Bokisi Ra Swakudya Ri Nyikela Vumbhoni

EMASIKWINI lama landzeleke ku tsekatseka ka misava eKobe, le Japan, hi January la hundzeke, vanhu va le tindhawini leti khumbekeke a swi va tikela ku kuma swakudya. Hambi swi ri tano, Timbhoni ta Yehovha a ti swi pfumalanga swakudya, hikwalaho ka mpfuno wa tintswalo wo huma eka vamakwavo. Eka masiku ma nga ri mangani ya le ndzhaku ka ku tsekatseka, mavandlha ya le kusuhi ma va lunghiselele swigadana swa rhayisi. Ku nga ri khale, vanghana lava khathalelaka a va va nyika mabokisi ya swakudya. Eka mabokisi ya swakudya vo tala a va namekete swiphephana leswi chavelelaka lava weriweke hi khombo. Lava va kumeke swakudya leswi va vula leswaku swakudya hinkwaswo a swi ri karhi swi “lungiwa hi munyu” wa mihloti ya vona tanihi leswi a va nga swi koti ku yi sivela ku huma loko va ri karhi va hlaya swiphephana leswi.

Timbhoni ta Yehovha ti dye swakudya swa tona ni van’wana lava a va pfumala. Mbhoni yin’wana a yi ri karhi yi dya swakudya swa yona swa ni nhlikanhi loko yi ri karhi yi famba hi movha ni mutirhi-kulobye la nga riki Mbhoni la tirhaka ekhampanini yin’we na yona. Kutani yi n’wi nyika rin’wana ra mabokisi ya swakudya leri yi ri kumeke.

Hi loko munghana wa yena a vutisa a ku: “Xana u ri xave kwihi bokisi leri ra swakudya?” Kutani makwerhu loyi a hlamusela ntirho wo phalala wa Timbhoni. “I khale ndzi hetelele ku dya matsavu. Ndzi ta ma veka ivi ndzi ya na wona ekaya ndzi ya nyika ndyangu wa mina,” ku vula wanuna loyi hi ku tlangela.

Loko a amukela bokisi ra vunharhu, munghana loyi u humese ti-yen ta 3 000 (kwalomu ka 125 wa tirhandi) a nyika Mbhoni leyi ivi a ku: “Ndzi tolovelane na yona mintirho ya n’wina, xisweswo ndzi kombela u ndzi pfumelela ndzi nyikela entirhweni wa n’wina. Ndzi nkhensa ku ndzi ha swakudya swa wena. Hakunene, vamakwenu hinkwavo i vanhu lavanene.”