Khale Ka Ndhuna Ya Nyimpi Se I ‘Socha Ra Kreste’

Hi ku vula ka Mark Lewis

“Xewani Muchaviseki.” “I nhlikanhi Hosi Yanga.” “Ri perile, Holobye.” A ndzi xeweta hi ndlela yoleyo loko ndza ha ri muhahisi wa swihaha-mpfhuka tlhelo Ndhuna-nkulu ya Vuthu ra Nyimpi ra le Moyeni ra Mfumo wa Australia leri hahisaka Vachaviseki. A ndzi hahisa vayimeri va Tiko ni vachaviseki va hulumendhe etikweni hinkwaro ra Australia ni le matikweni man’wana. Kambe, sweswi se ndzi endla ntirho lowu enerisaka swinene. Inge ndzi ku hlamusela.

NDZI velekeriwe ePerth, eVupela-dyambu bya Australia hi 1951 naswona tatana a ri socha. Loko ndzi ri ni malembe ya 15 hi vukhale ndzi ve xirho xa vahahisi va tipharachuta. Ko va loko ndzi sungule ku rhandza ntirho wo hahisa swihaha-mpfhuka.

Endzhakunyana vatswari va mina va hambanile, naswona ndyangu wa ka hina wu hahlukile. Ndhuna-nkulu ya Vuthu ra le Moyeni ni ndyangu wa yona va ndzi tekile va tshama na mina loko ndza ha hetisa xikolo. U ndzi kucetele ku ya eXikolweni xa Vuthu ra le Moyeni ra Mfumo wa le Australia.

Ndzi Kume Diploma Kutani Ndzi Va Muhahisi Wa Swihaha-mpfhuka

Endzhaku ka malembe ya kwalomu ka tsevu, ndzi kume digri ya sayense ni diploma ya ku va ndhuna ya Vuthu ra le Moyeni swin’we ni ku va muhahisi wa swihaha-mpfhuka. Ntirho wa mina wo sungula a wu katsa ku hahisa masocha etikweni hinkwaro ra Australia, ePacific Dzonga ni le Dzonga-vuxa bya Asia. Minkarhi yo tala a hi haha ehenhla ka tintshava to leha ivi hi fika hi phatsama erivaleni leri nga ni byanyi. A wu ri ntirho lowu nga ni khombo. Emalembeni wolawo ku we swihaha-mpfhuka swo hlayanyana swa vuthu ra hina ivi ku fa vanhu lava nga ni vutshila. Hambiswiritano, swihaha-mpfhuka swa hina a swi pfuna lava tshamaka etindhawini ta le kule. A hi fambisa nhundzu yo aka mabuloho, tigandaganda letitsongo to khula mapatu, ni swakudya swo phalala ni mintlawa ya vatshunguri. Nakambe lava vabyaka ngopfu ni lava vavisekeke ngopfu a hi va tsutsumisela exibedlhele.

Hi 1978, ndzi thwasile tanihi muleteri wa vahahisi kutani ndzi tlhelele eXikolweni xa Vuthu ra le Moyeni ndzi ya dyondzisa kona. Loko ndzi tirha kwale ndzi pfuxe vunghana bya mina na Diane, noni leyi a yi ri ni xinhwanyatana xa malembe manharhu hi vukhale. Mina na nkata Diane a hi dyondza swin’we eXikolweni xa Vuthu ra le Moyeni kambe yena u fe emhangwini ya xihaha-mpfhuka. Loko ndzi n’wi byele leswaku ndzi lava ku tekana na yena, u ndzi byele leswaku ndzi yimanyana wa ha ta ehleketa hi yona mhaka leyi. A a nga tiyiseki leswaku wa ha swi lava ku tlhela a tekiwa hi muhahisi wa swihaha-mpfhuka.

