Leti Humaka Eka Vahlayi

Swiharhi Ni Swimilana Swa Mixaka Yo Tsakisa eKhwatini Ra Amazon(April 2010) Xihloko xa n’wina xi vule leswaku Maawajun (Aguaruna) ma gandzela swikwembu swa ntlhanu. Tanihi leswi ndzi nga Muawajun, a ndzi pfumelelani na yona mhaka leyi. Ndzi ehleketa leswaku mi endle xihoxo hikuva vunyingi bya Maawajun ma vula leswaku i Vakreste naswona a hi gandzeli swikwembu swa ntlhanu hilaha magazini wa n’wina wu vuleke hakona. Tanihi leswi Maawajun ma tshamelaka ku hlaya magazini wa n’wina, hi kombela mi lulamisa xihoxo lexi.

T.P.T. wa le Peru

“Xalamuka!” ya hlamula: Mutsari u hlanganise rungula leri humaka eswihlobyeni swo hambana-hambana, ku katsa ni leri a ri kumeke eka vaaki va Maaguaruna lava a vulavurisaneke na vona ni le ka tibuku tin’wana. Yin’wana ya tona hi leyi nge “Atlas Regional del Perú,” ya 2004 leyi vulavulaka hi mavito ni tinhlamuselo ta swikwembu swa ntlhanu swa Maaguaruna. Kambe hilaha na wena u swi xiyeke hakona, Maaguaruna man’wana se ma tivula Vakreste. Hi kombela ku khomeriwa eka xihoxo lexi hi xi endleke.

Ndlela Yo Lwisana Ni Manghanghamela (May 2010) Ndza xi nkhensa swinene xihloko lexi. Na mina ndzi ni manghanghamela naswona minkarhi yo tala ndzi titwa ndzi ri ni xivundza. Kambe endzhaku ko hlaya xihloko lexi, ndzi swi xiyile leswaku a ndzi ndzexe. Sweswi ndzi tiyimiserile ku langutana ni xiyimo xa mina naswona ku fana na Rafael, “loko rito ro karhi ri ndzi nghanghamerisa, ndza hleka.”

Y. S. wa le Japani

Vantshwa Va Vutisa . . . I Yini Leswi Ndzi Nga Swi Endlaka Leswaku Ndzi Titshemba? (May 2010) Ndzi ni malembe ya 12 naswona ndzi tshama na Manana la vabyaka swinene la ndzi kurisaka ndzi ri ndzexe. Loko ndzi hlaya xivutiso lexi nge “Xana u titwa onge vanhu va ku rhandza?” ndzi vule leswaku a ndzi titwi hi ndlela yoleyo. Mhaka leyi yi ndzi twisa mbilu ku vava. Kutani ndzi vulavule hi yona ni Vakreste van’wana lava wupfeke ni mana wa mina. Xihloko lexi xi ndzi pfune ndzi twisisa leswaku a ndzi fanelanga ndzi tiavanyisa hi ndlela yo vava. Ku ni vanhu vo tala lava ndzi rhandzaka. Ndza nkhensa hileswi mi ndzi pfuneke ku vona ndlela leyi Yehovha a va rhandzaka ha yona vantshwa.

C. H. wa le Furwa

Xihloko lexi xi ndzi pfunile leswaku ndzi langutana ni swilo swo vava leswi ndzi humeleleke ni ku karhateka hi ku va minkarhi yin’wana ndzi titwa ndzi nga pfuni nchumu. A ndzi nge ti rivali tindlela tinharhu leti ndzi pfuneke leswaku ndzi titshemba, leti ku vulavuriweke ha tona eka xihloko lexi, ngopfu-ngopfu xikombiso xa mali leyi handzukeke katsongo. Ndzi xi tlangela swinene xihloko lexi!

S. W. wa le South Korea