Dyondzo 30

Ku Vumba Nkulumo Leyi Hlanganaka

1-3. I xiphemu xihi lexi mahlanganisi ma nga na xona enkulumeni, naswona swi nga fikelerisiwa ku yini?

¹ Nkulumo leyi hlanganeke hi leyi yi olovelaka vayingiseri ku yi landzelela. Hi tlhelo rin’wana, loko ku hlangana ku nga ri kona, nyingiso wa vona wu ta lahleka hi xihatla. Hakunene, leyi i mhaka leyi lavaka nyingiso lowukulu loko u lunghiselela nkulumo; kutani “Ku hlanganisa nkulumo hi mahlanganisi” swi katsiwile eka xiphephana xa Ndzayo ya Nkulumo tanihi leswi swi lavaka nkhathalelo wa wena wa vukheta.

² Ku hlangana swi vula ku namarhelana swin’we, ku hlanganisa swiphemu swi khomana swinene swi endla nchumu wun’we. Nkarhi wun’wana leswi swi hetisisiwa hi mpimo lowukulu hi ndlela leyi landzelanaka leyi swiphemu swi hleriwaka ha yona. Kambe eka tinkulumo to tala ku na swiphemu leswi lavaka ku hlanganisiwa hi ndlela leyi tlulaka ku hlela mhaka ntsena. Etimhakeni to tano ku hlangana ku lava buloho ku suka eka yinhla yin’wana ku ya eka yin’wana. Marito kumbe swivulwa swi tirhiseriwa ku kombisa ku yelana exikarhi ka mianakanyo leyintshwa ni leyi hundzeke, xisweswo swi pfala mikhandlo hikwalaho ka ku cinca ka nkarhi kumbe ka malangutelo. Loku i ku hlanganisa hi ku tirhisa mahlanganisi.

³ Hi xikombiso, xingheniso, miri ni mahetelelo ya nkulumo ya wena i swiphemu leswi hambaneke swa nkulumo, swa siyana, kambe swi fanele swi hlangana swinene hi ku tirhisa ntlhandlamano. Ku engetela kwalaho, tinhla-nkulu ti fanele ti hlanganisiwa kun’we enkulumeni, ngopfu-ngopfu loko ti nga yelani ngopfu hi mianakanyo. Kumbe, minkarhi yin’wana i swivulwa kumbe tindzimana ntsena leswi lavaka mahlanganisi.

4-7. Ku tirhisa marito lama hlanganisaka swi vula yini?

⁴ Ku tirhisa marito lama hlanganisaka. Nkarhi na nkarhi buloho ri nga akiwa exikarhi ka mianakanyo hi ku tirhisiwa loku faneleke ka marito kumbe swivulwa leswi hlanganisaka ntsena. Man’wana ya wona hi lawa: nakambe, tlhandla-kambirhi, ku engetela kwalaho, ku tlula kwalaho, hi laha ku fanaka, hi ku fanana, hikwalaho, xisweswo, hi swivangelo leswi, hikokwalaho, hi ku ya hi leswi vuriweke, kutani, kutani ke, endzhaku ka sweswo, hambi swi ri tano, hi tlhelo rin’wana, ku hambana ni sweswo, hi ndlela yin’wana, eku sunguleni, ku fikela sweswi, ni swin’wana. Marito yo tano ma hlanganisa swivulwa ni tindzimana hi laha ku humelelaka.

⁵ Hambi swi ri tano, mfanelo leyi ya ririmi hakanyingi yi lava swo tala ku tlula mahlanganisi yo tano yo olova. Loko rito rin’we kumbe xivulwa xi ri xoxe xi nga ta anela, kutani ku laveka rihlanganisi leri hundzisaka vayingiseri hi ku helela eka mukhandlo wo karhi va ya eka tlhelo lerin’wana. Ku nga ha va xivulwa lexi heleleke kumbe ku engetela mianakanyo leyi hlanganisaka leyi phofuriweke hi xitalo.

⁶ Ndlela yin’wana leyi mikhandlo yo tano yi nga hlanganisiwaka ha yona i ku ringeta ku tirhisa yinhla leyi hundzeke yi va xiphemu xa xingheniso xa leswi landzelaka. Nkarhi na nkarhi leswi swa endliwa eka marungula ya hina ya yindlu na yindlu.