Hi ku famba ka nkarhi, ndzi amukele kontraka yo tirha lembe tanihi mupfuni wa Muyimeri-nkulu wa tiko ra Britain la nga le Australia wa timhaka ta xihundla. Ku tshama eNdlwini ya Mfumo, le Canberra, swi ndzi endle ndzi yi tiva ku antswa ndlela leyi tipolitiki ti tirhaka ha yona, ndzi tlhela ndzi tirhisana ni vatirhela-mfumo, vuthu ni varhangeri va vukhongeri. Loko lembe ri hela ndzi tlhele ndzi ya tirha tanihi muleteri wa vahahisi. Endzhaku ka sweswo mina na Diane hi tekanile hi 1980.

Hi 1982, ndzi pfumele ku ya tirha malembe mambirhi eka Vuthu ra le Moyeni ra le United States ndzi ri ndhuna-nkulu ya vuhlayiseki bya swihaha-mpfhuka, ni ku kambisisa loko ku humelele mhangu ivi ndhuna-nkulu ya le United States yi ya tirha eAustralia. Ntirho lowu a wu ndzi fambisa tiko hinkwaro ra United States ku ya fika ni le Ireland N’walungu. A wu katsa ku kambisisa timhangu ta swihaha-mpfhuka ni ku kambisisa ndlela leyi swi endliweke ha yona ni ndlela leyi swi hahisiwaka ha yona leswaku ku hungutiwa timhangu.

Ndzi Tlhelela eAustralia

Loko ndzi tlhelele eAustralia, hi ve ni n’wana wa nhwanyana loyi hi n’wi thyeke Kerry. Leswi a ndzi heta tiawara to tala ndzi ri entirhweni, Diane u ve manana tlhelo tata wa vana va hina naswona ndyangu wa hina a wu nga tiphini. Endzhaku ka malembe manharhu ndzi kume xikhundlha xa mina xo sungula xa ku va ndhuna-nkulu ya Vuthu ra Nyimpi ra le Moyeni leri hahisaka Vachaviseki lexi ndzi vulavuleke ha xona eku sunguleni. Loko Nyimpi ya le Nsonga-nkulu wa Persia yi tlhekeka hi 1991, vuthu ra hina ra le moyeni a ri pfuna masocha ya Nhlangano wa Matiko ri tlhela ri pfuna mavuthu man’wana ya wona lawa a ma ri ematikweni yo tanihi Pakistan, Afghanistan, Afrika ni le Israyele.

Hi 1992, ndzi ve Mupfuni wa Ndhuna ya Masocha. Ku tirha ka mina tanihi mupfuni wa ndhuna ya masocha eAustralia, swi endle leswaku ndzi twisisa ku tirhisana loku nga kona exikarhi ka vuthu, tipolitiki ni Nhlangano wa Matiko. Ndzi xiye leswaku Nhlangano wa Matiko wu endla swihoxo hi tindlela to tala. Kambe a swi tikomba hi tshembele eka wona leswaku wu ta antswisa swiyimo emisaveni. Leswi a swi humelela ekaya swi endle leswaku ndzi tlhela ndzi kambisisa mavonelo ya mina.

Diane A Kuma Tinhlamulo Ta Swivutiso Swakwe

Endzhaku ko feriwa hi nuna wakwe wo sungula, Diane, loyi a a nghena kereke ya Rhoma Khatoliki, a a lava ku hlamuriwa swivutiso swakwe, kambe matshalatshala yakwe ma ve nyuku wa mbyana. Hikwalaho, timhaka ti nyanye ku biha loko ntombhi ya hina, Renee, a sungula ku tsakela vungoma. Loko Diane a endzele munghana wakwe u vone nkandziyiso wa Xalamuka! wu ri ni xihloko lexi nga ta humelela enkandziyisweni lowu landzelaka lexi vulavulaka hi ku gandzela Sathana.a A a nga si tshama a vona Xalamuka! Loko a ri karhi a ya ekaya, u tivutisile a ku, ‘Ndzi nga wu kuma njhani nkandziyiso wolowo?’

