Vantshwa Va Vutisa

Xana Ndzi Nga Endla yini Leswaku Ndzi Tsakela Ku Gandzela Xikwembu?

Josh wa malembe ya 16 u tibadamele emubedweni wakwe. Mana wakwe u fika a yima enyangweni, a ku eka yena: “Joshua, pfuka! Wa swi tiva leswaku namuntlha i siku ra tidyondzo!” Endyangwini wa ka va Josh i Timbhoni ta Yehovha, naswona ku ya eminhlanganweni ya Vukreste i xiphemu xa vugandzeri bya ndyangu. Kambe masiku lawa Josh a a nga ha swi lavi ku ya kona.

U le ku gunguleni a ku: “Mhani, xana swo boha leswaku ndzi ya?”

Mana wakwe u ri: “Tshika ku gungula u ambala hi famba. A ndzi lavi ku tlhela ndzi fika minhlangano yi sungurile!” Wa hundzuluka a famba.

Josh wa n’unun’uta, hambileswi mana wakwe a nga si yaka ekule, “Mhani, lebyi i vukhongeri bya wena, naswona sweswo a swi vuli leswaku na mina i bya mina.” Wa swi tiva leswaku mana wakwe u n’wi twile, hikuva u vuye a yimanyana. Endzhaku ka sweswo u vuye a tifambela a nga n’wi hlamuli.

Josh u biwanyana hi ripfalo. Kahle-kahle a nga lavi ku twisa mana wakwe ku vava. Kambe hi hala tlhelo a nga lavi ku tisola. Yena wo fanela a . . . 

Josh u hefemulela ehenhla, kutani a pfuka a ambala. Kutani a tibyela leswi, “Ku nga ri khale ndzi ta tiendlela swiboho swa mina. A ndzi fani ni vanhu lavan’wana lava nga le Holweni ya Mfumo. Phela a ndzi swi lavi ku va Mukreste!”

XANA u tshama u titwa ku fana na Josh loyi ku vulavuriwaka hi yena laha? Xana minkarhi yin’wana loko van’wana va ri karhi va tsakela mintirho ya Vukreste wena wo yi endla ntsena hi ku va swi ku boha? Hi xikombiso:

◼ Xana ku dyondza Bibele u swi fanisa ni ntirho wa xikolo lowu u faneleke u wu endla ekaya?

◼ Xana wa chava ku ya entirhweni wo chumayela hi yindlu ni yindlu?

◼ Xana minkarhi yo tala wa phirheka loko u ri eminhlanganweni ya Vukreste?

Loko nhlamulo ya wena ku ri ina eka swivutiso leswi, u nga heli matimba. Loko wo cincanyana swo karhi, u nga dyondza ku tsakela ku tirhela Xikwembu. A hi voneni leswaku u nga swi endla njhani sweswo.

Ntlhontlho Wo Sungula: Ku Dyondza Bibele

Leswi endlaka swi nga olovi. Kumbexana u anakanya leswaku a wu munhu wo “rhandza ku hlaya.” U tivona u nga swi koti ku heta nkarhi wo leha u ri eku hlayeni, naswona swa ku tikela ku dzikisa mianakanyo ya wena eka leswi u swi hlayaka! Handle ka sweswo, swi nga endleka u tibyela leswaku u ni ntirho wo tala wa xikolo lowu u faneleke u wu endla.

Swivangelo swa ku va u dyondza Bibele. Bibele yi huhuteriwe hi Xikwembu naswona yi “pfuna ku dyondzisa ni ku pfuna vanhu ni ku va vuyisa endleleni ni ku va komba ndlela leyi va faneleke va hanya ha yona.” (2 Timotiya 3:16, Contemporary English Version) Ku dyondza Bibele ni ku anakanyisisa hi leswi u swi hlayaka swi nga ku pfuna leswaku u twisisa swilo hi ndlela yin’wana. Xiya yinhla leyi, a ku na nchumu xa nkoka lexi u nga xi kumaka handle ko tirha hi matimba. Loko u lava ku tlanga ntlango wo karhi kahle, u fanele u dyondza milawu ya kona u tlhela u titoloveta wona. Loko u lava ku va ni rihanyo lerinene u fanele u endla vutiolori. Loko u lava ku dyondza hi Muvumbi wa wena u fanele ku dyondza Rito ra Xikwembu.

