Ta Rivala
“Vaaki va misava lava endlaka 60 wa tiphesente [va ni] tiselfoni sweswi. . . Koloko ku ve ku tlakuka lokukulu eka malembe ya tsevu ntsena lama hundzeke, hikuva hi nkarhi wolowo vanhu lava a va ri ni tiselfoni a va ri ehansi ka tiphesente ta 15.”—MAGAZINI WA MACLEAN’S, WA LE CANADA.
Eka malembe yo tlula khume lama hundzeke, ku kumiwe mixaka leyintshwa ya swiharhi swa 1 068 endhawini ya Mekong leyi nga eDzonga-vuxa bya Asia.—NKWAMA WO HLAYISA SWIHARHI EMISAVENI HINKWAYO, LE UNITED STATES.
“Tiko ra Amerika ri ni nhlayo leyi nga ehansi ka ntlhanu wa tiphesente ta vaaki hinkwavo va misava kambe nhlayo ya vakhotsiwa va rona yi kwalomu ka 25 wa tiphesente loko yi ringanisiwa ni ya vakhotsiwa emisaveni hinkwayo. Eka vaaka-tiko va 100 000, va 756 va le khotsweni, ku nga nhlayo leyi phindhiweke ka ntlhanu ya vakhotsiwa va le matikweni man’wana.”—MAGAZINI WA THE ECONOMIST, WA LE BRITAIN.
‘Mianakanyo Leyi Taleriweke Hi Swikavanyeto’
Switirhisiwa swin’wana swa thekinoloji swo vulavurisana ha swona swi nga kavanyeta vanhu loko va endla mintirho yin’wana. Vakambisisi lava kambisisaka ndlela leyi vanhu va kumaka ni ku rhumela rungula ha yona eka switirhisiwa sweswo—ku fana ni ku rhumelelana marungula, switsundzuxo leswi tsariweke eka khalendara, switiviso leswi kombaka leswaku ku nghene ti-email ni swin’wana leswi humelelaka eka khompyuta—va vika leswaku lava swi tirhisaka va va ni “swiphiqo swa mianakanyo hileswi yi taleriweke hi swikavanyeto naswona va tsandzeka ku dzikisa mianakanyo eka leswi va swi endlaka.” Magazini wa Newsweek wu vula leswaku loko u tshamela ku kavanyetiwa swi nga ha endla leswaku “u va ekhombyeni ro tsandzeka ku dzikisa mianakanyo hi ku helela ku ringana nkarhi wo leha eka mhaka yihi na yihi ni ku tsandzeka ku tirha kahle kukondza u heta ntirho wa wena.” Swilo swin’wana leswi nga vangiwaka hi swikavanyeto swo tano ku nga va “ku rivala swilo hinkwaswo” ni “ku nga ha tsundzuki kahle swilo” hambi ku ri ku va ekhombyeni ro endla swihoxo leswi nga vangaka makhombo.
Ku Laveka Vatoloki
Tihuvo, maphorisa, swibedlhele ni tindzawulo tin’wana ta vukorhokeri eUnited States ti tshama ti ri ni xilaveko lexikulu xo lava ku pfuniwa ku twisisa leswi vanhu va tindzimi tin’wana va swi vulaka. Tikhampani leti pfunaka hi vatoloki loko ku ri ni xilaveko ti pfuna tindzawulo ku twisisa “vanhu lava vulavulaka tindzimi to hambana-hambana,” hilaha vaviki va mahungu va Reuters va vulaka hakona. Khampani yin’wana leyi nga exifundzheni xa California yi thole vatoloki va 5 200 lava vulavulaka tindzimi ta 176—ku sukela eka tindzimi leti tolovelekeke to fana ni Xichayina, Xirhaxiya, Xipaniya ku ya eka tindzimi leti nga tiviwiki hi vanhu vo tala to fana ni tindzimi leti vulavuriwaka ematikweni ya le Afrika ni le Mexico. Xiviko xexo xi vula leswaku ku nga si hela ni minete, tikhampani toleto ti kota ku “kumisisa leswaku munhu wa kona u vulavula ririmi rihi” kutani ti kongomisa riqingho eka mutoloki leswaku “a vulavurisana na yena a n’wi pfuna.”
Nsuku Lowu Kumiwaka Endhawini Leyi A Yi Nga Ehleketiwi
Vaviki va mahungu va Reuters lava nga eJapani va vike leswaku doroba ra Nagano leri nga en’walungu-vupela-dyambu bya doroba ra Tokyo, ri “tshubule xihlovo lexintshwa xa swicelwa, ku nga thyaka leri humaka etikhampanini.” Nkambisiso lowu endliweke wu kume leswaku eka nkuma lowu salaka loko ku hisiwa thyaka efektri leyi nga edorobeni ra Suwa, ku kumiwa tiphesente to tala ta nsuku ku tlula lowu kumiwaka eka maribye lama ceriwaka emigodini ya le Japani leyi nga ni nsuku wo tala. Doroba rero ku languteriwe leswaku ri kuma 15 wa timiliyoni ta ti-yen, ku nga mali leyi tlulaka 1 296 000 wa tirhandi eka nsuku lowu ri nga ta wu kuma hi lembe rin’we ntsena. Xiviko xexo xi vula leswaku ku ehleketiwa leswaku nsuku wo tala lowu kumiwaka eka thyaka rero wu “vangiwa hileswi edorobeni rero ku nga ni tikhampani to tala leti tirhisaka nsuku ku endla michini yo karhi.”