Endzhaku ka masiku manharhu, Diane u endzeriwe hi Timbhoni ta Yehovha naswona u kume magazini lowu a wu lava. Hi ku famba ka nkarhi u pfumele ku dyondzeriwa Bibele naswona u sungule ku ya eminhlanganweni ya Vukreste. A ndzi tsakile loko a dyondza Bibele naswona minkarhi yin’wana a ndzi famba na yena eminhlanganweni, kambe a ndzi nga lavi ku dyondza Bibele. A ndzi nga titeki ndzi ri mupfumeri. A ndzi pfumela eka Xikwembu kambe a a ndzi vone vukanganyisi lebyi nga kona evukhongerini lerova ndzi nga vi na mhaka na byona. Hi xikombiso, a ndzi nga swi twisisi leswaku swi ta njhani leswaku vafundhisi va seketela nyimpi kasi hi hala tlhelo va chumayela leswaku vanhu va fanele va rhandzana ni ku va ni ku rhula.

Hi vutlhari Diane a a siya timagazini ta Xihondzo xo Rindza ni ta Xalamuka! erivaleni leswaku ndzi ta ti hlaya. Ndzi hlaye tin’wana ta tona kutani ndzi tlhela ndzi ti veka kahle lomu a a ti ri kona. A a ndzi nga lavi leswaku a ehleketa leswaku ndzi nga ha va ndzi titsakela. Loko ndzi ri karhi ndzi dyondza swo tala hi Bibele, ku ni matsalwa mambirhi lawa a ma nga ndzi dyisi byi rhelela. Rin’wana ra wona i Nhlavutelo 19:17, 18, leyi vulavulaka hi swinyenyana leswi dyaka nyama ya “tindhuna ta nyimpi.” Lerin’wana i Nhlavutelo 17:3, leyi boxaka “xivandzana xa muvala wa ribungu.” Timbhoni a ti teka xivandzana lexi xi fanekisela Nhlangano wa Matiko, ku nga langutelo leri lwisanaka ni ndlela leyi mina a ndzi wu teka ha yona Nhlangano wa Matiko.b Xivutiso xin’wana ni xin’wana lexi taka emianakanyweni ya mina ndzi xi bakanyele ekule.

Hi 1993, Diane u ndzi rhambe leswaku ndzi va kona loko a khuvuriwa. U ndzi rhambe ndzi nga swi langutelanga. Hiloko ndzi n’wi vutisa ndzi ku, “A hi nge u fanele u hlawula exikarhi ka Yehovha na mina, u ta hlawula mani?” U te: “Ndzi ta hlawula Yehovha. Kambe ndza tshemba leswaku a swi kali swi lava ndzi hlawula. Ndzi rhandza Yehovha na wena.” Hiloko ndzi swi xiya leswaku ndzi fanele ndzi dyondza swo tala hi Yehovha loyi nkatanga a n’wi rhandzaka. Nkulu un’wana wa vandlha ra Timbhoni ta Yehovha u kombele ku dyondza na mina Bibele kutani ndzi pfumela.

A ndzi tsakela vuprofeta bya Bibele swinene, ngopfu-ngopfu lebyi vulavulaka hi mavuthu na hi matimu ya tipolitiki. Hi xikombiso, loko ndza ha ri exikolweni xa Vuthu ra le Moyeni, ndzi dyondze hi ta mavuthu ya Magriki ya khale. Ndzi xiye leswaku matimu yo tala lama nga eka Daniyele ndzima 8, ma tsariwe ka ha sele malembe-xidzana yo tala leswaku ma humelela. Hakatsongo-ntsongo vuprofeta lebyi ni byin’wana byi ndzi khorwisile leswaku Bibele yi huhuteriwe hi Xikwembu.

Ndzi tlhele ndzi kambisisa ndlela leyi a ndzi wu languta ha yona Nhlangano wa Matiko. A ndzi swi tiva leswaku vuthu a ri nge swi tlhantlhi swiphiqo swa vanhu nileswaku ku rhula ka xiviri a ku nge tisiwi hi tinyimpi naswona Nhlangano wa Matiko a wu nge swi tlhantlhi swiphiqo swa ku avana ka tipolitiki, vukhongeri ni ku avana ka tinxaka ta vanhu leswi vangaka nyimpi. Ndzi sungule ku swi xiya leswaku i Xikwembu ntsena lexi nga tlhantlhaka swiphiqo swa vanhu. Kunene, swi tikombile leswaku ana se xi le ku swi tlhantlheni swiphiqo swa vamakwerhu lava nga Timbhoni ta Yehovha emisaveni. (Pisalema 133:1; Esaya 2:2-4) Ndzi tivutise ndzi ku, ‘Xana ndzi nga tshika ntirho wa mina wa vusocha ndzi tirhela Xikwembu?’

