Magama Lama Nga Ni Nsele Lama Hlotaka Ya Le Khwatini Leri Tlhumeke
HI MUTSARI WA XALAMUKA! LE ECUADOR
◼ Vavalangi vo sungula le Amerika Dzonga va fanele va hlamarisiwe hi ku vona swinyenyana leswi leswikulu. A va hlamale ngopfu lerova va kale va swi thya vito ra xinyenyana lexikulu lexi nga ni nsele lexi chavisaka xa le mintsheketweni ya Magriki lexi hafu ya xona xi nga xinyenyana, hafu leyin’wana xi va wansati.
Ninamuntlha xivumbeko lexi nga tolovelekangiki xa magama lawa, lama nga ni nsele xa ha hlamarisa vanhu. Swinyenyana leswi swa le makhwatini ya le Amerika Xikarhi ni le Dzongeni i swin’wana swa magama lamakulu ni lama nga ni matimba swinene emisaveni, naswona swi lehe 91 wa tisentimitara swi tlhela swi va ni timpapa leti leheke timitara timbirhi. Leswa xisati hi swona leswikulu naswona swi tika tikhilogiramu ta 9. Nchumu wun’wana lowu fambisanaka ni vukulu bya magama lama nga ni nsele i minwala ya wona leyi nga ni matimba leyi kulaka yi leha kwalomu ka 13 wa tisentimitara, lerova minwala ya magama lama tolovelekeke yi nga nghena kambirhi. Ku engetela kwalaho, rungula rin’wana ri vula leswaku minwala ya magama lama nga ni nsele yi tiye ngopfu lerova yi nga pfotlosa “marhambu ya swiharhi leswi vuriwaka sloth, tinkawu ni swiharhi swin’wana leswi magama lawa ma swi bvanyengetaka ekhwatini leri tlhumeke, naswona hakanyingi swiharhi leswi ma swi khomeke ma swi dlaya hi ku tsopeta ka tihlo.” (National Geographic Today) Hambileswi magama lama nga ni nsele ma nga makulu naswona ma nga ni matimba swinene, ma kota ku haha ma nga bi pongo lerova ma nga hundza ehenhla ka nhloko ya wena u nga ma twanga.
Swinyenyana Leswi Nga Le Khombyeni
Hambileswi vanhu va nga fanelangiki ku chava magama lama nga ni nsele, wona ma ni xivangelo xo va chava. Ku hlota swi nga ri enawini ni ku herisiwa ka makhwati swi endle leswaku swinyenyana leswi swi va exikarhi ka mixaka yin’wana ya swivumbiwa leswi nga ekhombyeni ro herisiwa, naswona a swa ha talanga emakhwatini. Leswaku ku sirheleriwa magama lawa ma nga ni nsele, le Panama ma vuriwe xinyenyana xa tiko, naswona vanhu lava ma hlotaka swi nga ri enawini, loko vo khomiwa va xupuriwa hi ndlela yo vava.
Ni le Ecuador vanhu va le ku ringeteni ka ku sirhelela magama lama nga ni nsele. Loko Dokodela Yara Pesantes wa swiharhi eNtangeni lowu nga wa Nkoka le Guayaquil, a vulavurisana ni mutsari wa Xalamuka! u hlamusele leswaku magama lama nga ni nsele ma sungula ku tswala loko ma ri ni malembe ya mune kumbe ya ntlhanu. Hambiswiritano, ma tshikela kan’we endzhaku ka malembe mambirhi, naswona ma tshikela tandza rin’we kumbe mambirhi. Leswi ma nga tshikeliki ngopfu swi endla leswaku swi tika ku ma sirhelela. Dok. Pesantes u vule leswaku endlelo ro ma tshikerisa ra le ntangeni se ri endle leswaku ku tlhotlhorhiwa xigamana xin’we lexi hanyeke kahle. Hambiswiritano, ku nga ri khale vanhu a va nge he boheki ku sirhelela swiharhi leswi nga ekhombyeni ro herisiwa. Xana sweswo swi ta endlekisa ku yini? Yehovha Xikwembu loyi a nga Muvumbi u ta lawula timhaka hinkwato ta le misaveni a tlhela a kombisa leswaku pulanete ya hina ni swivumbiwa leswi hlamarisaka leswi nga eka yona, a nga swi tumbuluxelanga swa hava.—Pisalema 104:5; Esaya 45:18.
[Xifaniso lexi nga eka tluka 25]
Ku lunghiselela ku fungha gama
[Xihlovo Xa Kona]
Pete Oxford/Minden Pictures
[Laha Xifaniso Xi Humaka Kona eka tluka 25]
Tui De Roy/Roving Tortoise Photos