Vantshwa Va Vutisa

Xana Ho Va Vanghana Ntsena?—Xiyenge 1

LOKO U HLAYA NHLOKO-MHAKA LEYI, XANA U KONA LOYI A TEKE EMIEHLEKETWENI YA WENA?

INA E-E

↓ ↓

Eka xivulwa lexi landzelaka, fungha leswaku i ntiyiso kumbe i mavunwa:

A ndzi fanelanga ndzi va ni vanghana va rimbewu leri hambaneke ni ra mina loko ndzi nga si tiyimisela ku nghenela vukati.

․․․․․ NTIYISO ․․․․․ MAVUNWA

Xiya: Yesu a a ri ni vanghana va rimbewu leri hambaneke ni ra yena, hambileswi a a nga tiyimiselanga ku teka. (Matewu 12:46-50; Luka 8:1-3) Hambi ku ri Timotiya loyi a nga ri na nsati, a a ri na vona vanghana vo tano, hikuva muapostola Pawulo u n’wi byele leswaku a khoma “vamakwenu vaxisati hi vutengi hinkwabyo.”—1 Timotiya 5:1, 2.

Pawulo a a swi xiya leswaku Timotiya a a ta hlangana ni vanhwanyana vo tala loko a endzela mavandlha. (Marka 10:29, 30) Xana a swi ta va swi hoxile ku va Timotiya a endla xinghana na vona? Doo! Kambe leswi a a nga si lava ku nghenela vukati, a a fanele a tivekela swipimelo leswaku a nga tikumi a rhandzana na vona kumbe a tlanga hi mintlhaveko ya vona.—Luka 6:31.

Wena ke? Xana se u swi lunghekerile ku nghenela vukati?

Loko nhlamulo ya wena ku ri INA ⇨ Vunghana bya wena ni vanhu va rimbewu leri hambaneke ni ra wena byi nga endla leswaku u tikumela munghana wa vukati.—Swivuriso 18:22; 31:10.

Loko nhlamulo ya wena ku ri E-E ⇨ U fanele u tivekela swipimelo. (Yeremiya 17:9). Kambe leswi a hi matlangwana. Nia la nga ni malembe ya 18 u ri: “A swi olovi ku tshama mi ri vanghana ntsena ni munhu wa rimbewu leri hambaneke ni ra wena. A swi olovi ku tiva laha vunghana bya n’wina byi faneleke byi helela kona.”a

Ha yini u fanele u tivekela swipimelo? Hikuva loko u nga swi veki, u ta vaviseka kumbe u vavisa van’wana. Xiya xivangelo xa kona.

NTIYISO WA MHAKA: Ku rhandza munhu u nga si lunghekela ku nghenela vukati, swi nga vavisa un’wana wa n’wina. Kelli, la nga ni malembe ya 19 u ri: “Sweswo swi ndzi humelele kambirhi. Ro sungula ndzi tikume ndzi rhandza jaha ro karhi, kasi ra vumbirhi, jaha ro karhi ri sungule ku ndzi rhandza. Eka swiyimo leswimbirhi, a ku va ni loyi a twaka ku vava naswona ndza ha twa ku vava ni sweswi.”

Anakanyisisa hi swivutiso leswi landzelaka:

● U nga endla xinghana ni munhu wa rimbewu leri hambaneke ni ra wena loko swi te yini? Hi swihi swiyimo leswi u nga ta va u endla kahle loko u swi papalata?

● Ha yini ku nga ri vutlhari ku tikuma u ri ni munhu un’we minkarhi hinkwayo? Xana munhu yoloye a nga ehleketa yini? Xana wena u nga ehleketa yini?

“Minkarhi yin’wana a ndzi tixisa ndzi ku, ‘Ho va vanghana ntsena. Ndzi n’wi teka ku fana ni buti wa mina.’ Kambe loko ndzi vona onge u tsakela nhwanyana un’wana, a swi ndzi vava—onge hiloko a fanele a tshama a ri na mina ntsena.”—Denise.

Bibele yi ri: “Munhu la twisisaka, u vona khombo ra ha ri kule, kutani a tumbela, kasi lowo-ke-mano, u tihoxa eka rona, kutani endzhaku a tilaya.”—Swivuriso 22:3, Bibele—Mahungu Lamanene.

NTIYISO WA MHAKA: Ku rhandza munhu u nga si lunghekela ku nghenela vukati, swi nga dlaya vunghana bya n’wina. Kati, la nga ni malembe ya 16 u ri: “Mina ni jaha rin’wana a hi rhumelana marungula hi selfoni, kambe swi nga si ya kwihi, ri sungule ku ndzi rhumela marungula ya rirhandzu naswona se a hi rhumelana ko tala. Siku rin’wana ri ndzi gangisile, kambe mina a ndzi nga ri lavi. Endzhaku ka sweswo, a hi nga ha buli ngopfu naswona vunghana bya hina byi helele kwalaho.”

