Swivutiso Leswi Talaka Ku Vutisiwa

Ha yini vanhu van’wana va vulavula ku biha hi Timbhoni ta Yehovha?

Vanhu vo tala a va wu tivi ntiyiso malunghana ni leswi Timbhoni ti swi pfumelaka. Van’wana va nga ha va va nga wu rhandzi ntirho wa tona wo chumayela. Hambiswiritano, ntiyiso hileswaku Timbhoni ti endla ntirho lowu hileswi ti rhandzaka vaakelani, hikuva ta swi tiva leswaku “un’wana ni un’wana loyi a vitanaka vito ra Yehovha u ta ponisiwa.”—Varhoma 10:13.

Xana Timbhoni ta Yehovha i Maprotestente, Ma-fundamentalist kumbe mpambukwa?

Timbhoni ta Yehovha i Vakreste, kambe a hi Maprotestente kumbe Makhatoliki hikuva ti pfumela leswaku tidyondzo tin’wana ta vukhongeri byebyo a ti sekeriwanga ematsalweni. Hi xikombiso, Bibele a yi dyondzisi leswaku Xikwembu—lexi kombisaka rirhandzu hi ndlela leyikulu—xi xanisa vanhu hilaha ku nga heriki etiheleni. Naswona a yi dyondzisi leswaku vanhu va ni moya-xiviri lowu nga fiki kumbe leswaku Vakreste va fanele va nghenelela eka tipolitiki.—Ezekiyele 18:4; Yohane 15:19; 17:14; Varhoma 6:23.a

The World Book Encyclopedia yi ri: “Ma-fundamentalist i ntlawa lowukulu wa Maprotestente eUnited States.” Tinhlengeletano tin’wana ta Ma-fundamentalist “ti amukele swikhundlha swa le migangeni ni swa tipolitiki, ti sekela mhaka yoleyo emhakeni ya leswaku leswi tindzimana ta Bibele ti swi vulaka swi fanele swi tekiwa hi ndlela ya xiviri.” Kambe Timbhoni ta Yehovha a ti swi endli sweswo. Hilaha swi hlamuseriweke hakona, ti papalata ku nghenelela eka tipolitiki naswona a ti va sindzisi vanhu van’wana leswaku va amukela mavonelo ya tona hi ku tirhisa tipolitiki kumbe tindlela tin’wana. Ematshan’weni ya sweswo, ti tala ku vulavurisana ni vanhu hi ku kongoma, ti tirhisa swivangelo leswi twalaka ni vumbhoni lebyi khorwisaka, ti tekelela Vakreste vo sungula.—Mintirho 19:8.

Mpambukwa i ntlawa wa vanhu lava nga endzeni ka vandlha lava nga fambisaniki na rona kumbe munhu la tihambanisaka ni vandlha leswaku a ya tisungulela vandlha lerintshwa. Timbhoni ta Yehovha a ti sukanga ekerekeni yo karhi. A hi mpambukwa.

Ku endleka yini eminhlanganweni ya Timbhoni?

Minhlangano ya tona leyi vanhu hinkwavo va pfumeleriwaka ku hlanganyela eka yona, kahle-kahle i dyondzo ya Bibele, leyi hi ntolovelo vanhu lava teke eka yona va nyikelaka tinhlamulo. Wun’wana wa minhlangano ya tona wa vhiki ni vhiki i Xikolo xa Vutirheli bya le Tilweni, lexi pfunaka swirho swa vandlha leswaku swi kota ku dyondzisa, ku hlaya ni ku endla ndzavisiso. Kasi nhlangano wun’wana i nkulumo ya Bibele leyi tekaka timinete ta 30, leyi vulavulaka hi mhaka leyi nga ha kokaka rinoko ra lava nga riki Timbhoni. Hi ntolovelo yi landzeriwa hi dyondzo ya Bibele leyi ku tirhisiwaka magazini wa Xihondzo xo Rindza. Minhlangano yi sunguriwa ni ku gimetiwa hi risimu ni xikhongelo, naswona vanhu a va komberiwi mali hambi ku ri ku fambisa xibya xo hoxa mali eka xona.—2 Vakorinto 8:12.

Timbhoni ta Yehovha ti yi kuma kwihi mali?

Ntirho wa tona wu seketeriwa hi minyikelo ya ku tirhandzela. Timbhoni a ti va hakerisi vapfumeri-kulobye loko ti va khuvula, ti va catisa, ti va fambisela ntirho wa swilahlo kumbe ntirho wun’wana wa vukhongeri. Naswona a ti va lerisi leswaku va hakela vukhume. Mani na mani la lavaka ku humesa munyikelo a nga endla tano hi ku wu hoxa ebokisini ra minyikelo leri vekiweke eHolweni ya Mfumo. Timbhoni ta Yehovha ti tigandlisela tibuku leti sekeriweke eBibeleni leti ti ti tirhisaka leswaku ti nga hakeli mali yo tala, naswona Tiholo ta Mfumo ni marhavi ya tona yo saseka swi akiwa hi vatirhi va ku tirhandzela.

Xana Timbhoni ta Yehovha ta pfumela ku tshunguriwa?

Ina. Entiyisweni, ti lava ku tshunguriwa hi ndlela leyinene swin’we ni varhandziwa va tona. Ku engetela kwalaho, Timbhoni to tala i vaongori, i vatirhi va ta swilamulela-mhangu, i madokodela ni madokodela lama endlaka vuhandzuri. Hambiswiritano, Timbhoni ta Yehovha a ti pfumeli ku pomperiwa ngati. Bibele yi ri: “Papalata . . . ngati.” (Mintirho 15:28, 29) Lexi tsakisaka, nhlayo leyi kulaka ya madokodela yi kume leswaku matshungulelo lama nga tirhisiki ngati i “manene ngopfu,” hikuva loko ma tirhisiwa makhombo yo tala ya rihanyo lama fambisanaka ni ku tirhisiwa ka ngati ma papalatiwa.