Ndzima 38

Ndzi Nga Endla Yini Leswaku Ndzi Tsakela Ku Gandzela Xikwembu?

Josh la nga ni malembe ya 16 u badame emubedweni wa yena. Mana wa yena u yime enyangweni, ivi a ku eka yena: “Joshua, pfuka! Wa swi tiva leswaku namuntlha i siku ra minhlangano!” Endyangwini wa ka va Josh i Timbhoni ta Yehovha, naswona ku ya eminhlanganweni ya Vukreste i xiphemu xa nkarhi na nkarhi xa xiyimiso xa ndyangu wa ka vona. Kambe masiku lawa Josh a a nga ha swi lavi ku ya.

Wa gungula a ku: “Manana, xana swo boha leswaku ndzi ya?”

Mana wa yena u ri: “Tshika ku gungula u ambala hi famba. A ndzi lavi ku tlhela ndzi fika minhlangano yi sungurile!” Wa hundzuluka a famba.

Loko mana wa yena a ha ri ekusuhi, Josh u te: “Mhani, lebyi i vukhongeri bya wena, kambe sweswo a swi vuli leswaku na mina i bya mina.” Wa swi tiva leswaku mana wa yena u n’wi twile hikuva u vuye a yimanyana. Endzhaku ka sweswo u vuye a tifambela a nga n’wi hlamuli.

Josh u biwanyana hi ripfalo hikwalaho ka leswi a swi vuleke. Kahle-kahle a nga swi lavi ku twisa mana wa yena ku vava. Kambe hi hala tlhelo a nga swi lavi ku kombela ku rivaleriwa. Nchumu lowu a nga wu endlaka i ku . . .

Josh u hefemulela ehenhla, ivi a sungula ku ambala. Kutani a tibyela a ku: “Ku nga ri khale ndzi ta tiendlela xiboho xa mina. A ndzi fani ni vanhu lavan’wana lava nga le Holweni ya Mfumo. Phela a ndzi swi lavi ku va Mukreste!”

XANA u tshame u titwa ku fana na Josh loyi ku vulavuriweke ha yena laha? Xana minkarhi yin’wana loko van’wana va ri karhi va tsakela mintirho ya Vukreste wena wo yi endla ntsena hi leswi swi ku bohaka? Hi xikombiso:

● Xana ku dyondza Bibele u swi fanisa ni ntirho wun’wana wa xikolo lowu u faneleke u wu endla ekaya?

● Xana a wu swi tsakeli ku ya entirhweni wo chumayela hi yindlu ni yindlu?

● Xana minkarhi yo tala wa phirheka loko u ri eminhlanganweni ya Vukreste?

Loko nhlamulo ya wena ku ri ina, u nga heli matimba. U nga dyondza ku tsakela ku tirhela Xikwembu. A hi vone leswaku u nga swi endla njhani sweswo.

NTLHONTLHO WO SUNGULA Ku Dyondza Bibele

Leswi endlaka swi nga olovi. Kumbexana u anakanya leswaku a wu munhu la “rhandzaka ku hlaya.” U tivona u nga swi koti ku heta nkarhi wo leha u ri eku hlayeni, naswona swa ku tikela ku tshamiseka kutani u dzikisa mianakanyo ya wena eka leswi u swi hlayaka! Handle ka sweswo, swi nga endleka u tibyela leswaku u ni ntirho wo tala wa xikolo lowu u faneleke u wu endla.

Swivangelo swa ku va u dyondza Bibele. Bibele yi huhuteriwe hi Xikwembu naswona yi “pfuna ku dyondzisa ni ku pfuna vanhu ni ku va vuyisa endleleni ni ku va komba ndlela leyi va faneleke va hanya ha yona.” (2 Timotiya 3:16, Contemporary English Version) Ku dyondza Bibele ni ku anakanyisisa hi leswi u swi hlayaka swi nga ku pfuna leswaku u twisisa swilo hi ndlela yin’wana. Ntiyiso wa mhaka hi leswaku, a ku na nchumu xa nkoka lexi u nga xi kumaka loko u nga tirhi hi matimba. Loko u lava ku tlanga ntlango wo karhi kahle, u fanele u dyondza milawu ya kona u tlhela u titoloveta wona. Loko u lava ku va ni rihanyo lerinene u fanele u endla vutiolori. Hilaha ku fanaka, loko u lava ku dyondza hi Muvumbi wa wena u fanele ku dyondza Rito ra Xikwembu.