⁷ Ku tlula kwalaho, a hi tinhla leti landzelelanaka ntsena leti faneleke ti hlanganisiwa swin’we, kambe nkarhi wun’wana tinhla leti hambaneke swinene enkulumeni ti fanele ti hlanganisiwa. Hi xikombiso, mahetelelo ya nkulumo ma fanele ma hlanganisiwa ni xingheniso. Kumbexana mianakanyo kumbe xifaniso lexi nyikeriweke eku sunguleni ka nkulumo xi nga tirhisiwa hi ndlela leyi emahetelelweni yi nga ta khutaza kumbe yi kombisa hi laha ku engetelekeke ku yelana ka xifaniso kumbe mianakanyo ni xikongomelo xa nkulumo. Ku tlhela u vula xivumbeko xo karhi xa xifaniso kumbe mianakanyo hi ndlela leyi swi tirha tanihi rihlanganisi naswona swi endla mhaka yi hlangana.

8. Xana vayingiseri va khumba ku tirhisa mahlanganisi ya ntlhandlamano hi ndlela yihi?

⁸ Mahlanganisi ma fanela vayingiseri va wena. Mpimo lowu mahlanganisi ma faneleke ku tirhisiwa ku fikela eka wona wu ta kombisiwa hi vayingiseri va wena. A hi swona leswaku vayingiseri vo karhi a va lavi mahlanganisi. Ku ri na sweswo, vayingiseri vo karhi va lava lama engetelekeke, hi ku va va nga tolovelananga ni mianakanyo leyi nga ta hlanganisiwa. Hi xikombiso, Timbhoni ta Yehova ti nga ri hlanganisa hi ku olova tsalwa leri vulavulaka hi makumu ya mafambiselo ya sweswi ya swilo yo biha ni ndzimana leyi vulavulaka hi Mfumo. Kambe eka un’wana la langutaka Mfumo tanihi xiyimo xa mianakanyo kumbe nchumu wo karhi lowu nga embilwini ya wena, ku hlangana a ku nge twisisiwi hi ku olova naswona ku cinca ko karhi ka mianakanyo ku nga fanela ku tirhisiwa leswaku ku hlangana ku va erivaleni. Ntirho wa hina wa yindlu na yindlu nkarhi na nkarhi wu lava mindzulamiso yo tano.

**********

9-13. Nkulumo leyi landzelelanaka i yini, naswona hi tihi tindlela timbirhi ta xisekelo to vumba mhaka?

⁹ Xivumbeko xin’wana xa nkulumo lexi yelanaka na lexi swinene hi lexi nge “Nkulumo leyi landzelelanaka, leyi hlanganaka,” lexi na xona xi katsiweke eka fomo ya xitsundzuxo. I xilaveko lexikulu xa nkulumo leyi khutazaka.

¹⁰ Ku landzelelana i yini? Hi xikongomelo xa hina hi nga ha vula leswaku ku landzelelana i vutshila bya ku anakanya hi ndlela leyi twisisekaka, leyi tlhandlamanaka. Swi nyikela ku twisisa hikuva i ndlela leyi mhaka yi hlamuseriwaka ha yona hi swiphemu swa yona leswi hlanganeke. Ku landzelelana ku kombisa mhaka leyi swi tirhaka ni ku tshama swin’we ha yona. Mhaka yi hlanganile loko tinhla ta yona ti landzelela ku ndlandlamuka hakatsongo-tsongo lerova swiyenge hinkwaswo swi hlangana hi ku tlhandlamana ka swona. Mhaka leyi landzelelanaka yi nga ha vumbiwa hi ku ya hi nkoka wa tinhla ta yona, hi ndzandzelelano lowunene kumbe lowu sukaka eka xiphiqo wu ya eka ntlhantlho, ni swin’wana leswi kotekaka.

¹¹ Eku vumbiweni ka mhaka, ku na tindlela timbirhi ta xisekelo leti nga landzeriwaka. (1) Vula ntiyiso hi ku kongoma eka vayingiseri, u humesa tinhla to wu seketela. (2) Hlasela tidyondzo leti hoxeke, leti loko ti herisiwa, ti nga ta siya ntiyiso wu tipaluxa hi woxe. Kutani ke, leswi nga ta landzela ntsena i ku tirhisa mintiyiso leyi ku vulavuriwaka ha yona hi ndlela leyi faneleke.

