U Nga Dyondza Ku Va Munhu Wo Rhula

HAMBILESWI hi nga ha velekiwaka hi ri ni mikhuva yo karhi yo biha, hi ntolovelo ku va ni madzolonga swo dyondziwa. Swi tano ni hi ku va munhu wo rhula. Kambe i mani loyi a nga hi dyondzisaka ku va ni ku rhula ka xiviri? Entiyisweni, Muvumbi wa hina hi yena loyi a nga ni vulawuri lebyi tlakukeke ni vutlhari lebyi nga pimekiki. Kambisisa tinhla ta ntlhanu leti landzelaka ni marito ya vutlhari lama fambisanaka na tona lama kumekaka eBibeleni.

1 “U nga n’wi naveli munhu wa madzolonga.” (Swivuriso 3:31) Munhu loyi a nga ni matimba hakunene hi loyi a nga ni timfanelo to tanihi ku tikhoma ni ku rhula. Swivuriso 16:32 yi ri: “Loyi a hlwelaka ku hlundzuka wa antswa ku ri ni wanuna wa matimba.” Ku fana ni khumbi ro tiya leri pfalelaka mati ya le dan’wini, u kota ku tiyiselela ku tlhontlhiwa. Entiyisweni, loko munhu a n’wi karihela, u hlamula hi moya wo rhula, xisweswo a “tlherisa vukarhi.” (Swivuriso 15:1) Hambiswiritano, munhu loyi a hatlaka a kariha, wa hlundzuka hambiloko a tlhontlhiwa hi nchumu lowu nga nyawuriki.—Swivuriso 25:28.

2 Hlawula vanghana va wena hi vutlhari. Swivuriso 16:29 yi ri: “Munhu wa madzolonga u ta kanganyisa munhu-kulobye.” Hi hala tlhelo, “loyi a fambaka ni vanhu vo tlhariha u ta tlhariha.” (Swivuriso 13:20) Loko hi aka xinghana ni vanhu vo rhula ni lava kotaka ku tikhoma, a swi kanakanisi leswaku hi ta ringeta ku va tekelela.

3 Tikarhatele ku rhandza vanhu van’wana. Nhlamuselo leyinene ngopfu ya rirhandzu leyi tshameke yi tsariwa yi kumeka eka 1 Vakorinto 13:4-7. Xiphemu xa yona xi hlayekisa xileswi: “Rirhandzu ri ni mbilu yo leha ni musa. . . . A ri hlundzuki. A ri hlayisi mhaka yo biha. . . . Ri byarha swilo hinkwaswo, . . . ri tiyisela swilo hinkwaswo.” Yesu u vule leswaku loko hi lava ku tekelela rirhandzu leri Xikwembu xi nga na rona, hi fanele hi rhandza hambi ku ri valala va hina.—Matewu 5:44, 45.

4 Tshemba leswaku Xikwembu xi ta avanyisa lavo homboloka. “Mi nga tlheriseli swo biha hi swo biha hambi eka mani. . . . Loko swi koteka swi titshege hi n’wina, vanani ni ku rhula ni vanhu hinkwavo. Mi nga tirihiseli, varhandziwa, . . . hikuva ku tsariwile: ‘Ku rihisela i ka mina; hi mina ndzi nga ta tlherisela, ku vula Yehovha.’” (Varhoma 12:17-19) Loko hi tshemba Xikwembu ni switshembiso swa xona, hi va ni ku rhula lokukulu loku vanhu lava nga riki na ripfumelo va nga ta ka va nga pfuki va ku twisisile.—Pisalema 7:14-16; Vafilipiya 4:6, 7.

5 Tshemba leswaku Mfumo wa Xikwembu wu ta tisa ku rhula ka xiviri laha misaveni. Mfumo wa Xikwembu i hulumendhe ya le tilweni leyi nga ta herisa vanhu hinkwavo vo homboloka ku nga ri khale kutani yi fuma misava hinkwayo. (Pisalema 37:8-11; Daniyele 2:44) Ehansi ka Mfumo wolowo, “lowo lulama u ta hluka, ni ku rhula ku ta andza ku fikela n’weti wu nga ha vi kona.”—Pisalema 72:7.

Tidyondzo to tano ta Bibele ti pfune vanhu va timiliyoni—ku katsa ni vanhu van’wana lava a va rhandza madzolonga—leswaku va rhandza ku rhula. Xiya xikombiso xa Salvador Garza.