Xitimela Xo Pfumala Mavhilwa — Watchtower LAYIBURARI YA LE KA WEB SITE

Xitimela Xo Pfumala Mavhilwa

HI MUTSARI WA XALAMUKA! LE HONG KONG

NILOKO va nga si khandziya xitimela lexintshwa lexi tsutsumaka hi rivilo lerikulu xa le Shanghai, eChayina, vakhandziyi va swi xiyile leswaku va ta va va famba hi xitimela lexi nga tolovelekangiki. Vakhandziyi va ya va vona ndlela leyi xitimela lexi xi hlawulekeke ha yona loko xitimela xi sungula ku famba xi miyerile exitichini xa xona xa manguva lawa ivi xi tsutsuma hi rivilo lerikulu xi famba tikhilomitara to tlula 430 hi awara, leswi xi endlaka xitimela lexi tsutsumaka swinene emisaveni hinkwayo lexi nghenisaka mali. Loko xi ya eRivaleni ra Swihaha-mpfhuka ra Pudong xi famba tikhilomitara ta 30 hi timinete ta nhungu ntsena. Kambe ku ni nchumu wo hlawuleka swinene eka xitimela lexi—xi hava mavhilwa!

Xitimela lexi xa le Shanghai-Pudong hi xona ntsena lexi tirhisaka xiporo xa maginete eka switimela hinkwaswo emisaveni hinkwayo leswi nghenisaka mali. Ematshan’weni yo famba hi mavhilwa ya nsimbi, xitimela lexi xi famba hi maginete. Nakambe ematshan’weni ya leswaku xi va ni muchayeri endzeni ka xona, xi ni michini ya thekinoloji leyi minkarhi hinkwayo yi kambelaka lomu xi fambaka kona ni ku rhumela rungula eka vakongomisi va xona lava nga exitichini lexikulu laha va xi lawulaka va ri kona. Exitichini xexo, vakongomisi lava pfunetiwaka hi tikhompyuta va lawula ndlela leyi xitimela lexi xi fambaka ha yona.

Ku Hambana Ka Xitimela Lexi Fambaka Hi Maginete Ni Lexi Fambaka eXiporweni Xa Ntolovelo

Ku endliwa ka xitimela lexi xo hlawuleka swin’we ni ndhawu leyi xi fambaka eka yona swi vange mintlhontlho yo tala. Hi xikombiso, ndhawu leyi nga kona exikarhi ka xitimela lexi fambaka ni ndhawu leyi xi fambaka eka yona i yitsongo. Hikwalaho, leswi misava ya le Shanghai yi olovaka, vanjhiniyara va boheke ku katsa ni swilo swo hlawuleka endhawini leyi xitimela lexi xi fambaka eka yona, leswi nga lulamisiwaka hikwalaho ka misava leyi mbombomelaka hakatsongo-tsongo. Nakambe a va fanele va tsundzuka leswaku tiphuphu leti endliweke hi semendhe ta gombonyoka, ku katsa ni ku cinca-cinca ka xivumbeko xa tona hikwalaho ka maxelo yo hisa ni yo titimela.

Hambiswiritano, thekinoloji ya xitimela lexi fambaka hi maginete ya pfuna hi tindlela to tala. Hi xikombiso, a xi bi pongo loko xi famba naswona a xi humesi musi lowu thyakeke lowu nga ni khombo. Ndhawu leyi xi fambaka eka yona ni swilo leswi xi swi tirhisaka a swi tshameli ku lunghisiwa. Naswona leswi xi tirhisiwaka ku tleketla vanhu, a xi tirhisi gezi ro tala naswona xi rhwala vanhu vo tala ku tlula lava rhwariwaka hi movha na hi xihaha-mpfhuka. Entiyisweni gezi leri xitimela lexi xi fambaka ha rona i ritsongo eka leri xi ri tirhisaka eka fambiselo ra xona ra swiberisa-moya! Ku engetela kwalaho, xitimela lexi xi kota ku khandziya swiganga leswikulu naswona xi kota ku jika swinene ku tlula leswi fambaka hi mavhilwa, kutani a ku na xilaveko xa ku cinca ndhawu leyi xi fambaka eka yona.

Tanihi leswi xi pfunaka hakunene, swi nga tikomba swi hlamarisa leswaku ha yini ku nga endliwanga tindhawu to tala laha xitimela lexi xi nga fambaka kona. Xiphiqo xin’wana hileswi swi durhaka ku endla tindlela ta xona. Entiyisweni, valawuri va le Chayina va endle xiboho xo yimanyana hi ku endla ndhawu leyi xitimela xa maginete xi nga ta famba eka yona exikarhi ka Shanghai na Beijing hikuva ku yi aka swi ta koxa mali ya xiporo xa xitimela lexi tolovelekeke lexi nga ni rivilo lerikulu, hilaha ku phindhiweke kambirhi. Nakambe ndhawu leyi xitimela xa maginete xi nga ta famba eka yona a yi khomani ni swiporo swa switimela leswi nga kona le Chayina.

