Tinsiva Leti Nga Voya Ta Xinyenyana Lexi Vuriwaka Emperor Penguin

XINYENYANA lexi xi nga hlambela hi ku hatlisa ematini xi tlhela xi tlulela endhawini leyi nga ayisi hi rivilo leri hlamarisaka. Njhani?

Xiya: Xinyenyana lexi xi pfalela moya endzeni ka tinsiva ta xona. Moya wolowo wu kufumeta xinyenyana lexi loko ku titimela ngopfu wu tlhela wu xi endla xi kota ku famba hi rivilo leri phindhiweke kambirhi kumbe kanharhu. Njhani? Vativi va swilo leswi hanyaka elwandle va ringanyete leswaku sweswo xi swi endla hi ku humesa swimbyarumbyaru leswitsongo swa moya exikarhi ka tinsiva ta xona. Loko swimbyarumbyaru swoleswo swi ri karhi swi huma, swi hunguta ku khuhlana hala handle ka tinsiva ta penguin, leswi endlaka leswaku xinyenyana lexi xi engetela rivilo.

Lexi tsakisaka, vanjhiniyara a va ri karhi va dyondza tindlela to endla swikepe leswi fambaka hi ku hatlisa swi tirhisa swimbyarumbyaru leswaku swi hunguta ku khuhlana ni miri wa swona. Hambiswiritano, vakambisisi va pfumela leswaku swa tika ku endla ndzavisiso lowu engetelekeke hikuva “ndlela leyi tinsiva ta penguin ti rharhanganeke ha yona swi nga tika ku ti encenyeta eka nchumu lowu nga ni timbhovo lowu endliweke hi vanhu.”

U anakanya yini? Xana tinsiva leti nga voya ta xinyenyana lexi vuriwaka emperor penguin ti lo tiendlekela kumbe ti lo endliwa?