Ta Rivala

“Vaaka tiko lava tlulaka hafu va le Rhaxiya va anakanya leswaku ku ba mati tingwenya ti etlela i ndlela leyinene yo ‘tlhantlha swiphiqo.’”—REUTERS NEWS SERVICE, RUSSIA.

“Vulavisisi byi komba leswaku 17,5 wa tiphesente ta Machayina lama kuleke ma karhatiwa hi vuvabyi bya mianakanyo . . . Vavasati va kharhatiwa ngopfu hi swipfukela naswona va vilela ngopfu ku tlula vavanuna.”—CHINA DAILY, CHINA.

Hi ku ya hi mpimanyeto wa National Safety Council, “tiphesente ta 28 ta timhangu leti endlekaka emagondzweni eUnited States—kumbe 1,6  wa timiliyoni wa timhangu leti endlekaka lembe na lembe ti vangiwa hi vachayeri lava vulavulaka hi tiselfoni, va rhumela marungula kumbe ku ma hlaya eka tona.”—UC BERKELEY WELLNESS LETTER, U.S.A.

“Matimu La Ma Nyumisaka”

Phepha-hungu ra Irish Times ri vula leswaku “Xiviko xa ntirho wa ku lavisisa timhaka ta ku xanisiwaka ka vana xi kombisa matimu lama nyumisaka ya le Ireland.” Hi ku ya hi phepha-hungu leri, xiviko lexi xi paluxa manyala lama khumbaka ku xanisiwa ka vana hi minhlangano ya kereke ya Khatholiki lama a ma endliwa hi ku phindha-phindha naswona ku xanisiwa ka kona a ku katsa ku “bukuteriwa ka vana hikwalaho la leswi a va ri ni tinhwala enhlokweni” swin’we ni ku va xanisa hi timhaka ta masangu. Loko phepha-hungu leri ri ya emahlweni ri ri, ku xanisiwa ka vona a ku tekeriwanga enhlokweni hikwalaho ko xixima “vulawuri bya Kereke ya Khatholiki” hi ndlela leyi hundzeleteriweke. Phepha-hungu ra Times ri tshahe marito lama vuriweke hi munhu loyi a a va twela vusiwana vanhu lava xanisiweke, lama nge “Hulumendhe ni Kereke mi hi Khomisa Tingana.”

Mati Lama Nga Le N’wetini

Van’wasayese lava buluseke rhokete ya swiphemu swimbirhi erivaleni ra n’weti, va kume mati eka papa leri vumbiweke hi ritshuri leri tuvikeke kwalaho. Papa leri ri kambisisiwe hi michini ya spectrometers—michini leyi tirhisiwaka ku kambisisa ndlela leyi nchumu wu vumbekeke ha yona hi ku hambanisa miseve ya rivoni leyi yi tlhavaka ha yona kumbe leyi yi yi humesaka. N’wasayense wa dyambu Michael Wargo tlhelo ndhuna ya NASA ehofisi-nkulu ya vona le Washington, D.C. u te: “Hi le ku dyondzeni ka swilo swo tala malunghana ni n’weti naswona sweswo swi endla leswaku hi dyondza leswi engetelekeke hi dyambu.” Ku kambisisiwa ka n’weti loku ka ha ku endliwaka sweswinyana ku kombisa leswaku ku ni tithani ta timiliyoni ta mati enorth pole ya n’weti.

Muchini Lowu Xavisaka Nsuku Lowu Furiweke

Etindhawini to tala emisaveni hinkwayo, sweswi se ku kumeka nsuku lowu furiweke emichinini leyi xavisaka swilo swo hambana-hambana. Hi xikombiso, hotela ya le Abu Dhabi, eUnited Arab Emirates, yi hoxe muchini lowu xavisaka swilo swa 320, ku katsa ni nsuku lowu furiweke lowu nga ni ntiko wa tigiramu ta khume ni swingwece swa nsuku. Nxavo wa nsuku wu ya ehenhla ni le hansi endzhaku ka timinete tin’wana ni tin’wana ta khume hi ku tirhisa khompyuta leyi fambisanaka ni nxavo wa timakete ta misava hinkwayo. Eku sunguleni muchini lowu, a wu nga yi amukeli mali yo huma ematikweni mambe, kambe vaendli va wona va le ku endleni ka leswaku swi koteka ku xava eka wona hi ku tirhisa khadi ra xikweleti. Vaviki va mahungu va Reuters, va vula leswaku ndhawu leyi nsuku lowu furiweke wu xaviseriwaka eka yona yi hlawuriwe “hi ku landza xilaveko lexikulu xo lava nsuku exifundzheni xexo.”