Langutelo Ra Bibele
Xana Vumundzuku Bya Wena Byi Kunguhatiwile?
Vanhu vo tala va tshemba leswaku vutomi ni vumundzuku bya vona byi kunguhatiwile hi matimba lama tlakukeke. Va vona onge ku suka embelekweni ku ya fika eku feni hinkwerhu hi hanya hi ku landza leswi Xikwembu xi swi kunguhateke. Va ri, ‘Phela, Xikwembu xi ni matimba hinkwawo naswona xi tiva swilo hinkwaswo, hikwalaho xi fanele xi tiva vuxokoxoko hinkwabyo mayelana ni swilo swa nkarhi lowu hundzeke, swa sweswi, ni leswi nga ta humelela enkarhini lowu taka.’
U SWI vonisa ku yini? Xana Xikwembu xi kunguhata vutomi bya hina ni ndlela leyi vumundzuku bya hina byi faneleke byi va ha yona? Hi marito man’wana, xana hi ni mfanelo yo hlawula leswi hi swi lavaka kumbe a hi na yona? Xana Bibele yi ri yini?
Xana Xikwembu Xi Tiva Swilo Hinkwaswo Ka Ha Ri eMahlweni Kumbe Xi Hlawule Ku Tiva Swo Karhi?
Bibele yi swi veka erivaleni leswaku Xikwembu xi tiva swilo ka ha ri emahlweni. Esaya 46:10 yi ri, xi tiva “ka ha ri eku sunguleni leswi nga ta humelela emakumu.” Xi kale xi tirhisa vanhu va nyama leswaku va tsala vuprofeta byo tala. (2 Petro 1:21) Ku engetela kwalaho, vuprofeta byebyo bya hetiseka minkarhi hinkwayo hikuva Xikwembu xi ni vutlhari ni matimba ya ku byi hetisisa hi ku hetiseka. Hikwalaho, a xi tivi swilo ka ha ri emahlweni ntsena, kambe xi tlhela xi profeta swiendlakalo nkarhi wun’wana ni wun’wana lowu xi hlawulaka ku endla tano. Hambiswiritano, xana Xikwembu xi profeta vumundzuku bya munhu un’wana ni un’wana kumbe hambi ku ri nhlayo ya lava nga ta ponisiwa? Bibele a yi vuli tano.
Bibele yi dyondzisa leswaku Xikwembu xa hlawula swilo leswi xi lavaka ku swi tiva ka ha ri emahlweni. Hi xikombiso, Xikwembu xi profete leswaku “ntshungu lowukulu” wa vanhu vo lulama wu ta pona loko ku lovisiwa vanhu vo homboloka emakumu ya mafambiselo lawa ya swilo. (Nhlavutelo 7:9, 14) Kambe, xiya leswaku Xikwembu a xi vulanga nhlayo leyi kongomeke ya ntshungu wolowo lowukulu. Ha yini? Hikuva a xi kunguhateli vanhu. Xikwembu xi fana ni tatana wa ndyangu lowukulu la nga ni rirhandzu. Xa swi tiva leswaku van’wana va vana va xona na vona va ta xi rhandza kambe a xi yi kunguhati nhlayo ya vona.
Ringanisa ndlela leyi Xikwembu xi byi tirhisaka ha yona vutivi bya xona byo tiva swilo ka ha ri emahlweni ni ndlela leyi xi tirhisaka matimba ya xona ha yona. Leswi xi nga Lowa Matimba Hinkwawo, Xikwembu xi ni matimba hinkwawo. (Pisalema 91:1; Esaya 40:26, 28) Kambe xana xi tirhisa matimba ya xona hi ndlela leyi nga lawulekiki? E-e. Hi xikombiso, xi hlawule ku nga lovisi Babilona, nala wa Vaisrayele va khale, ku kondza ku fika nkarhi lowu faneleke. Xikwembu xi te: “Ndzi hambete ndzi tikhoma.” (Esaya 42:14) Nawu wolowo lowu kongomisaka wa tirha ni le ka ndlela leyi xi hlawulaka ku tiva swilo ha yona ka ha ri emahlweni ni leswi xi swi profetaka. Yehovha wa tikhoma leswaku a xixima ntshunxeko wo tihlawulela lowu a hi nyikeke wona.
Ku va Xikwembu xi lawula matimba ya xona a swi xi endli xi va lexi nga hetisekangiki. Entiyisweni, swa xi kurisa swinene naswona swi endla leswaku hi xi rhandza, hikuva swi kombisa leswaku vuhosi bya xona a xi byi tirhiseli ku tiva swilo hinkwaswo ni ku va ni matimba kambe xi byi tirhisa ni hi rirhandzu xi tlhela xi xixima ntshunxeko wo tihlawulela wa swivumbiwa swa xona leswi tlhariheke.
