku fana na Sathana, vavanuna volavo a va homboloke ku fika makumu. A va nga tisoli eka leswi va swi endleke, va hambete ni tindlela ta vona leto homboloka hikuva a va tlanyarile.a Hikwalaho ka ku nga hetiseki ni ku tsana, hambi ku ri Vakreste va xiviri va dyoha, nkarhi wun’wana va endla swidyoho leswikulu. Kambe swidyoho swa vona a swi kombisi leswaku se va hanya hi xidyoho.—Vagalatiya 6:1.

U Kombise Tintswalo Ku Kondza A Fa

Yehovha a nga languti xidyoho hi xoxe ntsena kambe u xiya ni langutelo ra mudyohi. (Esaya 1:16-19) Anakanya hi vadyohi vambirhi lava a va beleriwe etlhelo ka Yesu. Havambirhi ka vona a va ri ni milandzu leyikulu, hikuva un’wana wa vona u te: “Hi kuma hi ku helela leswi swi hi lulameleke hikwalaho ka swilo leswi hi swi endleke; kambe munhu loyi [Yesu] a nga endlanga nchumu lexi humeke endleleni.” Marito ya mudyohi loyi ma kombisa leswaku a a tiva swo karhi hi Yesu. Naswona vutivi byebyo byi n’wi pfunile leswaku a cinca langutelo ra yena. Sweswo swi kombisiwa hi leswi a nga tlhela a swi vula eka Yesu a ku: “U ndzi tsundzuka loko u nghena emfun’weni wa wena.” Kreste u xi hlamule njhani xikombelo xexo lexi humaka embilwini? U te: “Ndzi tiyisile namuntlha ndzi ri eka wena, U ta va na mina eParadeyisini.”—Luka 23:41-43.

Anakanya hi mhaka yoleyo: Marito lawa Yesu a ma vuleke ro hetelela loko a ha ri munhu wa nyama a ma katsa ku kombisa tintswalo eka wanuna loyi a pfumeleke leswaku a a faneriwa hi xigwevo xa rifu. Sweswo swa khutaza hakunene! Hikwalaho, hi nga tiyiseka leswaku Yesu Kreste swin’we ni Tata wa yena, Yehovha va ta va ni ntwela-vusiwana eka hinkwavo lava hundzukaka swi huma embilwini, ku nga khathariseki leswi va swi endleke enkarhini lowu hundzeke.—Varhoma 4:7.

[Nhlamuselo ya le hansi]

XANA U TSHAME U TIVUTISA?

◼ U nga ti hlamusela njhani tintswalo ta Xikwembu?—Pisalema 103:12-14; 130:3, 4.

◼ I magoza wahi lawa munhu a faneleke a ma teka leswaku a tsakeriwa hi Xikwembu?—Yohane 17:3; Mintirho 3:19.

◼ Yesu u n’wi tshembise yini mudyohi loyi a a beleriwe na yena?—Luka 23:43.

[Xifaniso eka tluka 10]

Yesu u kombise leswaku vanhu va nga rivaleriwa swidyoho swa vona leswikulu