Vantshwa Va Vutisa

Ha Yini Ndzi Fanele Ndzi Khathalela Rihanyo Ra Mina?

Fungha hi ✔ etlhelo ka pakani ha yin’we leyi u nga tsakelaka ku yi fikelela.

◯ Ku hunguta miri

◯ Ku va ni nhlonge yo xonga

◯ Ku va ni tinghitsi

◯ Ku xalamuka swinene

◯ Ku hunguta ku karhateka

◯ Ku lehisa mbilu

◯ Ku titshemba swinene

KU NI swilo swin’wana evuton’win leswi wena tanihi muntshwa u nga kotiki ku tihlawulela swona—vatswari, vamakwenu ni ndhawu leyi u tshamaka eka yona, loko hi vula swi nga ri swingani ntsena. Kambe a swi tano hi rihanyo ra wena. Ku nga khathariseki leswaku u ni rihanyo lerinene kumbe a wu na rona, swi nga titshega hi xitekela ni ndlela leyi u hlawulaka ku hanya ha yona.a

U nga ha vula u ku, ‘Kambe ndza ha ri ntsongo leswaku ndzi nga karhateka hi rihanyo ra mina!’ Xana u ehleketa tano? Langutisa tipakani leti xaxametiweke laha henhla. I tingani leti u ti fungheke? Ku nga khathariseki leswaku wa pfumela kumbe a wu pfumeli, ku va ni rihanyo lerinene i swa nkoka leswaku u kota ku fikelela yin’wana ni yin’wana ya tipakani teto.

I ntiyiso leswaku u nga ha titwa ku fana na Amberb wa malembe ya 17 la nga te, “A ndzi nge swi koti nikatsongo ku dya swakudya leswi endliweke hi mapa ya koroni, swakudya leswi nga riki na mafurha ni leswi nga riki na chukele nkarhi hinkwawo!” Loko u titwa tano, u nga vileli—a wu fanelanga u hundzeleta swilo, u tshika ku dya swiwitsi kumbe u tsutsuma mpfhuka lowu nga tolovelekangiki vhiki ni vhiki. Entiyisweni, swi nga ha lava leswaku u endla mindzulamiso yi nga ri yingani yo olova ntsena leswaku u sungula ku languteka kahle, u titwa kahle ni ku kota ku tirha hi matimba. A hi voneni ndlela leyi tintangha tin’wana ta wena ti swi koteke ha yona.

Dyana Swakudya Leswinene Kutani U Languteka Kahle!

Bibele yi hi khutaza leswaku hi ringanisela eka mikhuva ya hina. Swivuriso 23:20 yi ri: “U nga . . . dyi swakudya hi makolo.” (Contemporary English Version) A hi minkarhi hinkwayo swi olovaka ku yingisa ndzayo yoleyo.

● “Minkarhi hinkwayo ndzi tshama ndzi khomiwe hi ndlala ku fana ni vantshwa van’wana vo tala. Vatswari va mina va vula leswaku khwiri ra mina ri ni timbhovo!”—Andrew, wa malembe ya 15.

● “A ndzi karhateki nikatsongo hikuva a ndzi swi koti ku vona ndlela leyi swakudya swin’wana swi nga ni khombo ha yona eka mina sweswi.”—Danielle, wa malembe ya 19.

Xana swi lava leswaku u tikhoma swinene loko swi ta emhakeni ya swakudya? Tintangha tin’wana ta wena ti vule leswaku ti pfuniwe hi swiringanyeto leswi landzelaka.

Yingisa khwiri ra wena. Julia wa malembe ya 19 u ri: “A ndzi hamba ndzi hlayela leswaku swakudya leswi ndzi swi dyaka swi ta ndzi nyika matimba yo tanihi kwihi, kambe sweswi ndzi tshika ku dya loko se ndzi xurhe.”

Papalata swakudya leswi nga riki na rihanyo. Peter wa malembe ya 21 u ri: “Hi n’hweti yin’we ntsena ndzi hungute miri hi tikhilogiramu ta ntlhanu hileswi ndzi tshikeke ku nwa swakunwa leswi nga ni soda!”

Papalata ku dya ngopfu. Erin wa malembe ya 19 u te: “Ndzi ringeta ku nga kombeli leswaku va tlhela va ndzi phamela loko ndzi hete swakudya leswo sungula.”

Leswi Nga Ku Pfunaka: U nga tshiki ku dya swakudya hi nkarhi lowu ku faneleke ku dyiwa ha wona! Loko u nga dyi, u ta khomiwa hi ndlala swinene naswona u ta ringeka kutani u dya ku tlula mpimo.

Endla Vutiolori Kutani U Titwa Kahle!

