Ta Rivala
Vanhu va le Jarimani lava nga endleki ni kotara lava nga ehansi ka malembe ya 40, va tala ku khongela ni vana va vona siku ni siku naswona eka swirho swa kereke, ko va mune ntsena eka swa khume leswi tekaka xikhongelo xi ri xa nkoka.——APOTHEKEN UMSCHAU, GERMANY.
Mbewu ya vununa leyi nyikeriweke yi tlhela yi kamberiwa ni ku kumeka leswaku a yi na switekela swo karhi, ku kumeke leswaku eka vana lava yi va tswaleke, va kaye eka va 24 va kumeke va ri ni vuvabyi bya mbilu lebyi vangiweke hi xitekela. Naswona un’wana wa vona u fe hi vuvabyi bya mbilu lebyi n’wi dlayeke a ri ni malembe mambirhi.—JAMA, U.S.A.
“Vanhu lava tlulaka 50 wa tiphesente va le Rhaxiya va kholwa leswaku vukanganyisi a byi papalateki naswona munhu u hanya a kala a fa byi ri kona.”—RIA NOVOSTI, RUSSIA.
Vanghana Va Xiviri Se Va Kala
Phepha-hungu ra Daily Telegraph ra le London ri ri: “Vaaki va le Britain, hi xiringaniso va kota ku va ni vanghana vanharhu va xiviri lava va nga va tshembeka.” Hi ku ya hi nkambisiso wun’wana, xivangelo xin’wana lexi endlaka leswaku munhu a tsandzeka ku vulavurisana “ni vanghana vakwe va kwalomu ka 36 emalembeni lama hundzeke” hi leswi a “tshamaka a khomekile,” ‘ni ku ti hambanisa handle ka xivangelo’ naswona 43 wa tiphesente va tihambanise ni vanghana va vona hi leswi va “tshameke va tlulana milenge . . . kutani va tibyela leswaku a va nge he pfuki va vulavurisanile.” Munhu un’we eka vantlhanu u phofulela vatirhi-kulobye ta le mbilwini, hikwalaho ka leswi “ku nga riki na munhu un’wana loyi a nga kombelaka mpfuno eka yena.” Muvulavuleri wa lava endleke ndzavisiso u te: “Swi lava matshalatshala yo hlawuleka leswaku munhu a tshembiwa ni ku va van’wana va titshega ha yena.”
Swikwekwetsu-Leswi Ngungumerisaka Swidzidziharisi
Maendlelo lama tirhisiwaka hi vangungumerisi va le Colombia leswaku va ngungumerisa swidzidziharisi swa khokheyini va swi yisa eAmerika Xikarhi, Mexico ni le United States ma ya ma rharhangana swinene. Ku sukela hi 1993, mfumo wa Colombia wu sive swikwekwetsu swa 42 swa vangungumerisi va swidzidziharisi naswona va khomiwile. Ku tshuburiwe tindhawu to hlayanyana leti swikwekwetsu leswi swi endliwaka eka tona. Hambileswi swikwekwetsu leswi leswi tirhisaka dizele swi nga nyuperiki ematini, a swi olovi ku swi vona hi muchini wa radar. Swin’wana a swi kota ku famba tikhilomitara ta 3 200 swi rhwala kwalomu ka tsevu ku ya eka khume wa tithani ta khokheyini naswona ku swi endla swi nga dya kwalomu ka nkombo wa timiliyoni.
Ku Dya Tanihi Ndyangu Swa Vuyerisa
Vantshwa lava nga endliki ni hafu lava nga ni malembe ya 14 ku ya eka 16 va le Finland, lava ku burisaniweke na vona va dya ni mindyangu ya ka vona. Mbulavurisano wolowo wu paluxe leswaku mindyangu yo tala a yi dyi swin’we. Hambiswiritano, vantshwa va swi rhandza ku dya ni mindyangu ya ka vona nkarhi na nkarhi. Phepha-hungu ra Helsingin Sanomat ri vula leswaku loko va vutisiwa leswaku i yini leswi va lavaka leswaku vatswari va vona va va endlela swona: “I swakudya swo kufumela, ku dya swin’we tanihi ndyangu ni ku va va yingiseriwa loko va vulavula ni ku nyikiwa nkarhi. Ku dya swin’we tanihi ndyangu swi endla leswaku miehleketo ya muntshwa yi tirha kahle. Xihloko xexo xi vula leswaku “vantshwa lava dyaka ni mindyangu ya ka vona hakanyingi va pasa exikolweni, a va dzahi, a va nwi kumbe ku tirhisa swidzidziharisi naswona a va na ntshikilelo.”