Langutelo Ra Bibele

Xana Xikwembu Xi Ni Miri Wa Muxaka Muni?

BIBELE yi ri: “Xikwembu i Moya, naswona lava va xi gandzelaka va fanele ku gandzela hi moya ni ntiyiso.” Marito lawa ma paluxa ntiyiso wa xisekelo mayelana ni xivumbeko xa Xikwembu—Xikwembu i moya! (Yohane 4:19-24) Hambiswiritano, eBibeleni xi hlamuseriwa tanihi munhu. Vito ra xona i Yehovha.—Pisalema 83:18.

Vahlayi van’wana va Bibele va vule leswaku mhaka ya xivumbeko xa Xikwembu ya va pfilunganya. Leswi Xikwembu xi nga moya lowu nga vonakiki, ku nga ri munhu wa nyama, ha yini ku ri ni tindzimana to tala eBibeleni leti vulavulaka hi Xikwembu onge hiloko xi ri ni matihlo, tindleve, nhompfu, mbilu, mavoko, swandla, tintiho ni milenge?a Van’wana va nga ha gimeta hi leswaku Xikwembu xi ni miri wo fana ni wa munhu wa nyama hikuva Bibele yi vula leswaku munhu u vumbiwe hi xifaniso xa xona. Ku kambisisa hi vuenti leswi Bibele yi swi vulaka swi nga susa ku pfilunganyeka koloko.—Genesa 1:26.

Ha Yini Xikwembu Xi Hlamuseriwa Ku Fana Na Vanhu?

Leswaku ku pfuniwa vanhu leswaku va twisisa xivumbeko xa Xikwembu, vatsari va Bibele va huhuteriwe hi Xikwembu leswaku va hlamusela Lowa Matimba Hinkwawo tanihi loyi a fanaka ni vanhu. Xikongomelo xa kona a ku ri ku endla leswaku vanhu va twisisa xivumbeko xa Xikwembu na vumunhu bya xona. Leswi a swi vuli swona leswaku hi fanele hi teka tinhlamuselo leti ti ri ta xiviri, tanihi leswi hi nga swi tekiki hi ndlela ya xiviri loko Bibele yi vulavula hi Xikwembu yi ku i “Ribye,” i “dyambu,” kumbe i “xitlhangu.”—Deteronoma 32:4; Pisalema 84:11.

Hilaha ku fanaka, leswaku yi hlamusela mhaka ya leswaku vanhu va ni timfanelo leti fanaka ni ta Yehovha hi ndlela yo karhi, Bibele yi vula leswaku vanhu va vumbiwe hi xifaniso xa Xikwembu. Handle ko kanakana, a swi vuli swona leswaku vanhu va ni miri wa moya kumbe leswaku Xikwembu xi ni miri wo fana ni wa vanhu va nyama.

Xana Xikwembu I Wanuna Kumbe I Wansati?

Tanihi leswi ku hlamuseriwa ka Xikwembu tanihi munhu wa nyama swi nga fanelangiki swi tekiwa hi ndlela ya xiviri, leswi Xikwembu xi hlamuseriwaka tanihi wanuna a swi fanelanga swi tekiwa hi ndlela ya xiviri. Ku hlamuseriwa ka leswaku munhu i wa xinuna kumbe i wa xisati swi tirhisiwa hi vanhu va nyama ntsena naswona i nchumu lowu kombaka leswaku vanhu a va nge pfuki va kote ku byi hlamusela hi ku helela vukulukumba ni vumunhu bya Xikwembu xa Matimba Hinkwawo, Yehovha.

Loko Bibele yi tirhisa rito leri nge “Tatana” yi hi pfuna ku twisisa leswaku Muvumbi wa hina a nga fanisiwa ni tatana la nga ni rirhandzu, la sirhelelaka ni la khathalaka. (Matewu 6:9) Leswi a swi vuli swona leswaku hi fanele hi teka Xikwembu kumbe swivumbiwa leswin’wana swa moya swa le tilweni tanihi vavanuna kumbe vavasati. Swivumbiwa swa le tilweni a swi na swona swihlawulekisi swa rimbewu. Lexi tsakisaka, Bibele yi kombisa leswaku lava vitaniwaka leswaku va ya va vadyandzhaka na Kreste eMfun’weni wakwe wa le tilweni, loko va kwetsimisiwa va va vana va Xikwembu va moya, a va languteli ku tshama va ri va rimbewu leri a va ri na rona loko va ha ri vanhu va nyama. Muapostola Pawulo u va tsundzuxe leswaku “a ku na wanuna kumbe wansati” eka swikhundla swa vona loko va kwetsimisiwa va va vana va Xikwembu va moya. Nakambe hi ndlela yo fanekisela va hlamuseriwa tanihi “mutekiwa” wa Xinyimpfana, Yesu Kreste. Hinkwaswo leswi swi kombisa leswaku ndlela leyi swihlawulekisi swa vanhu va nyama swi tirhisiweke ha yona ku hlamusela Xikwembu, swin’we ni N’wana wa xona Yesu la tswariweke a ri swakwe ni swivumbiwa leswin’wana swa moya, a yi fanelanga yi tekiwa yi ri ya xiviri.—Vagalatiya 3:26, 28; Nhlavutelo 21:9; 1 Yohane 3:1, 2.

Leswi a va wu twisisa kahle ntirho wa wanuna, vatsari va Bibele va tirhise xihlawulekisi xexo xa wanuna loko va vulavula hi Xikwembu. Vatsari va Bibele a va swi tiva leswaku wanuna loyi a endlaka ntirho wakwe hi ku landza milawu ya Xikwembu a a ta n’wi fanekisela kahle Yehovha la nga ni rirhandzu naswona a khathalaka hi vana vakwe va laha misaveni ku kota tatana.—Malakiya 3:17; Matewu 5:45; Luka 11:11-13.

Mfanelo Leyikulu Ya Xikwembu

Hambileswi Hosi leyi Lawulaka yi nga moya, a yi le kule, a yi tumbelanga naswona swa koteka ku vulavula na yona. Leswi Xikwembu xi nga moya a swi va siveli vanhu va timbilu letinene leswaku va dyondza hi rirhandzu ra xona, matimba ya xona, vutlhari ni vululami bya xona leswi hlamuselaka leswaku i munhu wa muxaka muni naswona vumunhu bya xona bya vonaka eka ntumbuluko wa xona.—Varhoma 1:19-21.

Hambiswiritano, xivumbeko xa Xikwembu xi nga katsakanyiwa eka mfanelo ya xona leyikulu ku nga rirhandzu. Rirhandzu ra xona ra hlamarisa lerova ku vuriwa leswaku xona i rirhandzu. (1 Yohane 4:8) Mfanelo leyi yi katsa timfanelo ta xona letin’wana to tanihi tintswalo, ku rivalela ni ku lehisa mbilu. (Eksoda 34:6; Pisalema 103:8-14; Esaya 55:7; Varhoma 5:8) Hakunene Yehovha i Xikwembu xa rirhandzu lexi hi rhambaka leswaku hi tshinela eka xona.—Yohane 4:23.

[Nhlamuselo ya le hansi]

XANA U TSHAME U TIVUTISA?

◼ Vito ra Xikwembu i mani?—Pisalema 83:18.

◼ Hi nga ti vona kwihi timfanelo ta Xikwembu?—Varhoma 1:19-21.

◼ Hi yihi mfanelo leyikulu ya Xikwembu?—1 Yohane 4:8.