Ku Khomelela Swi Tiya eVokweni Ra Xinene Ra Xikwembu
◼ Jezreel wa le Mexico u velekiwe a ri ni vuvabyi bya nhlonge lebyi nga tolovelekangiki lebyi vuriwaka congenital lamellar ichthyosis. Byi endle leswaku nhlonge yakwe yi oma, yi pandzekela kutani yi kwamukela naswona tindhawu tin’wana ta miri wakwe ti sale ti tsindziyerile. Jezreel u ri: “Leswi swi endla leswaku ndzi nga languteki, kambe vuvabyi lebyi a byi tluleli.”
Ku sukela loko Jezreel a ha ri ricece u tshunguriwe eswibedlhele swo hambana-hambana. Loko a ri ni malembe mambirhi u vekiwe ekamareni ro hlawuleka ra le xibedlhele a ri yexe leswaku a nga tluleriwi hi mavabyi man’wana. Hambiswiritano, nhlonge ya yena a yi antswanga. Vadokodela va miehleketo va n’wi pfunile leswaku a nga vileli loko vanhu va n’wi nyenya.
Vanhu lava anakanyaka leswaku vuvabyi bya Jezreel bya tlulela, va tshamela ku n’wi papalata. Leswi a swi n’wi tikela swinene loko a ha ri ntsongo hikuva a a lava ku tlanga ni vana van’wana. U ri: “A va ndzi hlekula ni ku ndzi poyila va ku ndzi Ntsumbu lowu omisiweke va tlhela va ku ndzi Xivumbiwa lexi humaka eka pulanete yin’wana.”
Hi hala tlhelo, leswi Jezreel a nga ni vuvabyi lebyi voniwaka hi munhu un’wana ni un’wana swi endle leswaku a kota ku byela vanhu van’wana mayelana ni ntshembo lowu a nga na wona lowu sekeriweke eBibeleni. Hakanyingi vanhu va n’wi vutisa leswaku u lo tshwa. Loko a vula leswaku a nga tshwanga, va n’wi vutisa leswaku ha yini a languteka hi ndlela leyi. Wa va hlamusela leswaku u ni vuvabyi bya nhlonge ivi a va byela leswaku sweswi a ku si kumiwa murhi lowu nga tshungulaka vuvabyi byakwe.
Endzhaku ka sweswo u ri, “Ndzi ni ntshembo lowu hlamarisaka hikuva Yehovha Xikwembu u tshembisa leswaku vanhu lava yingisaka milawu yakwe va ta hanya emisaveni leyintshwa laha vuvabyi ni switlhavi swi nga ta herisiwa.” (Nhlavutelo 21:3, 4) Ku bula ni vanhu hi vuvabyi bya yena hi ndlela yoleyo swi endle leswaku Jezreel a sungula ku dyondza Bibele ni vanhu van’wana naswona swi n’wi tsakisile leswi vo tala va vona va veke Timbhoni ta Yehovha.
Jezreel u ri: “Ndza nkhensa hileswi ndzi velekiweke endyangwini wa Vakreste naswona leswi ndzi nga Mbhoni ya Yehovha, ndzi ni vanghana lavakulu. A nga kona ni un’we loyi a ndzi nyenyaka hikwalaho ka ndlela leyi ndzi langutekaka ha yona. Ndzi khuvuriwe ndzi ri ni malembe ya 17, naswona eka malembe ya 14 lawa se ndzi nga na wona ndzi khuvuriwile ndzi kote ku tirhela Muvumbi wa hina hi tindlela to tala.”
Jezreel u ma tekela enhlokweni marito lama khutazaka ya Yehovha lama kumekaka eka Esaya 41:10, 13 lama nge: “U nga chavi, hikuva ndzi na wena. . . . Kunene ndzi ta ku khoma swi tiya hi voko ra mina ra xinene ra ku lulama. Hikuva mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’”
Ku khomelela swi tiya evokweni ra xinene ra Yehovha swi pfune Jezreel leswaku a nga vileli ngopfu hi leswi vanhu va nga ha swi ehleketaka malunghana ni ndlela leyi a langutekaka ha yona nileswaku a kota ku tiyiselela swiphiqo leswi fambisanaka ni vuvabyi lebyi. Yena ni vanhu van’wana va timiliyoni va rindzele ku hetiseka ka xitshembiso lexikulu xa Xikwembu.