Huvo Ya Le Spain Yi Tiyisekisa Malunghelo Ya Manana Yo Kurisa Vana
● A wu ta titwa njhani loko munhu un’wana o vula leswaku a wu mutswari lonene? U nga endla yini loko un’wana o vula leswaku vana va wena a va swi koti ku hanyisana ni vanhu van’wana, ku hambanisa leswinene ni leswo biha nileswaku a va tlharihanga hikwalaho ka nkucetelo wa wena?
Rosa López, mana wa swinhwanyetana swimbirhi le Spain, a a langutane ni mhaka yoleyo loko khale ka nuna wakwe a n’wi mangalele ehubyeni leswaku a ta pfumeleriwa ximfumo ku tshama ni vana vakwe. Rosa i Mbhoni ya Yehovha naswona khale ka nuna wakwe u vule leswaku tidyondzo ta vukhongeri byakwe a ti endla leswaku swinhwanyetana swa vona swi nga hanyisani kahle ni vana van’wana, swi nga dyondzi kahle exikolweni naswona swi va ni mahanyelo yo biha. Loko huvo ya doroba yi nga amukelanga swihehlo swa khale ka nuna wa Rosa, u hundzisele mhaka yakwe eka huvo ya xifundzha.
Loko ku tengiwa nandzu wa leswaku i mani mutswari la faneleke a tshama ni n’wana, nkonaniso lowunene wa vuavanyisi wu lwela ku nga yi hi nghohe; a wu hundzuki njhekanjhekisano wa vukhongeri, xisweswo wu tengisa vukhongeri bya un’wana. Ematshan’weni ya sweswo, wu ta vulavula ntsena hi timhaka to fana ni leti: I yini leswi nga ta vuyerisa n’wana? Xana mutswari la tshamaka ni n’wana u ni nkucetelo wo biha hi ndlela yo karhi? Hi wihi mutswari la fanelekaka ku khathalela swilaveko swa n’wana?
Leswaku ku kumiwa tinhlamulo ta swivutiso sweswo eka nandzu wa Rosa, huvo yi hlawule mutivi un’wana wa mianakanyo leswaku a vutisa vana ni vatswari swivutiso. Xana ku ve ni vuyelo byihi? Mutivi wa mianakanyo u kume leswaku hambileswi vana va tshameke ni mana wa vona ku ringana malembe ya tsevu ntsena, swilo a swi famba kahle exikolweni ni le kaya naswona a va hanyisana kahle ni vana van’wana. Hi ku ya hi leswi kumiweke hi mutivi wa mianakanyo ni vumbhoni lebyi kumiweke eka vatswari, muavanyisi a nga kumanga vumbhoni lebyi kombisaka leswaku “vana lava va kuceteriwa hi ndlela yo karhi hi tlhelo ra mintlhaveko kumbe eka vuxaka bya vona ni vana van’wana hileswi va kurisiwaka exikarhi ka vanhu lava nga Timbhoni ta Yehovha.” U tlhele a vula leswaku swihehlo leswi vuriweke hi khale ka nuna wa Rosa a swi nga “twali nikatsongo naswona a swi na vumbhoni.”
Van’wana va ehleketa leswaku vana va Timbhoni ta Yehovha a va kurisiwi hi “ndlela leyi tolovelekeke” hikwalaho ka leswi va nga byi rhandziki vukhongeri bya tona kumbe hileswi va byeriweke mhaka leyi nga riki ntiyiso hi tona. Hambiswiritano, a swi vuli swona leswaku vana lava kurisiwaka hi ku ya hi milawu ya Bibele va khomiwa hi ndlela yo biha. Ematshan’weni ya sweswo, va pfuniwa ku va lava ringaniselaka, lava khathalaka ni lava nga ni mikhuva leyinene loko se va kurile.—Vaefesa 6:4; 2 Timotiya 3:15-17.
[Xifaniso lexi nga eka tluka 14]
Rosa López u pfumeleriwe ku ya emahlweni a tshama ni swinhwanyetana swakwe swimbirhi