Leti Humaka Eka Vahlayi

A Ndza Ha Ri Rona Hlonga Ra Byala (May 2007) Nkarhi na nkarhi ndza wu hlaya magazini wa n’wina loko Timbhoni ti ndzi tisela wona. Ndzi anakanya leswaku swihloko swa kona swa khutaza swinene ku tlula mahungu lama khomisaka gome ya le ka TV ni le ka maphepha-hungu. A ndzi si tshama ndzi va hlonga ra byala, kambe ndzi ni maxaka yo tala ni vanghana lava nga swindzendzele. Wanuna loyi ndzi hlayeke ha yena exihlokweni lexi u vule leswaku ana se u ni tin’hweti tinharhu a nga nwi byala. Leswi swi endleke loko a ve hlonga ra byala ku ringana malembe yo tala. Hambileswi ndzi n’wi bumabumelaka, kambe ndzi nga vula leswaku a hi xikombiso lexi faneleke, naswona ndzi anakanya leswaku a nga ha n’wi heta matimba munhu wihi na wihi la nga ni xiphiqo lexi. Hakanyingi swindzendzele loko swi ri karhi swi tikarhatela ku tshika byala, minkarhi yin’wana swi pfa swi navela ku byi nwa.

G. A., United States

“Xalamuka!” ya hlamula: A hi nga vuli swona leswaku ku tshika ku va hlonga ra byala swa olova. Ha pfumela leswaku vanhu vo tala lava ringetaka ku tshika ku va mahlonga ya byala va va ni swiphiqo naswona ku ni swilo leswi va hetaka matimba loko va ri karhi va tshika byala. Hambi ku ri lava byi tshikaka xikan’we naswona va nga ha riki mahlonga ya byona va fanele va tshama va xalamukile leswaku va nga ringeki. Hikwalaho, hilaha xihloko xi hlamuseleke hakona, munhu loyi a tshikeke ku nwa byala ku ringana malembe ya khume, u ri: “Vanhu vo tala a va yi twisisi nyimpi leyi ndzi yi lweke hikuva loko a ndzi lo nwa nghilazi yin’we ntsena ingi ndzi tlhelele eka tindlela ta mina ta khale. Ndza ha byi navela byala. Kambe swi lava xikhongelo lexi humaka embilwini ni ku tiyimisela leswaku munhu a kuma matimba yo tshika ku nwa.” Vanhu vo tala va swi kotile ku tshika ku va mahlonga ya byala, hi ku khongela eka Xikwembu leswaku xi va pfuna.—Pisalema 55:22.

Xana Leswi Bibele Yi Swi Vulaka I Ntiyiso? (November 2007) Ndzi na malembe ya 12 hi vukhale naswona ndzi lava ku wu nkhensa swinene nkandziyiso lowu wo hlawuleka wa Xalamuka! lowu nga ni rungula leri tsakisaka ni leri dyondzisaka. Entiyisweni, ndzi tsakele xiyenge lexi nga eka tluka 7 hi ku kongoma, lexi vulavulaka hi ndlela leyi Bibele yi twananaka ha yona. Xi vulavule hi swilo leswi a ndzi nga si tshama ndzi anakanya ha swona. Ndzi wu langutele hi mahlo-ngati nkandziyiso wo hlawuleka lowu landzelaka!

D. F., United States

Swivutiso Swo Anakanyisisa Ha Swona Ndzi rhandza ku mi nkhensa hikwalaho ka mahlelelo lamantshwa ya Xalamuka! Swivutiso leswi vutisiweke emakumu ka swihloko swo karhi swi ndzi pfunile swinene. Swi ndzi pfunile leswaku ndzi tsundzuka rungula ni ku anakanyisisa hi nhloko-mhaka ya kona. Masiku lawa hi khomekile evuton’wini lerova loko hi hlaya swi nga endleka hi nga ti xiyi tinhla tin’wana ta nkoka ni leti khutazaka.

M.A.S., Brazil

Rifu Xana I Makumu Ya Vutomi? (December 2007) Eka tin’hweti ta tsevu leti hundzeke mana wa mina u file eka mhangu yo chavisa. Swi ndzi chavelerile swinene loko ndzi hlaye xihloko lexi, lexi tiyiseke ntshembo wa mina wa leswaku ndzi ta tlhela ndzi n’wi vona loko ku pfuxiwa vafi. Ndza nkhensa swinene.

L.L.R., Brazil

Vantshwa Va Vutisa . . . Ha Yini Ndzi Fanele Ku Hanya Hi Milawu Ya Bibele? (November 2007) A a ndzi anakanya leswaku ntsendze loko ndzi nga tikhomi ku biha, a swi hoxanga ku gangisana. Kambe hi ku famba ka nkarhi a ndzi lava nkarhi lowu engetelekeke wo va ni jaha ra mina. Ndzi sungule ku va ni ku navela ko biha ka nyama. Ndzi nkhensa swinene leswi mi vulavuleke hi tidyondzo leti, leti humaka eBibeleni hi ndlela ya leswaku vantshwa lava nga riki na ntokoto swi va olovela ku ti twisisa.

E. F., Japani