Vantshwa Va Vutisa

Xana Ndzi Nga Hanya Njhani Ni Mutwa eNyameni?

SWIVURISO 20:29 yi ri: “Lavantshwa va bomba hi matimba ya vona.” (Bibele—Mahungu Lamanene) Loko u vabya kumbe u lamarile, u nga ha vona onge ndzimana leyi a yi nge tirhi eka wena. Kambe yi nga tirha. Ntiyiso wa mhaka hileswaku vantshwa vo tala lava lamaleke hi ndlela yo karhi ni lava nga ni vuvabyi lebyi nga tshungulekiki va hlule swihinga leswikulu. Xalamuka! yi vulavurisane ni vantshwa va mune lava nga le xiyin’weni xexo.

Hiroki, wa le Japani u vaviseke byongo ku sukela loko a tswariwile. U ri: “A ndzi swi koti ku yimisa nhloko ya mina naswona mavoko ya mina a ma tirhi. Ndzi titshege hi ku pfuniwa hi vanhu van’wana.”

Natalie ni makwavo wakwe James, va laha Afrika Dzonga va tswariwe va ri vamanghimana. Nakambe Natalie u petseke longo. U ri: “Se ndzi endliwe vuhandzuri bya longo minkarhi ya mune, naswona leswi longo ra mina ri khotsekeke, mahahu ya mina a ma tirhi kahle.”

Timothy, wa le Britain, u kumeke a ri ni vuvabyi bya chronic fatigue syndrome, ku nga ku heleriwa hi matimba ku tlula mpimo ni ku va ni ntshikilelo ni ku heleriwa hi vurhongo. U ri: “Ku nga si hela tin’hweti timbirhi, se a ndzi tsane lerova a ndzi nga ha swi koti ni ku yima.”

Danielle, wa le Australia, loko a ri ni malembe ya 19 u kumeke a ri ni vuvabyi bya chukele. U ri: “Tanihi leswi vuvabyi bya chukele byi nga vonakiki, vanhu van’wana a va swi xiyi leswaku byi ni khombo swinene. Phela, vuvabyi lebyi byi nga ndzi funyisa buwa.”

Loko u ri ni vuvabyi kumbe vulema byo karhi, a swi kanakanisi leswaku marito ya Hiroki, Natalie, Timothy na Danielle ma ku khutaza. Loko u ri ni rihanyo lerinene, marito ya vona ma nga ha ku pfuna leswaku u twisisa vuvabyi ni vulema lebyi va byi tiyiselaka.

Xalamuka!: Hi xihi xiphiqo lexikulu lexi u langutaneke na xona?

Natalie: Ndzi va ni tingana hi ndlela leyi vanhu va ndzi langutaka ha yona. A ndzi ntshunxeki. Ndzi twa onge mahlo hinkwawo yo tshama ya ndzi langutile.

Danielle: Leswi ndzi nga ni vuvabyi bya chukele ndzi karhateka ngopfu hileswaku ndzi ta dya yini, mpimo wa swakudya swa kona ni leswaku hi swihi swakudya leswi ndzi nga fanelangiki ndzi swi dya ngopfu. Loko ndzo dya hi ndlela leyi nga riki yona chukela ri ta hunguteka engatini, naswona ndzi nga titivala nkarhi wo leha.

Hiroki: Ndzi famba hi xitulu xo hlawuleka xa lava lamaleke lexi endleriweke vulema bya mina naswona ndzi heta tiawara ta 15 hi siku ndzi nga si hundzuluka. Nakambe a ndzi etleli kahle. Loko ko tshuka ku twale ku khwaxa, ndza pfuka.

Timothy: Eku sunguleni, xiphiqo xa mina lexikulu hileswaku a ndzi ala leswaku ndza vabya. Vulema bya mina a byi ndzi khomisa tingana.

Xalamuka!: Hi swihi swiphiqo swin’wana leswi u langutanaka na swona?

Danielle: Vuvabyi bya chukele byi ndzi endla ndzi karhala ngopfu. Ndzi etlela ngopfu ku tlula tintangha ta mina. Nakambe vuvabyi lebyi a byi tshunguleki.

Natalie: Swi le rivaleni leswaku ku va manghimana a swi ndzi khomi kahle. Ku endla swilo leswi tolovelekeke—swo tanihi ku teka xanchumu etixelufini exitolo—swa ndzi tikela. Loko ndzi ya exitolo ndzi ri ndzexe a ndzi tiphini.

Timothy: Ndzi tshama ndzi ri ni switlhavi naswona ndzi ri ni ntshikilelo. Loko ndzi nga si vabya a ndzi ri munhu wa migingiriko. A ndzi tirha naswona a ndzi ri ni layisense yo chayela. A ndzi tlanga mintlangu yo tanihi bolo ya milenge ni thenisi. Sweswi se ndzi famba hi xitulu xa lava lamaleke.