Endhawini leyi xitimela xa maginete xa le Shanghai xi fambaka eka yona ku tirhisiwe thekinoloji ya le Jarimani naswona ka ha endliwa vulavisisi bya xitimela lexi le Jarimani, Japani ni le matikweni man’wana. Hi December 2003, xitimela xa maginete xa le Japani a xi tsutsuma tikhilomitara ta 581 hi awara, ku nga rivilo lerikulu. Enkarhini wa sweswi xitimela xa le Shanghai a xi fani ni leswin’wana.

Loko xitimela xa maginete xi suka le Pudong loko xi tlhelela eShanghai, vakhandziyi va honolela swilo swo komba rivilo leswi nga etorokisini ha rin’we va lava ku vona rivilo lerikulu leri kombisiwaka eka wona. Hakunene, vakhandziyi vo tala loko va xi khandziya ro sungula a va swi koti ku vona lomu xitimela xi hundzaka kona, kutani va tlhela va teka riendzo rin’wana va famba hi xona. Loko va ri karhi va vona tindhawu leti xi hundzaka eka tona ti hundza hi ku hatlisa swinene, va swi twisisa kahle leswaku ha yini xitimela lexi xi vitaniwa “xihaha-mpfhuka.”

[Bokisi/Tidayagramu leti nga eka tluka 24]

XANA XITIMELA XA MAGINETE XI FAMBISA KU YINI?

Swilo swa fambiselo ra elektroniki leri lawulaka timaginete (1) leswi namarhetiweke eka tinsimbi leti nga ehansi ka torokisi rin’wana ni rin’wana ra xitimela swin’we ni timaginete leti nga laha xitimela lexi xi fambaka kona (2) swi tlakula xitimela kukondza timaginete letimbirhi ti hambana hi kwalomu ka sentimitara yin’we. Timaginete letin’wana (3) ti kongomisa xitimela endhawini leyi xi fambaka eka yona. Tintambu (4) leti nga laha xitimela lexi xi fambaka kona ti humesa matimba ya maginete lama endlaka leswaku xitimela xi kota ku famba.

Leswaku ku hlayisiwa gezi, xitichi xo lawula xitimela xi rhumela gezi eka xiyenge xo karhi xa laha xitimela lexi xi nga ta hundza eka xona (5) ntsena loko xitimela xi hundza hi le ka xiyenge xexo. Ku rhumeriwa gezi ro tala etindhawini leti xitimela xi faneleke xi tsutsuma hi rivilo lerikulu kumbe xi khandziya swiganga. Loko xitimela xi fanele xi hunguta rivilo kumbe xi ya eka tlhelo lerin’wana, matimba ya maginete ya tintambu ta laha xi fambaka kona ma tlheriseriwa endzhaku.

XANA XI HLAYISEKILE?

Hambileswi xitimela lexa maginete xi fambaka hi rivilo lerikulu swinene, tinsimbi ta xona leti nga hala hansi (6) ti khomelela laha xi fambaka kona ti endla leswaku xi nga vi ekhombyeni ra ku hambuka. Mabandhi ya vuhlayiseki a ma laveki, naswona vakhandziyi va famba-famba hi ku ntshunxeka hambiloko xitimela xi famba hi rivilo leri tolovelekeke. Loko gezi ro tshuka ri famba, tibiriki to hlawuleka leti tirhaka hi tibetiri leti nga kona exitimeleni, ti humesa matimba ya maginete lama hungutaka rivilo ra xitimela kukondza xi famba tikhilomitara ta khume hi awara. Kutani xitimela xi hunguta rivilo kukondza xi yima.

Xana timaginete ta xitimela leti nga ni matimba lamakulu ti ni khombo—hi xikombiso eka vakhandziyi lava nga ni michini leyi pfunetaka ku ba ka mbilu? Vuyelo bya nkambisiso lowu endliweke byi kombise leswaku a ku na khombo. Entiyisweni, matimba ya maginete ya le handle ma tluriwa hi lawa ma nga kona eka switimela swin’wana leswi nga ni mavhilwa.

[Swifaniso leswi nga eka tluka 24, 25]

Xitimela xi ri karhi xi famba tikhilomitara to tlula 425 hi awara!

[Laha Xifaniso Xi Humaka Kona eka tluka 24]