Leswi vantshwa van’wana va swi vulaka. “Loko ndzi fika exikolweni xa le henhla a ndzi fanele ndzi endla swiboho swa nkoka. Vana va xikolo a va endla swilo hinkwaswo swo biha, kutani a ndzi fanele ndzi endla swiboho swo karhi: ‘Xana leswi hi leswi ndzi lavaka ku swi endla? Xana vatswari va mina va ndzi dyondzisa ntiyiso hakunene?’ A ndzi fanele ndzi tikumela swona hi ndzexe.”—Tshedza.

“Leswi a ndzi swi dyondza a ndzi swi tshemba leswaku i ntiyiso, kambe a ndzi fanele ndzi tikumisisela swona. A ndzi fanele ndzi gandzela Xikwembu hi ku va ndzi swi rhandza, ku nga ri hikwalaho ka leswi vatswari va mina va xi gandzelaka.”—Nelisa.

Leswi u nga swi endlaka. Tiendlele xiyimiso xa wena xa ku dyondza hi ku ya hi swiyimo ni swilaveko swa wena. Hlawula timhaka leti u nga ta ti dyondza. Xana u nga sungula kwihi? Ha yini u nga dyondzi Bibele ya wena hi vuenti naswona u kambisisa leswi u swi pfumelaka kumbexana u tirhisa buku yo tanihi leyi nge Xana Bibele Yi Dyondzisa Yini Hakunene?a

Goza leri u nga ri tekaka. Sungula hi ku languta tinhloko-mhaka ta le Bibeleni timbirhi kumbe tinharhu laha hansi leti u nga tsakelaka ku tiva swo tala ha tona kumbe loko u swi lava u titsalela tin’wana ta wena n’wini.

□ Xana Xikwembu xi kona?

□ Ndzi nga tiyiseka njhani leswaku vatsari va Bibele a va huhuteriwe hi Xikwembu?

□ Ha yini ndzi fanele ndzi pfumela leswaku swilo swi tumbuluxiwile ematshan’weni yo pfumela eka dyondzo ya leswaku swilo swi lo tiendlekela?

□ I yini Mfumo wa Xikwembu, naswona ndzi nga tiyiseka njhani mina ni van’wana leswaku wu kona?

□ Ndzi nga swi hlamusela njhani leswi ndzi swi pfumelaka hi xiyimo xa vafi?

□ Ha yini ndzi fanele ndzi khorwiseka leswaku ku ta va ni ku pfuxiwa ka lava feke?

□ Ndzi nga tiyiseka njhani leswaku hi byihi vukhongeri bya ntiyiso?

□․․․․

Ntlhontlho Wa Vumbirhi: Ku Chumayela

Leswi endlaka swi nga olovi. Swi nga ha ku chavisa ku vulavula ni van’wana hi Bibele kumbe ku hlangana ni loyi u nghenaka na yena xikolo loko u ri eku chumayeleni.

Swivangelo swa ku va u chumayela. Yesu u lerise vadyondzisiwa va yena a ku: “Mi ya endla . . . vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Kambe ku ni swivangelo swin’wana leswi hi endlaka hi chumayela. Etindhawini tin’wana minkambisiso yin’wana yi vula leswaku vantshwa vo tala va pfumela eka Xikwembu ni le Bibeleni. Kambe vantshwa volavo a va na wona ntshembo wa xiviri hi vumundzuku. Hi ku dyondza ka wena Bibele, u ta kuma rungula leri tintangha ta wena to tala ti nga le ku ri laveni!

Leswi tintangha ta wena tin’wana ti swi vulaka. “Mina ni munghana wa mina a hi lunghiselela swingheniso leswinene, naswona hi dyondze ndlela yo hlula ku kanetiwa ni ku endla maendzo yo vuyela. Loko ndzi hisekela ntirho wo chumayela, a wu ya wu ndzi tsakisa swinene.”—Nelisa.

“Makwerhu un’wana wa xisati la nga Mukreste u ndzi pfune ngopfu! U ndzi hundza hi malembe ya tsevu, naswona u tala ku famba na mina eku chumayeleni naswona minkarhi yin’wana hi fihlula swin’we. U ndzi kombe matsalwa lama khutazaka lama nga ndzi pfuna leswaku ndzi cinca ndlela leyi a ndzi anakanya ha yona. Sweswi ndzi tsakela ku pfuna vanhu vo tala hikwalaho ka xikombiso xa yena lexinene. U ndzi pfune ngopfu!”—Shontay.