Bibele yi ri: “Ku letela miri swa pfuna.” (1 Timotiya 4:8) Kambe vantshwa vo tala a va swi rhandzi ku endla vutiolori.

● “A wu nge kholwi leswaku ku feyile swichudeni swo tarisa ku yini eka dyondzo ya vutiolori loko ndza ha ri exikolweni xa sekondari. Swi ndzi hlamarisile leswaku va feyila njhani hikuva yi olove ngopfu!”—Richard, wa malembe ya 21.

● “Van’wana va ri, ‘Ha yini u fanele u tsutsuma edyambyini leri vavulaka kukondza u dzuka nyuku u tlhela u karhala kasi u nga tlanga ntlangu wa vhidiyo lowu nga ku endlaka u tsutsumisa munhu un’wana onge hiloko ku tsutsuma wena?’”—Ruth, wa malembe ya 22.

Xana u heleriwa hi matimba loko u ehleketa hi ku endla vutiolori? Loko swi ri tano, hi lebyi vuyelo byinharhu lebyi u nga byi kumaka hi ku endla vutiolori nkarhi na nkarhi.

Vuyelo #1. Vutiolori byi endla leswaku miri wa wena wu kota ku lwisana ni mavabyi. Rachel wa malembe ya 19 u ri: “Minkarhi hinkwayo Tatana a a tshamela ku vula a ku, ‘Loko u tsandzeka ku endla vutiolori u ta vabya naswona ku vabya swi ta ku dyela nkarhi lowu a wu ta wu tirhisela swin’wana.’”

Vuyelo #2. Vutiolori byi endla leswaku byongo byi humesa tikhemikhali leti ku endlaka u va ni ku rhula lokukulu. Emily wa malembe ya 16 u ri: “Ku tsutsuma swi ndzi endla ndzi nga karhateki loko ndzi ri ni swilo swo tala emiehleketweni. Ndzi titwa ndzi phyuphyile emirini naswona sweswo swi susa ku karhateka hinkwako embilwini ya mina.”

Vuyelo #3. Vutiolori byi nga ku tisela ntsako lowukulu. Ruth wa malembe ya 22 u ri: “Ndzi rhandza vutiolori lebyi endliwaka ehandle byo fana ni ku famba mpfhuka wo leha enhoveni, ku hlambela, ku rheta eayisini ni ku khandziya xikanyakanya.”

Leswi Nga Ku Pfunaka: Tivekele timinete ta kwalomu ka 20 kanharhu hi vhiki leswaku u endla ntirho lowu u wu tsakelaka lowu lavaka matimba.

Etlela Tiawara Leti Faneleke Kutani U Pfuka U Ri Ni Matimba!

Bibele yi ri: “Voko leri teleke ku wisa ra antswa ku ri ni mavoko mambirhi lama teleke ntirho wa matimba ni ku hlongorisa mheho.” (Eklesiasta 4:6) A wu nge tirhi kahle loko u nga etlelanga tiawara leti faneleke!

● “Loko ndzi etlele tiawara titsongo, a ndzi koti ku tirha kahle. Ndza tsandzeka ku dzikisa mianakanyo eka nchumu wihi na wihi!”—Rachel, wa malembe ya 19.

● “Kwalomu ka awara ya mbirhi ninhlikanhi ndzi karhala ngopfu lerova ndzi nga etlela ndzi ri karhi ndzi vulavula ni munhu!”—Kristine, wa malembe ya 19.

Xana u lava ku etlela tiawara leti engetelekeke? Leswi i swilo leswi tintangha ta wena tin’wana ti swi endleke.

Tshika ku etlela nivusiku ngopfu. Catherine wa malembe ya 18 u ri: “A ndzi tikarhatela ku hatla ndzi etlela.”

Tshika ku vulavula ni vanghana loko se ku ri vusiku swinene. Richard wa malembe ya 21 u ri: “Minkarhi yin’wana vanghana va mina a va ndzi fonela kumbe va ndzi rhumelela SMS nivusiku swinene, kambe sweswi ndzi dyondze ku herisa mabulo kutani ndzi ya eku etleleni.”

Tikarhatele ku etlela hi nkarhi lowu fanaka masiku hinkwawo. Jennifer wa malembe ya 20 u ri: “Sweswi se ndzi ringeta ku ya eku etleleni ni ku pfuka hi nkarhi lowu fanaka siku ni siku.”

Leswi Nga Ku Pfunaka: Tikarhatele ku etlela tiawara leti nga exikarhi ka nhungu na khume vusiku byin’wana ni byin’wana.

Hi yihi yinhla eka letinharhu leti ku buriweke ha tona exihlokweni lexi leyi u faneleke u endla mindzulamiso evuton’wini bya wena?