Leswi tintangha ta wena ti swi vulaka. “Loko ndzi fika esekondari a ndzi fanele ndzi endla swiboho swa nkoka. Vana va xikolo a va endla swilo hinkwaswo swo biha, kutani a ndzi fanele ndzi endla swiboho swo karhi: ‘Xana leswi hi leswi ndzi lavaka ku swi endla? Xana vatswari va mina va ndzi dyondzisa ntiyiso hakunene?’ A ndzi fanele ndzi tikumela swona hi ndzexe.”—Tshedza.

“Leswi ndzi swi dyondzeke a ndzi swi tshemba leswaku i ntiyiso, kambe a ndzi fanele ndzi titiyisekisa. A ndzi fanele ndzi gandzela Xikwembu hi ku va ndzi swi rhandza, ku nga ri hikwalaho ka leswi vatswari va mina va lavaka leswaku ndzi xi gandzela.”—Nelisa.

Leswi u nga swi endlaka. Tiendlele xiyimiso xa wena xa ku dyondza hi ku ya hi swiyimo ni swilaveko swa wena. Hlawula tinhloko-mhaka leti u nga ta ti dyondza. Xana u nga sungula kwihi? Ha yini u nga dyondzi Bibele ya wena hi vuenti naswona u kambisisa leswi u swi pfumelaka kumbexana u tirhisa buku yo tanihi leyi nge Xana Bibele Yi Dyondzisa Yini Hakunene?a

Ndlela leyi u nga sungulaka ha yona! Fungha hi ✔ etlhelo ka tinhloko-mhaka ta le Bibeleni timbirhi kumbe tinharhu laha hansi leti u nga tsakelaka ku tiva swo tala ha tona—kumbe loko u swi lava u titsalela tin’wana ta wena n’wini.

□ Xana Xikwembu xi kona?

□ Ndzi nga tiyiseka njhani leswaku vatsari va Bibele a va huhuteriwe hi Xikwembu?

□ Ha yini ndzi fanele ndzi pfumela leswaku swilo swi tumbuluxiwile ematshan’weni yo pfumela eka dyondzo ya leswaku swilo swi lo tiendlekela?

□ I yini Mfumo wa Xikwembu, naswona ndzi nga titiyisekisa njhani mina ni van’wana leswaku wu kona?

□ Ndzi nga swi hlamusela njhani leswi ndzi swi pfumelaka hi xiyimo xa vafi?

□ Ha yini ndzi fanele ndzi khorwiseka leswaku ku ta va ni ku pfuxiwa ka vafi?

□ Ndzi nga tiyiseka njhani leswaku hi byihi vukhongeri bya ntiyiso?

․․․․․

NTLHONTLHO WA VUMBIRHI Ku Chumayela

Leswi endlaka swi nga olovi. Ku vulavula ni van’wana hi Bibele—kumbe ku hlangana ni loyi u nghenaka na yena xikolo loko u ri eku chumayeleni—swi nga ha chavisa.

Swivangelo swa ku va u chumayela. Yesu u lerise valandzeri va yena a ku: “Mi ya endla . . . vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Kambe ku ni swivangelo swin’wana leswi hi endlaka hi chumayela. Minkambisiso yi kombisa leswaku etindhawini tin’wana vantshwa vo tala va pfumela eka Xikwembu ni le Bibeleni. Kambe vantshwa volavo a va na wona ntshembo wa xiviri hi vumundzuku. Hi ku dyondza ka wena Bibele, u ni rungula leri tintangha ta wena to tala ti nga le ku ri laveni naswona ti faneleke ti ri kuma! Loko u byela van’wana swilo leswi u pfumelaka eka swona, u ta titwa u antswa naswona xa nkoka swinene, u ta tsakisa mbilu ya Yehovha.—Swivuriso 27:11.

Leswi tintangha ta wena ti swi vulaka. “Mina ni munghana wa mina a hi lunghiselela swingheniso leswinene, naswona hi dyondze ndlela yo hlula ku kanetiwa ni ku endla maendzo yo vuyela. Loko ndzi hisekela ntirho wo chumayela, a wu ya wu ndzi tsakisa swinene.”—Nelisa.

“Makwerhu un’wana wa xisati la nga Mukreste u ndzi pfune ngopfu! U ndzi hundza hi malembe ya tsevu, naswona u tala ku famba na mina eku chumayeleni naswona minkarhi yin’wana hi fihlula swin’we. U ndzi kombe matsalwa lama khutazaka lama ndzi pfuneke leswaku ndzi cinca ndlela leyi a ndzi anakanya ha yona. Sweswi ndzi tsakela ku pfuna vanhu vo tala hikwalaho ka xikombiso xa yena lexinene. Ndza nkhensa swinene leswi a ndzi pfuneke!”—Shontay.