Leswi u nga swi endlaka. Loko vatswari va wena va pfumela, kuma un’wana evandlheni loyi a nga nkulu eka wena loyi u nga fambaka na yena ensin’wini. (Mintirho 16:1-3) Bibele yi ri: “Nsimbi yi lotiwa hi nsimbi. Hi ndlela leyi fanaka munhu u lota xikandza xa un’wana.” (Swivuriso 27:17) U nga kuma mikateko yo tala loko u tolovelana ni vanhu lava se va kuleke lava nga ni ntokoto wo tala. Alexis wa malembe ya 19 u ri: “Swa olova swinene ku hanya ni vanhu lavakulu.”

Goza leri u nga ri tekaka. Laha hansi, tsala vito ra un’wana wa le vandlheni ra ka n’wina loyi a nga ku pfunaka loko u ya eku chumayeleni, ku engetela eka vatswari va wena.

․․․․․

Ntlhontlho Wa Vunharhu: Ku Ya Eminhlanganweni Ya Vukreste

Leswi endlaka swi nga olovi. Endzhaku ko tshama siku hinkwaro etlilasini, u nga titwa u nga swi lavi ku yingisela tinkulumo leti sekeriweke eBibeleni ku ringana awara yin’we kumbe timbirhi.

Xivangelo xa ku va u ya eminhlanganweni. Bibele yi khutaza Vakreste yi ku: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.”—Vaheveru 10:24, 25.

Leswi tintangha ta wena tin’wana ti swi vulaka. “Swa ku boha ku lunghiselela minhlangano ya vandlha. Minkarhi yin’wana wo fanela u tiboha leswaku u dyondza. Loko u lunghiselerile, u yi tsakela ngopfu minhlangano hikuva wa swi tiva leswi ku vulavuriwaka ha swona naswona na wena u ta swi kota ku hlanganyela.”—Elda.

“Ndzi sungule ku xiya leswaku loko ndzi hlamula eminhlanganweni, minhlangano yoleyo yi ndzi tsakisa ngopfu.”—Jessica.

Leswi u nga swi endlaka. Tinyike nkarhi wo lunghiselela ka ha ri ni nkarhi, naswona loko u swi kota u hlamula. Leswi swi ta ku pfuna leswaku na wena u katseka eka leswi endlekaka kwalaho.

Hi xikombiso: I yini leswi tsakisaka ngopfu, xana i ku hlalela ntlango eka thelevhixini kumbe i ku wu tlanga? A swi kanakanisi leswaku ku va mutlangi swi tsakisa ngopfu ku tlula ku va muhlaleri. Ha yini u nga endli leswi fanaka hi minhlangano ya Vukreste?

Goza leri u nga ri tekaka. Laha hansi, tsala leswaku u ta swi kota rini ku heta 30 wa timinete vhiki rin’wana ni rin’wana u lunghiselela minhlangano ya vandlha.

․․․․․

Vantshwa vo tala va vona ku hetiseka ka marito ya Pisalema 34:8, lama nge: “Nantswani mi vona leswaku Yehovha hi lonene.” A swi tsakisi ku byeriwa ntsena ndlela leyi swakudya swi nandzihaka ha yona. Swa antswa u tidyela swona u titwela hi wexe. Swi tano ni le mhakeni yo gandzela Xikwembu. Nantswa u tivonela hi wexe leswaku swi vuyerisa njhani ku gandzela Xikwembu. Bibele yi vula leswaku loyi a nga riki mutwi ntsena kambe a nga muendli wa ntirho “u ta tsaka eku wu endleni kakwe.”—Yakobo 1:25.

Swihloko swin’wana leswi nge “Vantshwa Va Vutisa” swi kumeka eka Web site leyi nge, www.watchtower.org/ype

[Nhlamuselo ya le hansi]

SWIVUTISO SWO ANAKANYISISA HA SWONA

◼ Ha yini ku gandzela Xikwembu ku nga ha tikombaka ku phirha eka n’wana wa kondlo-a-ndzi-dyi?

◼ Eka tindlela tinharhu leti hlamuseriweke exihlokweni lexi, hi yihi leyi u nga rhandzaka ku antswisa eka yona, naswona u ta swi endlisa ku yini sweswo?

[Xifaniso lexi nga eka tluka 20, 21]

Loko u lava ku va ni rihanyo lerinene u fanele u endla vutiolori. Loko u lava ku tiya hi tlhelo ra moya u fanele u dyondza Rito ra Xikwembu