◯ ku dya ◯ ku endla vutiolori ◯ ku etlela

Laha hansi, tsala pakani leyi u nga tivekelaka yona leswaku yi ku pfuna ku antswisa eka yinhla yoleyo.

․․․․․

U nga vuyeriwa swinene hi ku teka magoza ma nga ri mangani yo olova leswaku u tikhathalela. Tsundzuka leswaku ku va ni rihanyo lerinene swi ta ku pfuna leswaku u languteka kahle, u titwa kahle ni ku kota ku tirha hi matimba. Ku hambana ni swilo swin’wana evuton’wini, ku va ni rihanyo lerinene i nchumu lowu u nga kotaka ku wu lawula. Erin wa malembe ya 19 u ri: “Makumu ya mhaka hileswaku ku va ni rihanyo lerinene swi titshege hi wena.”

Swihloko swin’wana leswi nge “Vantshwa Va Vutisa” swi kumeka eka Website leyi nge www.watchtower.org/ype

[Tinhlamuselo ta le hansi]

SWIVUTISO SWO ANAKANYISISA HA SWONA

● Ku khathalela rihanyo ra wena swi nga ku pfuna njhani leswaku u titshemba?

● U nga swi kombisa njhani ku anakanyela loko swi ta emhakeni ya rihanyo ra wena?—Vafilipiya 4:5.

[Bokisi/Swifaniso leswi nga eka tluka 13]

LESWI TINTANGHA TA WENA TI SWI VULAKA

“Miri wa munhu wu fana ni movha—i vutihlamuleri bya n’wini wa wona ku wu khathalela. Xexo i xin’wana xa swivangelo leswi ndzi endlaka ndzi rhandza ku endla vutiolori.”

“Ku va ni munghana loyi mi endlaka vutiolori swin’we swa ku khutaza hikuva a wu lavi ku n’wi heta matimba.”

“Ndzi rhandza ndlela leyi ndzi titwaka ha yona loko ndzi endla vutiolori. Naswona loko ndzi sungula ku languteka kahle hikwalaho ka byona, swi endla leswaku ndzi titshemba swinene!”

[Swifaniso]

Ethan

Briana

Emily

[Bokisi leri nga eka tluka 14]

“NDZI CINCE NDLELA LEYI A NDZI HANYA HA YONA”

“Loko ndzi ri ni malembe ya tsevu, a ndzi nyuherile katsongo. Kutani hakatsongo-tsongo, ku tshamela ku dyanyana swakudya leswi nga akiki miri swi hundzuke mukhuva! Naswona a ndzi nga ri munhu wa migingiriko. Swi nga si ya kwihi, se a ndzi nyuhele ku tlula mpimo, ku nga nchumu lowu a ndzi nga wu lavi nikatsongo. A yi nga ndzi tsakisi nikatsongo ndlela leyi a ndzi languteka ni ku titwa ha yona! Minkarhi yin’wana a ndzi pfa ndzi ringeta ku hunguta miri hi ku dya swakudya swo hlawuleka kambe minkarhi hinkwayo a ndzi tlhela ndzi nyuhela. Kutani loko ndzi ri ni malembe ya 15, ndzi teke xiboho xo endla mindzulamiso yo karhi evuton’wini bya mina. A ndzi lava ku hunguta miri hi ndlela ya kona—leyi a yi ta ndzi pfuna leswaku ndzi nga ha tlheli ndzi nyuhela vutomi bya mina hinkwabyo. Ndzi xave buku leyi vulavulaka hi swakudya leswinene ni tindlela to endla vutiolori, naswona ndzi swi tirhisile leswi a ndzi swi hlaya eka yona. A ndzi tibyele leswaku hambiloko ndzo tshika ku dya swakudya leswinene ni ku endla vutiolori ku ringana nkarhinyana, a ndzi nga ta hela matimba. Xana wa swi tiva leswaku ku humelele yini? Leswi ndzi swi hlayeke swi tirhile! Ku nga si hela lembe, ndzi hungute miri hi tikhilogiramu ta 25. Ndzi kote ku nga ha nyuheli ku ringana malembe mambirhi. A ndzi nga tshembi nikatsongo leswaku ndzi nga swi kota! Ndzi ehleketa leswaku leswi ndzi pfuneke hileswi ndzi nga dyangiki ntsena swakudya leswinene—kambe ndzi cinceke ni ndlela leyi a ndzi hanya ha yona. Endzhaku ko twisisa leswaku leswi a swi ta khumba vutomi bya mina hi ku helela, ndzi tiyimisele ku endla mindzulamiso leyi lavekaka.”—Catherine, wa malembe ya 18.

[Xifaniso lexi nga eka tluka 14]

Rihanyo ra wena ri fana ni movha—loko u nga wu khathaleli kahle wu ta onhaka