Xikwembu Xi Ndzi Chavelerile eMaxangwini Ya Mina Hinkwawo

Hi ku vula ka Victoria Colloy

Dokodela u byele manana a ku: “A ku na nchumu wun’wana lowu hi nga wu endlaka eka n’wana wa wena. U ta boheka ku tirhisa tinhonga ni ku ambala tintangu to tiyisa milenge vutomi bya yena hinkwabyo.” A Ndzi tsemeke nhlana! A ndzi ta endla yini loko ndzi nga ha swi koti ku famba?

NDZI velekiwe hi November 17, 1949, edorobeni ra Tapachula eChiapas le Mexico. Ndzi n’wana wa mativula eka va mune naswona ndzi velekiwe ndzi ri ni rihanyo lerinene. Kambe loko ndzi ri ni tin’hweti ta tsevu, ndzi lo na swi pfuketana ndzi nga ha swi koti ku kasa. Endzhaku ka tin’hweti timbirhi, a ndzi nga ha koti nchumu. Madokodela ya laha ndzi tshamaka kona ma hlamarile, tanihi leswi vana van’wana va le Tapachula a va karhatiwa hi vuvabyi lebyi. Kutani dokodela wa marhambu la humaka eDorobeni ra Mexico u tile a ta hi kambela. Ku kumiwe leswaku hi ni vuvabyi byo khwanyana swirho.

Loko ndzi ri ni malembe manharhu, ndzi endliwe vuhandzuri lebyi katsaka tinyonga, matsolo ni mahlakala. Endzhakunyana katla ra mina ra xinene na rona ri vavisekile. Loko ndzi ri ni malembe ya tsevu, ndzi yisiwe exibedlhele xa vana eDorobeni ra Mexico leswaku ndzi ya tshunguriwa. Manana a a tirha epurasini ra le Chiapas, kutani ndzi tshame eDorobeni ra Mexico ni kokwa wa mina wa xisati. Hambiswiritano, minkarhi yo tala a ndzi tshama ndzi ri exibedlhele.

Loko ndzi ri na kwalomu ka malembe ya nhungu, ndzi ringete ku famba. Kambe endzhakunyana swi nyanyile kutani a ndzi nga ha swi koti ku famba. Kutani madokodela ma ndzi byele leswaku ndzi fanele ndzi tirhisa tinhonga ni tintangu to tiyisa milenge vutomi bya mina hinkwabyo.

Loko ndzi ri ni malembe ya 15, ndzi endliwe vuhandzuri ka 25. Vuhandzuri lebyi byi endliwe eka longo, milenge, matsolo, mahlakala ni swikunwana. Eka vuhandzuri byin’wana ni byin’wana, ndzi hete nkarhi ndzi ri karhi ndzi deyisiwa leswaku ndzi kota ku tifambela. Endzhaku ko endliwa vuhandzuri byin’wana emilengeni, ndzi hoxiwe semendhe. Loko semendhe yi susiwile, a ndzi fanele ndzi endla vutiolori byo vava swinene.

Ku Kuma Nchavelelo Wa Xiviri

Loko ndzi ri ni malembe ya 11, manana u ndzi endzerile loko ndzi ri karhi ndzi hlakarhela eka vuhandzuri bya mina. U dyondze leswaku Yesu u hanyise vavabyi hambi ku ri ku endla leswaku lava omeke swirho va famba. U ndzi nyike magazini wa Xihondzo xo Rindza, lowu kandziyisiweke hi Timbhoni ta Yehovha laha a swi dyondzeke kona swilo leswi. Ndzi wu veke ehansi ka xikhigelo xa mina, kambe siku rin’wana ndzi kume wu nga ha ri kona. Vaongori va kume magazini wolowo kutani va wu teka. Va ndzi hlekurile hikwalaho ko wu hlaya.

Endzhaku ka lembe, manana u tlhele a ta eChiapas leswaku a ta ndzi vona. Hi nkarhi wolowo a a dyondza Bibele ni Timbhoni. U ndzi tele ni buku leyi nge From Paradise Lost to Paradise Regained. Manana u te, “Loko u lava ku hanya emisaveni leyintshwa leyi tshembisiweke laha Yesu a nga ta ku hanyisa, u fanele u dyondza Bibele.” Kutani ku nga khathariseki nkaneto wa kokwana, loko ndzi ri ni malembe ya 14 ndzi sungule ku dyondza ni Timbhoni. Haxawa xa kona ndzi boheke ku huma exibedlhele hikuva a ku tshama vana ntsena.

