Xana I Magama Kumbe I Makoti Ke?

Xikombiso

“LAHA ntsumbu wu nga kona, hi laha magama ma nga ta hlengeletana kona.” (Matewu 24:28, NW) Ematshan’wini yo dyondza eka xikombiso lexi, van’wana va xi kuma xi ri ni xihoxo. Va vula leswaku magama i swihloti swi ri swoxe leswi hanyaka hi nyama leyi hanyaka, hayi hi mintsumbu. Xisweswo, Tibibele tin’wana ti tirhisa rito leri nge “makoti.” Kambe rito ra Xigriki leri ku vulavuriwaka ha rona, a·e·tosʹ, ri hundzuluxeriwe kahle ri ku “gama.”

Muxaka wun’wana lowu kumekaka eIsrayele i gama ra ribungu. “Ku fana ni tinyanyana to tala leti hanyaka hi nyama,” ku xiya John Sinclair na John Mendelsohn, “gama ra ribungu ri twanana ni nyama yo furha naswona hakanyingi ri va exikarhi ka leswi rhangeke ku fika eka ntsumbu lowa ha ku faka.” Muxiyi un’wana u vike ku hlengeletana ka 60 wa swimhungu (bateleurs) na magama ya ribungu eKalahari ya la Afrika. U engeterile a ku: “Gama ra Ribungu (Tawny Eagle) hi rona ri lawulaka loko swi hlangana eka ntsumbu. Etimhakeni to tala tinyanyana timbirhi, ngopfu-ngopfu mpatswa, ti voniwe ti hlanganyela ntsumbu.”

Magama ya le Lwandle na wona ya tolovelekile ematikweni ya Mediterranean. Eka malembe xidzana lama hundzeke, magama ya le lwandle ni magama ya le tikweni ma hanye hi mintsumbu ya tihanci leti dlayiweke enyimpini. “Swi tiveka swinene . . . leswaku ma landzelela mavuthu ya tinyimpi hi xikongomelo xexo,” ku vula Cyclopædia ya McClintock na Strong.

Hikwalaho ka rivilo ni ku vona swa le kule, magama hi minkarhi yin’wana hi tona tinyanyana to rhanga ku fika eka ntsumbu lowa ha ku faka. Yesu a a yi tiva nhlamuselo leyi Yehova Xikwembu a vutiseke Yobo xivutiso lexi xo tsongahata eka yona: “Šana i ku lerisa ka wena loko gama ri tlhandlukela, ri ya aka šisaka ša rona e mananganangeni šana? . . . E tinhleni ta maribye, ne tinhlohlorini ta tinṭhav̌a? Loko ri ri kona ri ralarala ŝakudya ŝa rona, mahlo ya rona ma langutisa kule. . . . Laha miṭumbu yi nga kona, na rona ri kona.”—Yobo 39:27-30.

Xisweswo, Yesu u kombise kahle leswaku hi lava va nga ni tihlo ro fanekisela ra gama ntsena lava a va ta pfuneka eka xikombiso.