Leswi u nga swi endlaka. Loko vatswari va wena va pfumela, kuma munhu un’wana evandlheni loyi a nga nkulu eka wena loyi u nga fambaka na yena ensin’wini. (Mintirho 16:1-3) Bibele yi ri: “Nsimbi yi lotiwa hi nsimbi. Hi ndlela leyi fanaka munhu u lota xikandza xa un’wana.” (Swivuriso 27:17) U nga kuma mikateko yo tala loko u tolovelana ni vanhu lava se va kuleke lava nga ni ntokoto wo tala. Alexis wa malembe ya 19 u ri: “Swa olova swinene ku hanya ni vanhu lavakulu.”

Ndlela leyi u nga sungulaka ha yona! Laha hansi, tsala vito ra munhu un’wana wa le vandlheni ra ka n’wina loyi a nga ku pfunaka loko u ya eku chumayeleni ku engetela eka vatswari va wena.

․․․․․

NTLHONTLHO WA VUNHARHU Ku Ya eMinhlanganweni Ya Vukreste

Leswi endlaka swi nga olovi. Endzhaku ko tshama siku hinkwaro etlilasini, u nga titwa u nga swi lavi ku yingisela tinkulumo leti sekeriweke eBibeleni ku ringana awara yin’we kumbe ku tlula.

Xivangelo xa ku va u ya eminhlanganweni. Bibele yi khutaza Vakreste yi ku: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.”—Vaheveru 10:24, 25.

Leswi tintangha ta wena ti swi vulaka. “Swa boha ku lunghiselela minhlangano ya vandlha. Minkarhi yin’wana wo fanela u tiboha leswaku u dyondza. Loko u lunghiselerile, wa yi tsakela minhlangano hikuva wa swi tiva leswi ku vulavuriwaka ha swona naswona u nga hlamula.”—Elda.

“Hi nkarhi wun’wana, ndzi sungule ku xiya leswaku loko ndzi hlamula eminhlanganweni, minhlangano yoleyo yi ndzi tsakisa ngopfu.”—Jessica.

Leswi u nga swi endlaka. Tinyike nkarhi wo lunghiselela ka ha ri ni nkarhi, naswona loko u swi kota u hlamula. Leswi swi ta ku pfuna leswaku na wena u katseka eka leswi endlekaka kwalaho.

Hi xikombiso: I yini leswi tsakisaka ngopfu—xana i ku hlalela ntlango eka thelevhixini kumbe i ku wu tlanga? A swi kanakanisi leswaku ku va mutlangi swi tsakisa ngopfu ku tlula ku va muhlaleri. Ha yini u nga endli leswi fanaka hi minhlangano ya Vukreste?

Ndlela leyi u nga sungulaka ha yona! Laha hansi, tsala leswaku u ta swi kota rini ku heta 30 wa timinete vhiki rin’wana ni rin’wana u lunghiselela minhlangano ya vandlha.

․․․․․

Vantshwa vo tala va vona ku hetiseka ka marito ya Pisalema 34:8, lama nge: “Nantswani mi vona leswaku Yehovha hi lonene.” A swi tsakisi ku byeriwa ntsena ndlela leyi swakudya swi nandzihaka ha yona. Swa antswa u tidyela swona u titwela hi wexe! Swi tano ni le mhakeni yo gandzela Xikwembu. Nantswa u tivonela hi wexe leswaku swi vuyerisa njhani ku endla mintirho ya moya. Bibele yi vula leswaku munhu loyi a nga riki mutwi ntsena kambe a nga muendli wa ntirho “u ta tsaka eku wu endleni kakwe.”—Yakobo 1:25.

[Nhlamuselo ya le hansi]

MATSALWA

“Mi hundzuka hi ku hundzula mianakanyo ya n’wina, leswaku mi ta tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.”—Varhoma 12:2.

XITSUNDZUXO

Tikumele buku yo tsalela tinhla eka yona, naswona u sungula ku tsala tinhla-nkulu loko u ri eminhlanganweni ya Vukreste. Nkarhi wu ta famba hi xihatla naswona swi ta ku olovela ku dyondza!

XANA A WU SWI TIVA LESWAKU . . . ?

A swi bihanga ku kambisisa swilo leswi u pfumelaka eka swona. Entiyisweni, ku vutisa swivutiso ni ku endla ndzavisiso i ndlela leyinene yo kumisisa loko swilo leswi u swi pfumelaka hi Xikwembu ku ri ntiyiso hakunene.—Mintirho 17:11.

LESWI NDZI TIYIMISELEKE KU SWI ENDLA!

Ndzi ta veka timinete ta ․․․․․ siku ni siku leswaku ndzi hlaya Bibele naswona ndzi ta heta timinete ta ․․․․․ vhiki ni vhiki ndzi ri karhi ndzi lunghiselela minhlangano ya Vukreste.

