Leti Humaka Eka Vahlayi

Ndlela Yo Pfuna Vantshwa Leswaku Va Tshama Va Tshembekile (March 2007) Tinhla to tala leti vuriweke malunghana ni ku tirhisa selfoni na Internet ti ndzi pfunile tanihi leswi ndzi nga ni malembe ya 18 hi vukhale. A ndzi vulavurisana ni vanhu vambe eka Internet. Swi nga si ya kwihi ndzi phasiwe hi ntlhamu wo endla xinghana ni vanhu volavo vo biha. Ndzi sungule ku tsana hi tlhelo ra moya hi ku hatlisa. Ndzi kale ndzi pfumela ku ya hlangana ni van’wana va vanhu volavo, lava a ndzi vulavurisana na vona hi Internet. Khombo ra kona, sweswo swi endle leswaku ndzi tikhoma hi ndlela yo biha. Ndzi khongelela leswaku xihloko lexi xi pfuna ni van’wana leswaku va papalata mbitsi leyi ndzi nga na yona. Nkelunkelu lowu ndzi vaka na wona ni swifaniso leswi vuyaka emianakanyweni ya mina a swi ndzi dyisi byi rhelela, kambe ndzi lwisana swinene na Sathana.

B. R., United States

Ha Yini Ndzi Titivala? (April 2007) Ndzi khutazeke ngopfu ku tiva leswaku a hi mina ndzi ri ndzexe loyi a karhatiwaka hi ku titivala. Xihloko lexi xi endle ndzi titwa onge Yehovha u vulavula na mina hi ku kongoma, a ku: “Ndza swi vona leswi ku humelelaka, hi lexi xikhutazo lexi ndzi ku nyikaka xona.”

I. R., Madagascar

Nchumu Wa Nkoka Ku Tlula Ntivo-vuxongi (April 2007) Ndzi pfumala ni marito yo nkhensa xihloko lexi. Ndzi ve mininjhere wa tindhawu timbirhi leti ku endliwaka swifaniso eka tona leti nghenisaka mali yo tala ku ringana malembe ya tsevu. A a ndzi wu rhandza swinene ntirho lowu, lowu a wu endla ndzi kombisa vuswikoti bya mina. Kambe, ndzi sungule ku xiya leswaku loko swi ya swi ndzi fambela kahle entirhweni naswona ndzi va ni ndhuma, a ndzi nga ha wu hisekeli ntirho wa Yehovha. A ndzi dzike ngopfu eka ku kombisa vuswikoti bya mina lerova ndzi va ni nkarhi wutsongo wo endla swilo swin’wana. A a ndzi swi tiva leswaku ndzi fanele ndzi cinca swin’wana. Kutani ndzi tshike ntirho wa mina ivi ndzi sungula ku hlanganyela swinene evugandzerini bya mina. Ku eneriseka ni ntsako lowu a ndzi wu kuma hi ku endla swifaniso swo saseka a hi nchumu loko swi ringanisiwa ni ntsako lowu ndzi wu kumaka evutirhelini bya Vukreste.

A. P., United States

Vantshwa Va Vutisa . . . Xana Ndzi Nga Aka Muti Ni Munhu Loyi? (May 2007) Ndzi sungule ku rhandza munhu loyi a ndzi anakanya leswaku hi ta fanelana. Hambiswiritano, loko ndzi hlaye xihloko lexi, ndzi xiye leswaku timfanelo leti a ndzi ti rhandza eka yena a ku nga ri timfanelo leti nga ta nkoka hakunene. Xihloko lexi xi ndzi pfune ku xiya leswaku timfanelo ta moya ni ndlela leyi munhu loyi u ehleketaka ku tekana na yena a va khomaka ha yona van’wana i swa nkoka swinene. Ndzi nkhensa Yehovha hikwalaho ka swihloko swo fana na lexi leswi hi sirhelelaka swi tlhela swi hi kongomisa hina vantshwa.

E. P., United States

Inge Hi Ku Tivisa Vanhu Va Le East Timor (May 2007) Loko ndzi hlaya xihloko lexi a ndzi lava ku tiva. Ndzi sungule ku twa hi ta tiko leri loko emahungwini ku vikiwa hi ta minkitsikitsi leyi a yi ri kona kwalaho. Ku sukela hi nkarhi wolowo ndzi sungule ku lava ku tiva leswaku vanhu va le East Timor va langutana njhani ni xiyimo lexi ni ndlela leyi ntirho wo chumayela wa Timbhoni ta Yehovha a wu famba ha yona endhawini yoleyo. Ndzi hlamarisiwe hi moya lowu vanhu va kwalaho va wu kombiseke, a va nga tshikileriwi hi xiyimo lexi xo tika kambe a va hambeta va ya mahlweni ni vutomi. A ndzi nge xi rivali xivindzi xa vanhu va le East Timor na xifaniso xa Jacob ni ndyangu wa yena lava nga le ku n’wayiteleni.

Y. M., Japani