Hi hala tlhelo, loko Xikwembu a xi kunguhata swilo hinkwaswo ku katsa ni timhangu leti chavisaka ni swiendlo swo homboloka leswi tshameke swi humelela, a swi ta fanela loko hi xi vona nandzu hikwalaho ka mbitsi hinkwawo ni maxangu lama nga kona emisaveni. Hikwalaho, loko dyondzo ya ku kunguhateriwa yi kambisisiwa kahle, a yi dzunisi Xikwembu kambe ya xi rhukana. Yi xi kombisa tanihi Xikwembu lexi nga ni tihanyi, lexi hombolokeke ni lexi nga riki na rirhandzu—ku nga leswi Bibele yi nga xi hlamuseliki xiswona.—Deteronoma 32:4.
Hi Wena U Tihlawulelaka
Hi ku tirhisa Muxe nandza wa xona, Xikwembu xi byele tiko ra Israyele xi ku: “Ndzi veke vutomi ni rifu, . . . emahlweni ka n’wina; mi fanele mi hlawula vutomi . . . hi ku rhandza Yehovha Xikwembu xa n’wina, hi ku yingisa rito rakwe ni ku n’wi namarhela, hikuva yena i vutomi bya n’wina ni ku leha ka masiku ya n’wina.” (Deteronoma 30:19, 20) Loko Xikwembu a xi kunguhatele Muisrayele un’wana ni un’wana leswaku a xi rhandza kutani a kuma vutomi kumbe leswaku a nga xi yingisi ivi a faneriwa hi ku fa, marito ya xona a ma ta va ma nga vuli nchumu naswona ma ri ya vuxisi. Xana wa tshemba leswaku Xikwembu lexi ‘rhandzaka vululami’ ni lexi nga rirhandzu xi nga endla swilo hi ndlela yoleyo leyi nga twaliki?—Pisalema 37:28; 1 Yohane 4:8.
Leswi Xikwembu xi kombeleke malandza ya xona leswaku ma hlawula vutomi, mhaka yoleyo ya ha tirha ni le ka hina namuntlha, hikuva vuprofeta bya Bibele lebyi hetisekeke byi kombisa leswaku se hi le kusuhi swinene ni makumu ya mafambiselo lawa ya swilo. (Matewu 24:3-9; 2 Timotiya 3:1-5) Xana hi byi hlawula njhani vutomi? Hi ku endla hilaha Vaisrayele va khale va endleke hakona.
U Nga Byi ‘Hlawula Njhani Vutomi’?
Hi hlawula vutomi hi “ku rhandza Yehovha,” hi ku “yingisa rito rakwe,” na hi ku “n’wi namarhela.” Ina, hi nga endla swilo leswi loko hi tiva Xikwembu ni ku twisisa leswi xi swi languteleke eka hina. Loko Yesu Kreste a khongela eka Xikwembu u te: “Vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.”—Marito hi lo voyamisa; Yohane 17:3, Bibele—Mahungu Lamanene.
Vutivi byebyo bya risima byi nga kumiwa eBibeleni yo Kwetsima, leyi swi faneleke loko yi vitaniwa Rito ra Xikwembu. (Yohane 17:17; 2 Timotiya 3:16) Hakunene nyiko leyi leyi humaka eka Xikwembu i vumbhoni lebyi nga le rivaleni bya leswaku Xikwembu a xi hi kunguhatelanga vumundzuku bya hina kambe xi lava leswaku hi endla swiboho swa vutlhari leswi sekeriweke eka rungula leri xi hi nyikeke rona.—Esaya 48:17, 18.
Hi ku tirhisa Bibele, Xikwembu entiyisweni xi hi byela leswi: ‘Lexi i xikongomelo xa mina hi vanhu ni misava, naswona leswi hi leswi mi faneleke mi swi endla leswaku mi kuma vutomi lebyi nga heriki. Swi le ka n’wina ku hlawula ku ndzi yingisa kumbe ku nga ndzi yingisi.’ Ina, Xikwembu xi ringanisela hi ndlela leyi xi tirhisaka matimba ya xona yo tiva swilo ka ha ri emahlweni swin’we ni ku xixima ntshunxeko wa hina wa ku tihlawulela! Xana u ta hlawula vutomi “hi ku yingisa rito ra [Xikwembu] ni ku [xi] namarhela”?
XANA U TSHAME U TIVUTISA?
◼ Xikwembu xi hlawula ku tiva swilo ka ha ri emahlweni hi mpimo wo tanihi kwihi?—Deteronoma 30:19, 20; Esaya 46:10.
◼ Ha yini Xikwembu xi nga kunguhati swilo hinkwaswo ku katsa ni swilo swo biha leswi humelelaka vanhu?—Deteronoma 32:4.
◼ I yini leswi eku heteleleni swi nga ta endla leswaku hi va ni vumundzuku lebyinene?—Yohane 17:3.
[Marito lama tshahiweke exihlokweni lama nga eka tluka 13]
Bibele yi dyondzisa leswaku Xikwembu xa hlawula swilo leswi xi lavaka ku swi tiva ka ha ri emahlweni