¹² Ku hava swivulavuri swimbirhi leswi swi nga anakanyaka hi ndlela leyi fanaka kahle. Xikombiso lexi hetisekeke xa ku hlamusela mhaka yin’we hi tindlela to hambana xi le ku tsariweni ka Tievhangeli ta mune. Vadyondzisiwa va mune va Yesu va tsale timhaka ta vutirheli bya yena ha un’we-un’we. Ta hambana-hambana, kambe hinkwavo va tsale timhaka leti twalaka, leti landzelelanaka. Un’wana ni un’wana u vumbe mhaka ku hetisisa xikongomelo xo karhi, naswona hinkwawo va humelerile.

¹³ Mayelana ni leswi mutsundzuxi u fanele a vona xikongomelo xa wena naswona a ringeta ku pima ku landzelelana ka mianakanyo ya wena hi ku xiya loko xikongomelo xi hetisisiwile kumbe e-e. U nga pfuna yena ni vayingiseri va wena, hi ku endla xikongomelo xa wena xi twisiseka, ngopfu-ngopfu hi ndlela leyi u nghenisaka mhaka ya wena ha yona ivi u yi tirhisa emahetelelweni.

14, 15. Kombisa leswaku ha yini swi ri swa nkoka swinene leswaku hi andlala mhaka ya hina hi ndzandzelelano lowunene.

¹⁴ Mhaka leyi hlelekeke kahle. Xo sungula, loko u hlela mhaka ya wena kumbe phepha ra wena ra nkulumo, tiyiseka leswaku a ku na xivulwa kumbe mianakanyo leyi humesiwaka handle ko rhanga xi vekeriwa xisekelo. Tshama u ri karhi u tivutisa swivutiso leswi: Hi wihi nchumu lowu landzelaka lowu ndzi faneleke ku wu vula? Leswi ndzi fikeke laha, hi xihi xivutiso lexi twisisekaka lexi xi nga vutisiwaka? Loko u xi kumile xivutiso xa kona, xi hlamule. Vayingiseri va wena nkarhi hinkwawo va fanele va swi kota ku vula va ku: “Ku ya hi leswi ana se u swi vuleke ndza swi vona leswaku yinhla leyi yi tano.” Loko ku nga vekiwi masungulo, kutani yinhla hakanyingi yi ta langutiwa tanihi leyi yi nga le handle ka ntlhandlamano lowu twisisekaka. Ku kayivela xo karhi.

¹⁵ Loko u hlela mhaka ya wena u fanele u xiya tinhla leti hi ntolovelo ti titshegaka hi tin’wana. U fanele u ringeta ku vona vuxaka bya tinhla to tano ivi u ti hlela hi laha ku faneleke. Leswi swi fananyana ni ku aka yindlu. A nga kona muaki la nga ringetaka ku aka makhumbi a nga sungulanga hi ku veka masungulo. Naswona a nge ti nghenisi tiphayiphi ta mati endzhaku ka loko a rhiderile makhumbi. Swi fanele swi va tano ni le ku akeni ka nkulumo. Xiyenge xin’wana ni xin’wana xi fanele xi va ni xiphemu xa xona eku akeni ka nkulumo leyi tiyeke ni leyi hlanganeke, xin’wana ni xin’wana xi landzeleleka, xin’wana ni xin’wana xi engetela eka xiphemu lexi xi xi landzelaka ni ku pfula ndlela ya leswi swi nga ta ta. Nkarhi hinkwawo u fanele u va ni xivangelo xa ndlela leyi u nyikelaka tinhla ta wena ha yona enkulumeni ya wena.

16-20. Xana munhu a nga tiyiseka njhani leswaku u na mhaka leyi twananaka ntsena enkulumeni ya yena?

¹⁶ Ku tirhisiwa mhaka leyi yelanaka ntsena. Yinhla yin’wana ni yin’wana leyi u yi tirhisaka yi fanele yi hlangana swinene ni nkulumo. Loko yi nga hlangani, yi ta twala yi nga yelani, a yi nge faneli; yi ta va mhaka leyi nga twaliki, hi leswaku yi nga seketeli kumbe yi nga hlangani ni mhaka leyi hlamuseriwaka.

