Langutelo Ra Bibele

Xana Swi Fanerile Leswaku Ku Va Ni Ku Hambana eXikarhi Ka Vafundhisi Ni Swirho Swa Kereke?

Mufundhisi Lonkulu, Mufundhisi, Tatana, Tatana wo Kwetsima Swinene, Rabi, Nkulukumba, Muchaviseki, Mukwetsimi, Mukwetsimi Lonkulu—leswi i swin’wana swa swithopo leswi hambanisaka vafundhisi va vukhongeri byo hambana-hambana ni swirho leswin’wana swa kereke. Etikerekeni to tala swi tolovelekile leswaku ku va ni ku hambana exikarhi ka swirho swa kereke ni vafundhisi, kambe xana lexi i xileriso lexi humaka eka Xikwembu kumbe i dyondzo leyi vanhu va tisunguleleke yona? Xa nkoka swinene, xana Xikwembu xa yi pfumelela mhaka leyi?

CLETUS WESSELS profesa wa timhaka ta vukhongeri u tsale a ku: “Eka Testamente Leyintshwa ni le nkarhini wa vaapostola a ku kona laha ku vulavuriwaka hi vafundhisi kumbe swirho swa kereke.” Buku yin’wana yi ri: “Hakatsongo-tsongo ku sungule ku va ni ku hambana, vafundhisi ku va vona varhangeri ekerekeni ivi vanhu lavan’wana lava nga riki na swikhundlha va vuriwa swirho swa kereke . . . Swirho ‘leswin’wana’ swa kereke a swi tekiwa tanihi vanhu lava nga yi tiviki Bibele.” (Encyclopedia of Christianity) Ku hambana loku ku sungule ku nyanya hi lembe-xidzana ra vunharhu C.E.—endzhaku ka malembe yo tlula kwalomu ka 200 Yesu Kreste a tlhandlukele etilweni!

Loko ku ri leswaku ku hambana exikarhi ka vafundhisi ni swirho leswin’wana swa kereke a swi sekeriwanga eka xikombiso lexi vekiweke hi vaapostola va Yesu ni hi Vakreste vo sungula, xana sweswo swi vula leswaku swi hoxile? Bibele yi vula leswaku swi hoxile. Xiya leswaku ha yini swi hoxile.

“Hinkwenu Mi Vamakwavo”

Rito ra Xikwembu ri hi byela leswaku Vakreste hinkwavo i vatirheli va Xikwembu naswona ku hava loyi a tlakukeke ku tlula van’wana. (2 Vakorinto 3:5, 6) Alexandre Faivre mutsari wa ta vukhongeri u vula leswaku Vakreste vo sungula “va kandziyise leswaku ku nga vi ni ku hambana exikarhi ka vona.” Mhaka ya leswaku “ku nga vi na ku hambana exikarhi ka vona” yi fambisana ni marito ya Yesu lawa a ma byeleke valandzeri va yena a ku: “Hinkwenu mi vamakwavo.”—Matewu 23:8.

Kambe, vavanuna lava wupfeke naswona va ri ni vuxaka lebyinene na Yehovha a va ri valanguteri, leswi a swi katsa ku va varisi ni vadyondzisi. (Mintirho 20:28) Hambiswiritano, vavanuna lava a va nga ri vafundhisi lava hakeriwaka. Vo tala va vona a va ri vavanuna lava tirhaka lava nga ni mindyangu. Ku engetela kwalaho, a va fanelekela ku va valanguteri, ku nga ri hileswi a va dyondzele vufundhisi kambe hileswi a va dyondza Rito ra Xikwembu hi ku hiseka naswona va hlakulela timfanelo ta moya leti laviwaka hi Xikwembu hilaha ti tsariweke hakona eMatsalweni. Timfanelo toleto ti katsa ku va munhu a “ringanisela emikhuveni, a hlutekile emianakanyweni, a hleleka, a va ni malwandla, a fanelekela ku dyondzisa, . . . a anakanyela, a nga rhandzi ku lwa, a nga rhandzi mali, a va wanuna la ungamelaka ndyangu wakwe hi mukhuva lowunene.”—1 Timotiya 3:1-7.

Lexi Endlaka Leswaku Ku Va Vutlhari Ku Endla Leswi Bibele Yi Swi Vulaka

Bibele yi ri: “Mi nga hundzeli halahaya ka swilo leswi tsariweke.” (1 Vakorinto 4:6) Khombo ra kona, loko vanhu va nga xi yingisi xileriso lexi xa Xikwembu, va onha vuxaka bya vona na xona, naswona sweswo hi leswi endlekeke eka mhaka ya leswaku ku va ni ku hambana exikarhi ka vafundhisi ni swirho leswin’wana swa kereke. Xana swi endleke njhani sweswo? Hi kombela u xiya tinhla leti landzelaka ta tsevu.

