Leti Humaka Eka Vahlayi

Hi Byihi Vumundzuku Bya Vukreste? (February 2007) Swo tala swa leswi mi swi vulaka swi pfumelelana ni Rito ra Xikwembu, naswona ndzi pfumelelana na n’wina. Hambiswiritano, ku ni timhaka timbirhi leti nga eka magazini wa n’wina leti nga ndzi tsakisiki. Yo sungula i ndlela leyi mi vulavulaka ku biha ha yona hi tikereke letin’wana, kasi ya vumbirhi i ndlela leyi mi titlakusaka ha yona eka tikereke letin’wana. A swi ta va swinene loko hinkwerhu a ho twanana naswona hi pfumela swilo leswi fanaka, kambe a swi tano. Mina a ndzi teki kereke yin’wana kumbe ntlawa wo karhi wa vukhongeri wu ri lowu antswaka ku tlula wun’wana.

S. S., United States

“Xalamuka!” ya hlamula: Timbhoni ta Yehovha a ti lwisani ni vanhu va vukhongeri lebyin’wana, naswona a hi titeki hi antswa ku tlula vanhu van’wana. Ha swi tiva leswaku “hinkwavo va dyohile, naswona va kayivela ku vangama ka Xikwembu.” (Varhoma 3:23) Hi ri karhi hi tsundzuka sweswo, ha tikarhata, hi tirhisa rifuwo ra hina ni nkarhi wa hina leswaku hi endzela vanhu emakaya ya vona leswaku hi ya va dyondzisa ntiyiso wa le Bibeleni, ku katsa ni ntshembo lowu hlamarisaka lowu kumekaka eBibeleni. Hambiswiritano, Timbhoni ta Yehovha ti vulavula hi xivindzi leswaku ti paluxa vukanganyisi ni xihoxo xa vukhongeri hilaha Yesu ni vadyondzisiwa va yena va endleke hakona.

U Nga Hlamula Njhani? Enkarhini lowu hundzeke a ndzi nga tali ku bula hi mhaka leyi ni vana va mina vambirhi. Sweswi ndza swi xiya leswaku i ya nkoka swinene naswona ndzi nga yi tirhisa ku byala ntiyiso wa le Bibeleni etimbilwini ta vana va mina. Ku tlula kwalaho, ndzi yi rhandzela leswaku yi tiyisa ripfumelo ra mina.

I. H., Czech Republic

Ndzi xi tlangela swinene xiyenge lexi, lexi tsakisaka, lexi ndzi endlaka ndzi kota ku kuma timhaka leti ndzi nga endlaka dyondzo ya munhu hi yexe ha tona. Swi le rivaleni leswaku ku tirhiwile swinene loko ku hleriwa xiyenge lexi. Xi ndzi tshineta swinene eka Yehovha, Tata wa mina wa vutlhari.

A. S., Rhaxiya

“Yehovha, Ndzi Kombela Ku Ku Tirhela” (July 2007) Ripfumelo ra mina eka Yehovha ri tiyisiwe hi ku hlaya mhaka ya vutomi ya Danielle Hall. Ku sukela loko a ha ri ntsongo, a a nga chavi ku byela vanhu hinkwavo exikolweni leswaku yena a a ri Mbhoni ya Yehovha. Ndza tiyiseka leswaku vana vo tala lava nghenaka xikolo lava nga Timbhoni va ta endla leswi fanaka.

A. R., Madagascar

Ndzi ni malembe ya kaye hi vukhale. Mina na manana ha ha ku heta ku hlaya ntokoto wa Danielle. Wu ndzi endle ndzi swi xiya leswaku ndzi fanele ndzi nkhensa leswi vatswari va mina va nga Timbhoni naswona a swi ndzi tikeli ku tirhela Yehovha. Ndzi rhandze mhaka ya leswaku “ku nga khathariseki leswaku hi tshama kwihi, Yehovha u tshama a ri ekusuhi na hina.” Ndzi tlhele ndzi tsakisiwa na hi mhaka ya leswaku loko Danielle a vuya exikolweni, a a tshama emubedweni wa yena kutani a byela Yehovha hi leswi humeleleke siku rero, onge hiloko a vulavula ni tata wa yena. Ndzi lava ku dyondza swo karhi emhakeni leyi.

A. D., Italy

“Vantshwa Va Vutisa . . . Ha Yini Ndzi Bakanyeriwa eTlhelo Minkarhi Hinkwayo?” (July 2007) Xihloko lexi a xi ri xinene ngopfu hikuva a ndzi twa onge hiloko xi tsaleriwe mina. Ndzi rhandze ni swivutiso leswi vutisiweke eka xona swin’we ni tindhawu leti siyiweke leswaku u ta tsala nhlamulo eka tona. Ndza nkhensa. Xi ndzi pfune ngopfu.

C. A., Canada