Swakudya Swo Xawula Swa Le Thailand

HI MUTSARI WA XALAMUKA! LE MALAYSIA

LOKO u ri karhi u famba eswitarateni leswi nga ni mphesamphesa swa le Bangkok, eThailand, u nga ha kokiwa hi nun’hwelo wa swakudya swo xawula lerova u lava ku ya lomu swi nga kona. Ku ni vanhu lava swekaka swakudya swa le Thailand eswitarateni. Endzhaku ko twa ku nun’hwela loku ka swakudya ni ku vona ndlela leyi swi kokaka mahlo ha yona, ku va se ku lo sala nchumu wun’we ntsena, ku nga ku phema u yisa enon’wini.

Lexi endlaka leswaku swakudya swa tiko leri swi nandziha hi leswi swi cheriwaka swinandzihisi swo hambana-hambana swa mintsembyana, timitsu, matluka ni tindzoho leti khusiweke. Leswi swi endla leswaku swakudya swa kona swi twala swi tsokombela, swi dzunga, swi ri ni munyu ni ku bava, naswona swi nun’hwela lerova u nga swi koti ku hundza u nga swi dyanga. Swi tise ku yini leswaku eThailand ku swekiwa hi ndlela yoleyo leyi nga tolovelekangiki? Mhaka ya kona yi sungule khale.

Mixaka Ya Swakudya Swa Le Matikweni Ya Le Handle

Tiko ra Thailand ri kumeka emahambanweni ya tindlela ya matiko ya le Asia. Eka malembe-xidzana yo tala lama hundzeke Machayina, Malaotia, Macambodia, Maindonesia, vanhu va le Yuropa ni van’wana vo tala va hetelele va tshama eThailand. Vanhu lava hinkwavo va te ni swakudya swa le matikweni ya rikwavo, naswona vanhu va le Thailand va yi toloverile minantswo ni minun’hwelo ya swakudya swoleswo swo hambana-hambana.

Khale ka khaleni, Maindiya lama tifamba-fambelaka ma kombe vanhu va le Thailand ndlela yo sweka va chela ni kheri. Hi lembe-xidzana ra vu-16, Maputukezi ma te ni biriviri kumbexana ni matamatisi. Namuntlha loko ku swekiwa swakudya swa le Thailand ku tirhisiwa swilo swo hambana-hambana, kambe swakudya swo tala swa kwalaho swi katsa biriviri ra xitshopana, ra rihlaza ni ro tshwuka ivi swi cheriwa na kheri ya mihlovo yoleyo. Ku hlanganisiwa ka kheri leyi ni biriviri swi endla leswaku swakudya swa le Thailand swi twala swi nandziha ku fana ni swakudya swa le matikweni ya le Vuxeni.

Ku Dya Swo Hambana-Hambana Hi Nkarhi Wun’we

Swakudya swa le Thailand swi katsa swakudya swo hambana-hambana ku nga murhu, saladi, xiculu lexi pfanganisiwaka ni nyama ni sopo. Rhayisi yo basa leyi hisaka yi tshama yi ri kona loko ku dyiwa. Kutani endzhaku ka sweswo ku dyiwa switshongo leswi katsaka swiwitsi leswi pfanganisiweke ni chukela ni mandza. Khokhonati ni mati ya kona na swona swa tirhisiwa loko ku endliwa switshongo swo tsokombela swa le Thailand.

Kwihi ni kwihi swakudya leswinene hi leswi swekiweke hi swilo leswi nga hundzeriwangiki hi nkarhi, naswona swilo sweswo swi kumeka hi ku olova le Thailand. Emadorobeni vanhu va xavisa mihandzu etimakete, matsavu, tinhlampfi ni swinandzihisi swo tanihi byanyi lebyi nun’hwelaka ku fana ni swiri, khoriyanda, xinyalana, jinja, kumini ni swin’wana. Etimakete to tano ku xavisiwa ni biriviri ro bava ngopfu ni xikwavava ku nga swin’wana swa leswi va swi tirhisaka ngopfu eswakudyeni swa vona.

Ku nga khathariseki leswaku u lava ku endzela eThailand kumbe u lava ku ringeta maswekelo ya kona ekaya, ringeta ku sweka tom yam goong, ku nga sopo leyi pfanganisiweke ni hanti ra le lwandle ku nga swakudya swo hlawuleka swa le Thailand. Swakudya swin’wana leswi u nga swi ringetaka i saladi ya popo leyi nga ni swinandzihisi, makaroni lama pfanganisiwaka ni nyama ya huku leyi katingiweke kumbe ya sekwa, nyama ya nguluve leyi tsemeleriweke kumbe nhlampfi leyi hoxiweke eka swinandzihisi. Loko ku swekiwa ma ho, ku nga rito leri vulaka “tihanci leti tsutsumaka,” ku hlanganisiwa nyama ya nguluve, mahanti ni timanga swi hoxiwa endzeni ka xihenga ivi swi sasekisiwa hi biriviri ro tshwuka ni matluka ya khoriyanda. Kutani u nga hetelela hi ku dya switshongo leswi endliweke hi rhayisi leyi pfanganisiweke ni mati ya khokhonati ni timango.

Hi yihi ndlela leyinene yo dya swakudya swa le Thailand? Etindhawini tin’wana etikweni rero, rhayisi leyi swekiweke yi wupfa ngopfu wa yi nusa hi tintiho ta wena ivi u yi vumba yi va swibolwana leswaku u kota ku xeva esopeni ivi u dya. Loko u dya makaroni u nga ha tirhisa swimhandzana swo fana ni leswi tirhisiwaka ematikweni ya le Asia. Kambe loko swi ku tsandza, u nga tirhisa foroko ni xipunu.

Xana swakudya swa le Thailand se swi ku phomisa marha? Swakudya leswi, leswi kokaka mahlo swa le tikweni leri ro saseka ra le Asia swi nga ku endla u dya swakudya swo hambana-hambana leswi a wu nga si tshama u swi dya, ku nga swakudya leswi swo nandziha swa le matikweni ya le Vuxeni.

[Swifaniso leswi nga eka tluka 23]

1 Sopo leyi vitaniwaka tom yam goong

2 Saladi ya makaroni lama pfanganisiweke ni nyama leyi tsemeleriweke ya nguluve ni mahanti

3 Saladi ya popo leyi nga ni swinandzihisi

4 Ma ho

5 Rhayisi leyi swekiweke yi wupfa ngopfu leyi pfanganisiweke ni mati ya khokhonati ni timango