Anakanyisisa hi swivutiso leswi landzelaka:

● I mani la tweke ku vava eka xiyimo xa Kati naswona ha yini? Xana a va ta va va byi papalatile vuyelo byebyo? Loko swi ri tano, njhani?

● Munhu a nga swi kombisa njhani leswaku u lava mi rhandzana loko mi rhumelana marungula hi selfoni?

“Minkarhi yin’wana ndzi boheka ku tikhoma leswaku ndzi nga heti nkarhi wo leha ni jaha ro karhi. Swa tsakisa ku dzumba ni vafana, kambe a ndzi nga swi lavi ku onha vunghana bya hina hi ku va hi sungula timhaka to rhandzana.”—Laura.

Bibele yi ri: “Lowo tlhariha u xiyisisa magoza yakwe.”—Swivuriso 14:15.

Mhaka leyi u faneleke u yi tsundzuka: Ku dzumba ni vanhu va rimbewu leri hambaneke ni ra wena a swi bihanga. Kambe loko u nga si tiyimisela ku nghenela vukati u fanele u tivekela swipimelo.

EKA XIHLOKO LEXI NGA TA LANDZELA LEXI NGE “VANTSHWA VA VUTISA” . . .

Ku ta hlamuseriwa ndlela leyi ku tikuma u rhandza munhu u nga si lunghekela ku nghenela vukati swi nga ri thyakisaka ha yona vito ra wena.

Swihloko swin’wana leswi nge “Vantshwa Va Vutisa” swi kumeka eka Web site ya www.watchtower.org/ype

[Nhlamuselo ya le hansi]

[Bokisi/Xifaniso lexi nga eka tluka 16]

A WU TA ENDLA YINI?

MHAKA YA XIVIRI: “Mina ni jaha rin’wana leri nga munghana wa mina a hi rhumelana marungula hi selfoni. Jaha ra kona ri tshama eka mpfhuka lowu tlulaka tikhilomitara ta 1 500. A hi rhumelana kan’we hi vhiki. A ndzi nga ri rhandzi naswona a ndzi vona onge na rona a ri ndzi rhandzi. Siku rin’wana ri ndzi rhumele rungula leri: ‘Xiluva xo saseka, ndzi ku tsundzukile! U endla yini?’ Ndzi heleriwe hi marito! Ndzi ri byele leswaku a ndzi ehleketa leswaku ho va vanghana ntsena naswona a ndzi ri rhandzi. Ri ndzi rhumele rungula rin’wana ri ku, ‘A hi swi tshike.’ A ra ha tlhelanga ri ndzi rhumela.”—Janette.

● Loko u nga si swi lunghekela ku nghenela vukati kumbe u nga tiyimiselanga ku byi nghenela, u nga endla yini loko wo rhumeriwa rungula ro fana ni leri rhumeriweke Janette?

● Loko u ri jaha, u ehleketa leswaku swi hoxe kwihi ku rhumela rungula leri rhumeriweke Janette? Ha yini u vula tano?

● Xana u vona onge ku rhumela marungula hi selfoni swi endla leswaku vanhu va hatla va rhandzana ku tlula ku va va vulavula va langutanile? Ha yini u vula tano?

[Bokisi leri nga eka tluka 17]

HA YINI U NGA VUTISI VATSWARI VA WENA?

Kombela vatswari va wena va ku byela leswi va swi ehleketaka hi swivutiso leswi nga eka mathonsi exihlokweni lexi. Xana langutelo ra vona ra hambana ni ra wena? Loko swi ri tano, njhani? Hi yihi yinhla ya nkoka eka leswi va swi vulaka?—Swivuriso 11:14.

[Bokisi/Swifaniso leswi nga eka tluka 17]

LESWI TINTANGHA TA WENA TI SWI VULAKA

Joshua—Ku heta nkarhi wo tala ni munhu un’we swi nga endla leswaku mi sungula ku rhandzana.

Natasha—Loko mi tiyimisele ku va vanghana ntsena kambe mi tshamela ku hungasa swin’we, swi nga endla leswaku mi sungula ku rhandzana.

Kelsey—Hambiloko mo sungula hi ku va vanghana, swa olova leswaku mi sungula ku rhandzana loko mi heta nkarhi wo tala swin’we. Mi nga va vanghana, kambe swi lava leswaku mi ringanisela.

[Xifaniso lexi nga eka tluka 16]

Ku rhandza munhu u nga si lunghekela ku nghenela vukati, swi nga ku hoxa ekhombyeni