Hiroki: A ndza ha koti ku vulavula kahle. Leswi swi ndzi heta matimba naswona swi ndzi endla ndzi nga koti ku sungula mabulo. Leswi mavoko ya mina ma nga lawulekiki, minkarhi yin’wana ndzi pfa ndzi ba vanhu ndzi nga tiyimiselanga. Loko ndzi va bile, ndzi tsandzeka ni ku “kombela ku rivaleriwa,” hikwalaho ka leswi ndzi nga kotiki ku vulavula kahle.

Xalamuka!: I yini lexi ku pfuneke leswaku u kota ku langutana ni xiyimo xa wena?

Danielle: Ndzi ringeta ku anakanyisisa hi swilo leswinene leswi ndzi nga na swona evuton’wini. Ndyangu wa ka hina i wunene ngopfu, ndzi ni vanghana lava ndzi rhandzaka evandlheni naswona xa nkoka swinene ndzi seketeriwa hi Yehovha Xikwembu. Ndzi tlhela ndzi ringeta ku tshama ndzi ri karhi ndzi hlaya rungula lerintshwa leri vulavulaka hi vuvabyi bya chukele. Ndzi ni vutihlamuleri byo khathalela rihanyo ra mina naswona ndzi ringeta hilaha ndzi nga kotaka hakona leswaku ndzi tikhathalela.

Natalie: Xikhongelo hi xona xi ndzi nyikaka matimba. Ndzi ringeta ku tlhantlha swiphiqo swa mina ha xin’we-xin’we. Ku tshama ndzi khomekile swi ndzi pfuna leswaku ndzi nga tshameli ku titshandza. Naswona ndzi ni vatswari lavanene lava ndzi nga va phofulelaka ta le mbilwini.

Timothy: Siku rin’wana ni rin’wana ndzi endla nchumu lowu fambisanaka ni vugandzeri bya mina, hambiloko ndzo wu endla swa xinkarhana. Hi xikombiso, mixo wun’wana ni wun’wana ndzi hlaya ndzimana ya siku. Ku dyondza Bibele ni xikhongelo i swa nkoka swinene eka mina, ngopfu-ngopfu loko ndzi tshikilelekile.

Hiroki: Ndzi ringeta ku ka ndzi nga vileli hi swilo leswi ndzi nga taka ndzi nga swi lulamisi. Loko ndzo vilela ha swona ndzi ta va ndzo tlanga hi nkarhi. Ku ri na sweswo, ndzi ringeta hilaha ndzi nga kotaka hakona leswaku ndzi tiwundla hi tlhelo ra moya, naswona a ndzi tshiki ku dyondza Bibele hileswi ndzi vabyaka. Loko ndzi nga swi koti ku etlela, nkarhi wolowo ndzi wu tirhisela ku khongela.—Vona Varhoma 12:12.

Xalamuka!: Xana van’wana va ku khutaze njhani?

Hiroki: Nkarhi hinkwawo vakulu va ndzi bumabumela eka leswitsongo leswi ndzi kotaka ku swi endla. Vamakwerhu evandlheni va famba na mina eka maendzo ya vona yo vuyela ni le ka tidyondzo ta Bibele.—Vona Varhoma 12:10.

Danielle: Lexi ndzi khutazaka ngopfu hiloko vamakwerhu evandlheni va ndzi bumabumela hi mbilu hinkwayo. Sweswo swi ndzi endla ndzi titwa ndzi rhandziwa naswona swi ndzi khutaza leswaku ndzi ya emahlweni.

Timothy: Ku ni kokwana un’wana evandlheni loyi nkarhi hinkwawo a ringetaka ku bula na mina eminhlanganweni. Vakulu ni vasati va vona va ndzi khutaza ni ku ndzi nyika swiringanyeto leswi ndzi pfunaka. Nkulu un’wana, la nga ni malembe ya 84 hi vukhale, u ndzi pfune leswaku ndzi tivekela tipakani to karhi leti ndzi nga ti fikelelaka. Nandza un’wana wa vutirheli u ndzi rhambe leswaku ndzi famba na yena ensin’wini naswona u hlele leswaku hi tirha ensin’wini leyi ndzi nga ta kota ku famba hi xitulu xa lava lamaleke.—Vona Pisalema 55:22.

Natalie: Loko ndzi ku ngheniyani eHolweni ya Mfumo, vamakwerhu va mina va moya va ndzi xeweta hi ntsako. Minkarhi hinkwayo vadyuhari va tshama va ri karhi va ndzi khutaza hambileswi na vona va nga ni swiphiqo.—Vona 2 Vakorinto 4:16, 17.