Ku Tiyimisela Ku Hanya Hi Ntiyiso Wa Bibele

Ndzi endle xiboho hi 1994, loko ndzi ye ntsombanweni wa muganga wa Timbhoni ta Yehovha le Sydney. Entsombanweni wolowo ku tlangiwe drama ya le minkarhini ya Bibele, leyi a yi vulavula hi rixaka ra khale ra Israyele leri a ri fanele ri hlawula exikarhi ka ku gandzela Yehovha kumbe Bali, xikwembu xa Vakanana. Eliya muprofeta wa Yehovha u vutise Vaisrayele a ku: “Xana mi ta va ni mianakanyo yimbirhi ku fikela rini? Loko Yehovha a ri Xikwembu xa ntiyiso, n’wi landzeleni; kambe loko ku ri Bali, landzelani yena.” (1 Tihosi 18:21) Marito wolawo ma fikelele mbilu ya mina. Na mina a ndzi fana ni Vaisrayele, a ndzi kandziye hala ni hala. A ndzi fanele ku endla xiboho: Xana ndzi ta tirhela Yehovha kumbe ndzi ta hambeta ni ntirho wa mina wa vusocha?

Loko ndzi ri emovheni ndzi kongome ekaya vusiku byolebyo, ndzi byele Diane leswaku ndzi ta tshika vusocha kutani ndzi va Mbhoni ya Yehovha. U hlamarisiwe hileswi ndzi tekeke xiboho hi xihatla kambe u ndzi seketerile swinene. Endzhaku ka masikunyana ndzi yise papila ro tshika vusocha.

Enkarhini wolowo a ndzi ri Ndhuna-nkulu ya Masocha Lamantshwa eXikolweni xa Vusocha edoroba-nkulu ra Canberra le Australia. A ndzi langutela vuthu swin’we ni xikolo xo letela Vuthu ra le Matini ra masocha ya kwalomu ka 1 300 ni swichudeni swa Vuthu ra le Moyeni ni valeteri va kona. Siku leri hi nga pfala ha rona xikolo lembe rolero, ndzi byele valeteri ni swichudeni leswi thwasaka swa 400 leswi a swi hlengeletanile leswaku ndza tshika ntirho wa vusocha naswona ndzi ya va Mukreste la chumayelaka vanhu hi yindlu na yindlu ndzi va dyondzisa Bibele hi ku tirhandzela. Xitiviso lexi xi endle leswaku ndzi bula na vona hi Bibele.

Ndzi Va Mutirheli Wa Nkarhi Hinkwawo

Loko ndzi tshike ntirho, hi xa mundzuku xa kona ndzi sungule ntirho wo chumayela. Endzhaku ka tin’hweti tinharhu, ndzi khuvuriwile hi April 1995. Kutani a ndza ha yima-yimanga ndzi nambe ndzi va phayona ra nkarhi hinkwawo, laha a ndzi ta heta nkarhi wo tala ndzi ri ensin’wini.

Ku tshika ka mina ntirho wa vusocha ndzi va ‘socha ra Kreste’ a swi katsa ku cinca swilo swo hlayanyana evuton’wini bya mina. (2 Timotiya 2:3) Xin’wana xa swiavelo swa mina swo sungula a ku ri ku fambisa swikurisa-marito eminhlanganweni ya Vukreste. Ematshan’weni yo va ndhuna-nkulu, se a ku ri mina ndzi faneleke ku vutisa van’wana ndlela leyi swilo swi faneleke swi endliwa ha yona. Ku khathalela ni ku rhandza van’wana hi swona swi veke swa nkoka ku tlula ku lerisa vanhu leswaku va endla swilo hi xihatla, hambileswi swa ha ndzi tikelakanyana ku kombisa timfanelo leti. Nakambe leswi ndzi tshikeke ntirho, ndyangu wa hina a wu fanele wu hanya vutomi byo olova.

