Tihlo Ra Gama

HI MUTSARI WA XALAMUKA! ESPANIYA

LOKO vanhu va le Spaniya va hlamusela munhu la vonaka swinene, va ri u ni tihlo ra gama (vista de águila). Majarimani ma ni xivulavulelwa lexi fanaka (Adlerauge). Hikwalaho, ku ni xivangelo lexi twalaka lexi endlaka leswaku eka malembe-xidzana, tihlo leri vonaka ngopfu ra gama ri tirhisiwe hi ndlela yo gega. Buku ya Yobo, leyi tsariweke emalembeni lama tlulaka 3 000 lama hundzeke, yi vula leswi hi gama: ‘Mahlo ya rona ma vona ekule.’—Yobo 39:27, 29.

Xana gama ri kota ku vona ekule ku fikela kwihi? Buku leyi nge The Guinness Book of Animal Records, yi ri: “Ehansi ka swiyimo leswinene, gama le ra muvala wa nsuku (Aquila chrysaetos) ri nga ha vona kondlo loko ri tshuka-tshuka ri ri ekule hi [tikhilomitara timbirhi].” Van’wana va ringanyete leswaku gama ri nga ha vona eka mpfhuka lowu tlulaka tikhilomitara timbirhi!

I yini lexi endlaka leswaku gama ri vona hi ndlela leyi? Xo sungula, gama le ra muvala wa nsuku ri ni matihlo mambirhi lamakulu lama tekaka ndhawu leyikulu ya nhloko. Book of British Birds yi vula leswaku eka gama le ra muvala wa nsuku, matihlo ya rona “entiyisweni, i makulu swinene kambe a ma tiki, a ma ri kavanyeti loko ri haha.”

Tlhandlakambirhi, tihlo ra gama ri ni tisele ta ku vona leti phindhiweke ka ntlhanu eka ta hina—ri ni mimpalu ya matihlo ya kwalomu ka 1 000 000 leyi vonaka eka mitara yin’wana ni yin’wana ematlhelweni ya yona ya mune lama ringanaka kasi hina hi ni mimpalu ya 200 000. Mpalu wun’wana ni wun’wana wu hlangane ni sele yo twa. Hikwalaho ka sweswo, sele leyi fambisaka rungula ku suka eka tihlo ku ya ebyongweni, yi ni misiha leyi phindhekeke kambirhi eka ya munhu. A swi hlamarisi leswi swivumbiwa leswi swi yi tivaka kahle mivala! Xo hetelela, swinyenyana leswi dyaka nyama, ku fana ni swinyenyana swin’wana, swi ni tilense ta matimba ngopfu leti nga cincaka hi ku hatlisa ti vona nchumu lowu nga le kule ku suka eka lowu nga ekusuhi. Matihlo ya swona ma ma tlula ekule ya hina ni le mhakeni leyi.

Gama ri vona kahle ngopfu ni nhlikanhi, kasi ni vusiku swikhovha hi swona swi vonaka kahle. Matihlo ya swinyenyana leswi dyaka nyama ma voninga naswona ma ni tilense letikulu. Hikwalaho, nivusiku swi vona ku hi tlula hilaha ku phindhiweke ka 100. Kambe, loko ko tshuka ku va ni munyama lowukulu, swikhovha swi tirhisa tindleve ta swona leti twaka kahle leswaku swi kota ku hlota.

I mani loyi a nyikeke swinyenyana leswi timfanelo teto? Xikwembu xi vutise Yobo xi ku: “Xana gama ri hahela ehenhla hikwalaho ka xileriso xa wena”? Swi le rivaleni leswaku a nga kona munhu la nga vulaka leswaku hi yena a endleke xihlamariso lexi xa ntumbuluko. Yobo hi byakwe u pfumele hi ku titsongahata a ku: “Se ndza swi tiva leswaku [wena Yehovha] wa swi kota ku endla swilo hinkwaswo.” (Yobo 39:27; 42:1, 2) Tihlo ra gama ko va vumbhoni byin’wana lebyi kombisaka vutlhari bya Muvumbi wa hina.

[Xifaniso lexi nga eka tluka 21]

Gama le ra muvala wa nsuku

[Xifaniso lexi nga eka tluka 21]

Xikhovha lexo basuluka