Xalamuka!: I yini lexi ku pfunaka leswaku u tshama u tsakile?

Hiroki: Leswi ndzi nga Mbhoni ya Yehovha, ndzi le ka nhlengeletano ya vanhu lava nga ni ntshembo lowu tsakisaka. Ku tiva leswaku ndzi le nhlengeletanweni yoleyo swi ndzi pfuna leswaku ndzi tshama ndzi tsakile.—Vona 2 Tikronika 15:7.

Danielle: Ndzi anakanya hi lunghelo leri ndzi nga na rona ro twisisa xikongomelo xa Xikwembu. Ku ni vanhu lava nga ni rihanyo lerinene kambe a va tiphini hi vutomi hilaha ndzi tiphinaka hakona.—Vona Swivuriso 15:15.

Natalie: Ndzi vona swi ri swa nkoka ku tshama ndzi ri ni vanhu lava tsakeke. Nakambe swa khutaza ku hlaya mintokoto ya van’wana lava tirhelaka Yehovha hambiloko va ringiwa. Loko ndzi ya eHolweni ya Mfumo, ndza swi tiva leswaku ndzi ta ya khutaziwa ni ku tsundzuxiwa leswaku i lunghelo ronghasi ku va Mbhoni ya Yehovha.—Vona Vaheveru 10:24, 25.

Timothy: Hi ku ya hi 1 Vakorinto 10:13, Yehovha a nge hi tshiki hi ringiwa hi ndzingo lowu hi nga tsandzekaka ku wu hlula. Ndzi gimete hileswaku loko Muvumbi wa mina a tiyiseka leswaku ndzi nga swi kota ku tiyisela ndzingo lowu, a ku na lexi ndzi faneleke ndzi karhateka ha xona.

Swihloko swin’wana leswi nge “Vantshwa Va Vutisa” swi kumeka eka Website leyi nge, www.watchtower.org/ype

SWIVUTISO SWO ANAKANYISISA HA SWONA

◼ Hiroki na Timothy va famba hi switulu swa lava lamaleke. Loko na wena u lamarile, xana leswi va swi vuleke swi nga ku pfuna njhani leswaku u tshama u tsakile?

◼ Danielle u vula leswaku “tanihi leswi vuvabyi bya chukele byi nga vonakiki, vanhu van’wana a va swi xiyi leswaku byi ni khombo swinene.” Xana na wena u ni vuvabyi lebyi nga “vonakiki”? Loko swi ri tano, xana u nga dyondza yini eka leswi vuriweke hi Danielle?

◼ Natalie u vula leswaku xiphiqo lexikulu lexi a langutanaka na xona i ndlela leyi vanhu va n’wi langutaka ha yona. Xana u nga endla yini leswaku munhu wo fana na Natalie a titwa a ntshunxekile? Loko u ri ni vuvabyi kumbe vulema byo karhi lebyi ku endlaka u titwa ku fana na Natalie, i yini lexi nga ku endlaka u tsaka ku fana na yena?

◼ Tsala mavito ya vanhu lava u va tivaka lava nga ni mavabyi lama nga tshungulekiki kumbe vulema byo karhi.

․․․․․

◼ I yini lexi u nga xi endlaka leswaku u khutaza un’wana ni un’wana wa vona?

․․․․․

[Bokisi eka tluka tluka 27]

Nchavelelo Wa Matsalwa

◼ Yesu u ni ntwela-vusiwana wa xiviri eka lava vabyaka.—Marka 1:41.

◼ Loko Yesu a “herisa swifo swa mixaka hinkwayo ni vulema bya mixaka hinkwayo” a a kombisa ndlela leyi a nga ta va horisa ha yona vanhu lava vabyaka eMfun’weni wa Xikwembu.—Matewu 4:23.

◼ Emisaveni leyintshwa ya Xikwembu “ku hava munhu la tshamaka kona la nga ta ku: ‘Ndza vabya,’” naswona a ku nge he vi na xitlhavi.—Esaya 33:24; Nhlavutelo 21:1-4.

◼ Hambi ku ri rifu ri ta “herisiwa.”—1 Vakorinto 15:25, 26.

[Xifaniso eka tluka 26]

Hiroki, wa malembe ya 23 wa le Japani

[Xifaniso eka tluka 26]

Natalie, wa malembe ya 20 wa laha Afrika Dzonga

[Xifaniso eka tluka 26]

Timothy, wa malembe ya 20 wa le Britain

[Xifaniso eka tluka 26]

Danielle, wa malembe ya 24 wa le Australia