1. Ku hambana ka vafundhisi ni swirho leswin’wana swa kereke swi kombisa leswaku munhu u fanele a hlawuriwa hi ndlela yo hlawuleka leswaku a va mutirheli wa Xikwembu. Kambe Bibele yi vula leswaku Vakreste hinkwavo va ntiyiso va fanele va tirhela Xikwembu ni ku dzunisa vito ra xona. (Varhoma 10:9, 10) Loko swi ta emhakeni yo va mutirheli evandlheni, vavanuna hinkwavo lava nga Vakreste va khutaziwa leswaku va fikelela lunghelo rolero, hilaha Timbhoni ta Yehovha ti endlaka hakona.—1 Timotiya 3:1.

2. Ku hambana loku nga kona exikarhi ka vafundhisi ni swirho leswin’wana swa kereke swi endla leswaku lava nga vafundhisi va tlakusiwa, naswona swikhundlha swoleswo swa le kerekeni leswi endlaka leswaku vafundhisi va xiximiwa i vumbhoni bya sweswo. Kambe Yesu u te: “Loyi a tikhomaka tanihi lontsongo exikarhi ka n’wina hinkwenu hi yena lonkulu.” (Luka 9:48) Hi ku pfumelelana ni langutelo rolero ro titsongahata, u byele valandzeri va yena leswaku va nga pfumeli ku vitaniwa hi swithopo swa vukhongeri.—Matewu 23:8-12.

3. Vafundhisi lava hakeriwaka va nga ha sindzisa swirho swa kereke ku humesa mali yo tala, ngopfu-ngopfu loko va rhandza vutomi bya vulovolovo. Kambe valanguteri lava nga Vakreste va kuma mali ya ku tikhathalela hi ku tirha mintirho ya ku tihanyisa leyi tolovelekeke naswona hi ndlela yoleyo va vekela van’wana xikombiso lexinene.a—Mintirho 18:1-3; 20:33, 34; 2 Vatesalonika 3:7-10.

4. Leswi mufundhisi a nga ha titshegaka hi minyikelo leyi humaka eka vanhu van’wana, a nga ha soholota rungula ra Bibele leswaku ri tsakisa swirho swa kereke. Hakunene, Matsalwa ma vurile leswaku swilo leswi swi ta humelela. “Ku ta va ni nkarhi lowu va nga ta ka va nga tiyiseli eka dyondzo leyi hanyisaka, kambe, hi ku landza ku navela ka vona, va ta tihlengeletela vadyondzisi leswaku tindleve ta vona ti ta nyangalatiwa.”—2 Timotiya 4:3.

5. Ku hambana exikarhi ka vafundhisi ni swirho leswin’wana swa kereke swi endla leswaku swirho swa kereke swi anakanya leswaku timhaka leti khumbaka vukhongeri ti fanele ti tshikeriwa vafundhisi, ivi swona swi ti yela ekerekeni ntsena vhiki na vhiki. Kambe, Vakreste hinkwavo va fanele va tikarhatela ku va ni vuxaka lebyinene na Yehovha ni ku va swichudeni leswinene swa Bibele.—Matewu 4:4; 5:3.

6. Loko swirho leswin’wana swa kereke swi nga swi tivi leswi Bibele yi swi vulaka, swi nga hambukisiwa hi ku olova hi vafundhisi hambi ku ri ku dyeleriwa hi vona. Entiyisweni, ematin’wini ku ni swikombiso swo tala swa vanhu lava xanisiweke hi ndlela yo tano.b—Mintirho 20:29, 30.

Leswaku Timbhoni ta Yehovha ti landzela hi ku helela leswi Bibele yi swi vulaka, ti ni vadyondzisi ni varisi vo fanekisela lava nga hakeriwiki lava pfunaka vanhu va Xikwembu hi ku tirhandzela, ku nga ri vafundhisi. Ha yini u nga endzeli Holo ya Mfumo ya laha u tshamaka kona leswaku u ta tivonela hi ya wena?

[Tinhlamuselo ta le hansi]

XANA U TSHAME U TIVUTISA?

◼ Xana vanhu hinkwavo va Xikwembu va fanele va vitanana hi ndlela yihi?—Matewu 23:8.

◼ Hi tihi timfanelo leti vavanuna lava nga Vakreste va faneleke va va na tona leswaku va fanelekela ku va valanguteri evandlheni?—1 Timotiya 3:1-7.

◼ Ha yini Xikwembu xi nga ri amukeli lunghiselelo ra ku va ku va ni ku hambana exikarhi ka vafundhisi ni swirho leswin’wana swa kereke?—1 Vakorinto 4:6.

[Marito lama tshahiweke exihlokweni lama nga eka tluka 23]

Ku hambana ni vafundhisi, Yesu a a ‘titsongahata’