Vumundzuku Lebyi Sirhelelekeke Ehansi Ka Mfumo Wa Xikwembu

KU NGA ri khale mivilelo ya hina malunghana ni vumundzuku yi ta hela, hikuva Xikwembu xi ta lawula pulanete ya Misava hi ku simeka hulumendhe ya xona n’wini, leyi vuriwaka Mfumo wa Xikwembu. Yesu Kreste a a anakanya hi vumundzuku byolebyo lebyinene loko a dyondzisa valandzeri vakwe leswaku va khongela va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:9, 10.

Mfumo wa Xikwembu a wu nge tirhisani ni varhangeri va tipolitiki. Ku ri na sweswo, wu ta herisa mimfumo hinkwayo ya vanhu, hilaha swi kombisiweke hakona eka vuprofeta bya Daniyele malunghana ni ‘masiku yo hetelela’ lawa hi hanyaka eka wona. (2 Timotiya 3:1) “Emasikwini ya tihosi teto Xikwembu xa le tilweni xi ta veka mfumo lowu wu nga ta ka wu nga lovisiwi. . . . Wu ta pfotlosa kutani wu herisa mimfumo leyi hinkwayo [ya vanhu], kambe wona wu ta tshama hilaha ku nga riki na makumu.” (Daniyele 2:44) Marito lawa a ma va chaveleli kumbe ku va nyika ntshembo vanhu lava rhandzaka ku fumiwa hi vanhu, kambe hinkwavo lava tsakisiwaka hi mhaka ya leswaku Xikwembu xi ta lawula hi Mfumo wa xona, ma va tshembisa leswinene.

Vumundzuku Lebyi Tsakisaka!

Loko Mfumo wa Xikwembu wu ta va se wu fuma emisaveni hinkwayo, vanhu lava fumiwaka hi wona a va nge avanyisiwi hi tipolitiki, rixaka, vukhongeri kumbe mindzilakano. Ku ri na sweswo, va ta vumba nhlengeletano ya le misaveni hinkwayo leyi hlanganisiwaka hi ntiyiso lowu vulavulaka hi Xikwembu ni hi rirhandzu ra xiviri. (Yohane 13:34, 35; 17:3, 17) Ina, ehansi ka Mfumo wolowo, “lowo lulama u ta hluka,” naswona “ku rhula ku ta andza ku fikela n’weti wu nga ha vi kona.”—Pisalema 72:7.

Mfumo wa Xikwembu wu ta tlhela wu endla leswaku vanhu lava yingisaka va va lava hetisekeke emianakanyweni ni le mirini, wu herisa mavabyi hinkwawo, ku xaniseka ni rifu. (Nhlavutelo 21:3, 4) Vuyelo byi ta va byihi? Pulanete ya hina hinkwayo yi ta va se yi ri paradeyisi kutani xikongomelo xa Xikwembu xo sungula lexi xi xi vuleke aEdeni xi ta va se xi hetisekile.a—Genesa 1:28.

Mahungu Lawa Ku Nga Wona Ntsena Lamanene

Loko a vula xikombiso xa “makumu ya mafambiselo ya swilo,” Yesu u katse ni mhaka yin’wana leyi nga ya nkoka. (Matewu 24:3-7) U te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.

Hi ku pfumelelana ni ku rhandza ka Xikwembu, hi 2007 kwalomu ka Timbhoni ta Yehovha leti endlaka timiliyoni ta nkombo ematikweni ya 236 ti chumayele rungula ra Mfumo eka vaakelani va tona, hi ntsako ti heta tiawara to tlula 1,4 wa tibiliyoni entirhweni lowu. Ha yini Timbhoni ti khorwiseka swinene hi switshembiso leswi kumekaka eBibeleni? Nhlamulo ya kona ya olova swinene. Hilaha xihloko lexi landzelaka xi hlamuselaka hakona, Xikwembu minkarhi hinkwayo xi vula ntiyiso.—Varhoma 3:4.

[Nhlamuselo ya le hansi]

[Marito lama tshahiweke exihlokweni lama nga eka tluka 7]

Bibele yi vula leswaku “ku rhula ku ta andza”