Leswaku ndzi yingiserisisa eminhlanganweni ya Vukreste, ndzi ta ․․․․․

Leswi ndzi lavaka ku vutisa (va-)mutswari wa mina hi mhaka leyi hi leswi ․․․․․

U NGA KU YINI?

● Ha yini mintirho ya moya yi nga ha tikombaka yi phirha eka vantshwa?

● Eka mintlhontlho yinharhu leyi hlamuseriweke exihlokweni lexi, hi wihi lowu u nga rhandzaka ku antswisa eka wona?

[Marito lama tshahiweke exihlokweni lama nga eka tluka 278]

“Vukhongeri lebyi ndzi nga eka byona a hi bya vatswari va mina ntsena kambe i bya mina. Yehovha i Xikwembu xa mina naswona a ndzi lavi ku endla nchumu lowu nga ta onha vuxaka bya mina na yena.”—Samantha

[Bokisi/Swifaniso leswi nga eka matluka 280, 281]

Va Tivekele Tipakani

Bibele yi ri: “A mi swi tivi leswaku vutomi bya n’wina byi ta va yini mundzuku.” (Yakobo 4:14) Minkarhi yin’wana, rifu ri fika ri nga languteriwanga naswona van’wana va fa va ha ri vatsongo. Loko u ri karhi u hlaya mintokoto ya Catrina na Kyle, xiya ndlela leyi va tiendleleke vito lerinene na Yehovha Xikwembu ha yona eka vutomi bya vona byo koma hi ku tivekela ni ku fikelela tipakani ta vona ta moya.—Eklesiasta 7:1.

Catrina u fe loko a ri ni malembe ya 18, kambe loko a ha ri ni malembe ya 13 a a titsalele tipakani leti a a lava ku ti fikelela. Tipakani ta yena a ti katsa ku nghenela ntirho wa nkarhi hinkwawo, ku tirha laha ku nga ni xilaveko xa vadyondzisi va Bibele ni ku tirha ni tata wa yena eka ntirho wo aka Tiholo ta Mfumo. U tsale a ku: “Ndzi nyiketele vutomi bya mina eka Yehovha Xikwembu!” Xikongomelo xa Catrina a ku ri ku “hanya hi ku pfumelelana ni milawu ya Yehovha, hi ndlela leyi a yi ta n’wi tsakisa.” Enkosini wa yena, Catrina u hlamuseriwe tanihi “nhwanyana wo saseka loyi a a tiyimisele ku endla ku rhandza ka Yehovha vutomi bya yena hinkwabyo.”

Ku sukela loko Kyle a ha ri ntsongo, u dyondzisiwe ku tivekela tipakani. Endzhaku ka loko a file eka mhangu yo chavisa ya movha loko a ri ni malembe ya 20, maxaka ya yena ma kume “buku ya tipakani” leyi mana wa yena a a n’wi pfune ku yi endla loko a ha ri ni malembe ya mune ntsena. Tipakani ta yena a ti katsa ku khuvuriwa, ku nyikela tinkulumo eHolweni ya Mfumo ni ku ya tirha eyindlu-nkulu ya Timbhoni ta Yehovha, laha a a ta pfuneta eku kandziyiseni ka minkandziyiso leyi a yi ta pfuna vanhu leswaku va dyondza hi Xikwembu. Endzhaku ka loko mana wa yena a kambisise buku ya tipakani ya Kyle, leyi a yi endliwe khale swinene, u te: “Tipakani ta yena hinkwato u ti fikelerile.”

Hi tihi tipakani leti u nga tivekela tona? A wu swi tivi leswaku vutomi bya wena byi ta va byi ri njhani mundzuku. Hikwalaho, tirhisa siku rin’wana ni rin’wana u endla leswi u nga kotaka ku swi endla. Ku fana na Catrina na Kyle, tirhisa nkarhi wa wena hi ndlela leyi nga ta ku vuyerisa swinene. Tekelela muapostola Pawulo, loyi loko se a ri kusuhi ni ku fa a nga te: “Ndzi lwe nyimpi leyinene, ndzi tsutsume pfhumba ndzi kondza ndzi heta, ndzi hlayise ripfumelo.” (2 Timotiya 4:7) Ndzima leyi landzelaka yi ta ku pfuna leswaku u endla tano!

[Xifaniso lexi nga eka matluka 274, 275]

Loko u lava ku va ni rihanyo lerinene u fanele u endla vutiolori. Loko u lava ku tiya hi tlhelo ra moya u fanele u dyondza Rito ra Xikwembu