Ndlela Leyi Ndzi Langutaneke Ni Swiphiqo Ha Yona

Ndzi tshikilelekile swinene. Hikwalaho ka nkaneto wa kokwana, ndzi boheke ku tlhelela eChiapas leswaku ndzi ya tshama ni vatswari va mina. Hambiswiritano, a ku ri ni swiphiqo ekaya hikuva Tatana a ri xilovekelo. Hi ku famba ka nkarhi a ndzi nga xi voni xivangelo xo hanya. A ndzi ehleketa ku tidlaya. Kambe loko ndzi ri karhi ndzi ya emahlweni ni ku dyondza Bibele, langutelo ra mina ri cincile. Xitshembiso xa Bibele xa paradeyisi ya laha misaveni xi ndzi tsakisile.

Ndzi sungule ku bula ni van’wana malunghana ni ntshembo wo tsakisa lowu Bibele yi wu tameleke. (Esaya 2:4; 9:6, 7; 11:6-9; Nhlavutelo 21:3, 4) Eku heteleleni, hi May 8 1968, loko ndzi ri ni malembe ya 18, ndzi khuvuriwile ndzi va Mbhoni ya Yehovha. Ku sukela hi 1974, a ndzi vika tiawara to tlula 70 hi n’hweti ndzi ri karhi ndzi byela van’wana hi ntshembo lowu ndzi susumeteleke leswaku ndzi hambeta ndzi hanya.

Vutomi Lebyi Tsakisaka Ni Lebyi Enerisaka

Hi ku famba ka nkarhi, mina na Manana hi rhurhele edorobeni ra le Tijuana ekusuhi ni ndzilakano lowu nga exikarhi ka Mexico na United States. Hi tshame swin’we endhawini leyi a hi ta kota ku tihanyisa. Ndza ha swi kota ku jika-jika endlwini hi tintangu to tiyisa milenge ni tinhonga naswona ndzi tirhisa xitulu xa vanhu vo lamala laha ndzi kotaka ku sweka hambi ku ri ku hlantswa ni ku ayina swiambalo. Leswaku ndzi ya ensin’wini, a ndzi chayela xigolonyana lexi tirhaka hi gezi lexi a xi pfumelelana ni swilaveko swa mina.

Handle ko dyondzisa vanhu tidyondzo ta Bibele eswitarateni ni le makaya ya vona, nkarhi na nkarhi a ndzi endzela xibedlhele xa le kusuhi naswona a ndzi chumayela vanhu lava nga ehandle lava rindzeleke dokodela. Loko ndzi hete ku bula na vona, a ndzi famba hi xigolonyana xa mina ndzi ya emakete leswaku ndzi ya xava swilo leswi a hi swi lava kutani ndzi tlhelela ekaya ku ya pfuna Manana ku sweka ni ku endla mintirho ya le ndlwini.

Leswaku hi kuma mali yo tihanyisa, a ndzi xavisa swiambalo leswi nga riki swintshwa. Manana sweswi u ni malembe ya 78 naswona a nga ha swi koti ku famba hikuva u khomiwe hi vuvabyi bya mbilu kanharhu. Kutani a ndzi n’wi nyika mirhi ni swakudya leswi faneleke. Ku nga khathariseki rihanyo ra hina, hi tikarhatela ku va kona eminhlanganweni ya vandlha. Vanhu vo tlula 30 lava a ndzi dyondza na vona Bibele eka malembe yo tala, sweswi na vona i vachumayeri va mahungu lamanene.

Ndza tiyiseka leswaku xitshembiso xa Bibele xi ta hetiseka, lexi nge: “Hi nkarhi wolowo [emisaveni leyintshwa ya Xikwembu] la khutaka u ta tlula kukota mhunti.” Sweswi, Rito ra Xikwembu ra ndzi chavelela: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama.”—Esaya 35:6; 41:10.a

[Nhlamuselo ya le hansi]

[Xifaniso lexi nga eka tluka 12]

A ambale tintangu to tiyisa milenge a ri ni malembe ya nkombo

[Xifaniso lexi nga eka tluka 13]

Ensin’wini, a ndzi famba hi xigolonyana lexi tirhaka hi gezi lexi a xi pfumelelana ni swilaveko swa mina