“A Ndzi Fanga”

● Xana wa xi tiva xiphato lexi? Xana u tshame u twa vanhu va xi yimbelela? Eka makume ya malembe lama ha ku hundzaka, xiphato lexi xi chavelele vanhu vo tala emisaveni hinkwayo. Emalembeni lama nga hundza, vatlhokovetseri vo tala va tsale ha xona. Vanhu van’wana va kale va vula nileswaku i xikhongelo lexi vanhu va le Navajo va xi tirhisaka loko va ri emasirheni. Hi Xinghezi a xi tiviwi hi marito ya xona yo gimeta lama tshahiweke laha henhla, kambe xi tiviwa hi marito ya xona yo sungula lama nge: “U nga yimi esirheni ra mina u rila.”

Emalembeni lama ha ku hundzaka xiphato lexi a xi yimbeleriwa ngopfu eJapani, kambe xi tlhele xi pfilunganya vanhu vo tala. Hakanyingi vanhu va le Japani va ya emasirheni ya swirho swa mindyangu ya vona leswaku va swi xixima hileswi va ehleketaka leswaku swa ha hanya. Leswi xiphato lexi xi dyondzisaka leswi hambaneke ni leswi va swi pfumelaka, vo tala va tivutisa leswaku, “Vafi va kwihi?”

Mabudha ya le Japani ma khoma minkosi yo leha, ma endla mirindzelo ni mintirho yo tsundzuka vafi. Kambe yo tala ya wona swa ha ma tikela ku hlamula xivutiso lexi nge, Vafi va kwihi? Kumbe swivutiso swin’wana swo tanihi leswi nge, Xana vanhu va vukhongeri ni va le matikweni man’wana va ya endhawini yin’we? Ha yini vafi va nga hi hlamuli?

Vanhu vo tala va ehleketa leswaku a ti kona tinhlamulo ta swivutiso sweswo naswona ku lavana ni tinhlamulo ta swona i ku tlanga hi nkarhi. Kambe u nga ha tivutisa, ‘Ku endleka yini hi hina loko hi fa?’ Nhlamulo ya xivutiso lexi yi kona. Bibele yi vula leswaku Xikwembu xi vumbe mpatswa wo sungula kutani xi wu veka entangeni wo saseka. Loko a wu yingise Xikwembu a wu ta hanya hilaha ku nga heriki emisaveni leyi nga Paradeyisi. Kambe a wu xi yingisanga.

Kutani Xikwembu xi teke goza. Xi hlongole mpatswa wolowo eParadeyisini kutani xi nga ha wu khathaleli. Xi hlamusele vuyelo bya ku nga yingisi ka wona xi ku: “Hikuva u ntshuri u ta tlhelela entshurini.” Munhu u endliwe hi ntshuri naswona loko a fa u tlhelela entshurini.—Genesa 2:7; 3:19.

Wanuna wa le dorobeni ra Kofu le Japani, la tirhaka emasirheni u te: “Swibya swo chela nkuma wa vafi ni marhambu ya vona swi va swi tele loko ndzi swi celela. Endzhaku ka malembe ya kwalomu ka ntlhanu, ku va ku sele hafu. Kambe endzhaku ka malembe ya khume ku va ku nga ha ri na nchumu.” Mimiri ya hina yi endliwe hi misava naswona hi ku famba ka nkarhi yi hundzuka misava. Kutani i yini lexi salaka?

Hambileswi vutomi byi helaka loko munhu a fa, Muvumbi wa hina wa rirhandzu loyi a vonaka ni xindzingiri loko xi fa, a nga hi rivali. (Matewu 10:29-31) U ta hi pfuxa hilaha a tshembiseke hakona. U ta hi vitana laha hi nga ta va hi etlele kona ivi hi pfuka.—Yobo 14:13-15; Yohane 11:21-23, 38-44.

Loko u lava ku tiva leswi engetelekeke hi mhaka leyi, hi kombela u tsalela vakandziyisi va magazini lowu, lava nga ta tsakela ku ku pfuna kumbe u endzela Website leyi nge www.watchtower.org.