Kunene ndza tiphina hi ntirho wo chumayela. Loko ndzi ri karhi ndzi chumayela na Kerry, xinhwanyetana xa hina xa malembe ya kaye hi vukhale, ndzi tshame ndzi xi byela leswaku xi xiya ndlela leyi vini va miti va angulaka ha yona. Eku heteleleni hi xiye leswaku vanhu vo tala a va nga tsakeli kambe van’wana a va hi tsakela va tlhela va tsakela ni rungula ra hina. Hi khutazekile havumbirhi bya hina. Ntombhi ya hina leyin’wana yi dyondzeriwe Bibele nkarhinyana kambe a yi hlawulanga ku tirhela Yehovha.

Mina na Diane hi khutaze Kerry leswaku a fikelela pakani yo va mutirheli wa nkarhi hinkwawo. Ndza ha ku tiphina hi ku ya eXikolweni xa Ntirho wa Vuphayona swin’we na yena. Yena a a ya ro sungula mina a ndzi ya ra vumbirhi. Swi tsakisa ngopfu ku vona Kerry swin’we ni vantshwa van’wana va endla nhluvuko hi tlhelo ra moya ni ku hisekela ntirho wa Vukreste wo chumayela.—Pisalema 110:3.

Mikateko Ya Ntsandza-vahlayi

Loko ndzi tsundzuka ta khale, ndzi vona ku hambana ni ku fambisana exikarhi ka ku va socha ra tiko ni ku va socha ra Kreste. Eka mintirho leyi hayimbirhi munhu u fanele a tshembeka, a yingisa, a tikhoma ni ku tikarhata. Leswi masocha yo tala ma tinyiketelaka ku fela tiko ni maxaka, Vakreste va ntiyiso va fanele va rhandza ni valala va vona. (Matewu 5:43-48) Loko masocha ma ve tinghwazi hikwalaho ko va ni xivindzi ma kuma timendlele kasi Vakreste va ntiyiso va tsakeriwa hi Xikwembu hikwalaho ko tiyisela hi ku tshembeka entirhweni wa xona—leswi swi nga ha katsa ku va ni xivindzi loko va kanetiwa, va hlekuriwa ni ku langutana ni miringo yin’wana nkarhi na nkarhi. (Vaheveru 10:36-39) Vakreste-kulorhi hi vona ndzi va tivaka va ri vanhu lava nga ni mahanyelo lamanene.

Masiku lawa loko ndzi xeweta ndzi ri, “Avuxeni Makwerhu” kumbe “Ri perile Makwerhu,” a ndza ha xeweti hi ndlela leyi ndzi yi vuleke eku sunguleni. Hakunene swa tsakisa ku chumayela ni vanhu lava rhandzaka Xikwembu hi mbilu hinkwayo! Hambiswiritano, lexi tsakisaka ku tlurisa i ku tirhela Yehovha, La nge Henhla-henhla! A wu kona ntirho lowu ndzi eneriseke evuton’wini loko ku nga ri ku tirhela Yehovha.

[Tinhlamuselo ta le hansi]

[Nkomiso eka tluka 14]

Masocha yo tala ma tinyiketela ku fela tiko ni maxaka kasi Vakreste va ntiyiso va fanele va rhandza ni valala va vona

[Xifaniso eka tluka 12, 13]

Ndzi ri eku hahiseni ka xihaha-mpfhuka lexi rhwalaka Vachaviseki va Vuthu ra le Moyeni xi ri karhi xi hundza ehenhla ka Palamendhe, eCanberra

[Xifaniso eka tluka 15]

Drama ya Bibele, entsombanweni wa muganga eSydney, le Australia hi 1994

[Xifaniso eka tluka 15]

Ndzi ri na Kerry eXikolweni xa Ntirho wa Vuphayona

[Xifaniso eka tluka 15]

Ndzi ri na Diane na Kerry namuntlha