¹⁷ Hambi swi ri tano, mutsundzuxi wa wena a nge suketani a vula leswaku xo karhi a xi twali, lexi xi nga ha vonakaka xi nga yelani nikatsongo, kambe xi hlanganisiwe hi laha ku humelelaka. Swi nga ha endleka leswaku u hlawule ku tirhisa yinhla yo tano hi xikongomelo xo karhi, naswona loko yi fanela nhloko-mhaka, yi endliwa xiphemu xa nkulumo, naswona yi nghenisiwa eka ndzandzelelano lowunene, mutsundzuxi wa wena u ta yi amukela.

¹⁸ Mhaka leyi nga twaliki yi nga voniwa njhani hi xihatla na hi ku olova loko u lunghiselela nkulumo ya wena? Laha hi kona laha phepha ra nkulumo ra tinhloko-mhaka ri pfunaka swinene. Ri pfuna ku hlamusela rungula ra wena. Ringeta ku tirhisa makhadi kumbe xo karhi lexi fanaka, mhaka hinkwayo leyi yelanaka yi va eka khadi ra kona. Sweswi, tlhela u hlela makhadi lawa hi ku ya hi ndzandzelelano lowunene lowu u ehleketaka leswaku ma nga nyikeriwa kahle ha wona. Leswi a swi nge pfuni ku vona ndlela yo andlala mhaka ya wena ntsena kambe swi ta tlhela swi ku pfuna ku vona xihi na xihi lexi nga twananiki ni nhloko-mhaka. Tinhla leti nga faneliki eka ndzandzelelano ti fanele ti ololoxiwa leswaku ti fanela loko ti laveka enhlamuselweni. Kambe, loko ti nga laveki, ti fanele ti susiwa tanihi leti nga yi faneliki nhloko-mhaka.

¹⁹ Eka leswi swi nga vonaka hi xihatla leswaku nhloko-mhaka ya nkulumo ya wena, leyi hlawuriweke u ri karhi u tsundzuka vayingiseri ni xikongomelo xa wena, yi lawula ku twisiseka ka yinhla. Eka swiyimo swo karhi yinhla yi nga ha va ya nkoka ku hetisisa xikongomelo xa wena, hi ku ya hi xisekelo xa vayingiseri va wena, kasi eka vayingiseri van’wana kumbe eka nhloko-mhaka yin’wana, swi nga ha va swi nga faneli kumbe swi nga twisiseki hi ku helela.

²⁰ Hi ku ya hi leswi, xana ku hlanganisa mhaka exiavelweni xa wena ku fanele ku helela hi mpimo wo tanihi kwihi? Nkulumo leyi landzelelanaka, leyi hlanganeke, a yi fanelanga ku tshikiwa hikokwalaho ko lava ku hlanganisa yinhla yin’wana ni yin’wana leyi yi nga ha vaka yi nghenisiwile exiavelweni xa wena. Hambi swi ri tano, swi nga va swinene ku hlawula maandlalelo lama nga ta ku pfumelela leswaku u katsa swo tala hi laha swi kotekaka ha kona, tanihi leswi tinkulumo ta swichudeni ti nga xiphemu lexi dyondzisaka xa lunghiselelo ra xikolo. Hambi swi ri tano, mianakanyo leyi nga ya nkoka eku vumbeni ka nhloko-mhaka ya wena tanihi tinhla-nkulu a yi nge tluriwi.

21. Ha yini swi ri swa nkoka leswaku mianakanyo ya nkoka yi nga tluriwi?

²¹ Mianakanyo-nkulu yi nga siyiwi. U swi tivisa ku yini loko mianakanyo yi ri leyikulu kumbe yi nga ri yona? Mianakanyo i ya nkoka loko u nga ta swi kota ku hetisisa xikongomelo xa nkulumo ya wena handle ka yona. Leswi ngopfu-ngopfu swi tano emhakeni leyi landzelelanaka, leyi hlanganeke. Hi xikombiso, u nga endlisa ku yini loko kontraka yi ku akele yindlu ya swithezi swimbirhi ivi yi tshika ku aka switepisi? Hi ndlela yoleyo, nkulumo leyi tinhla to karhi ta nkoka ti tluriwaka a yi nge swi koti ku va leyi landzelelanaka ni leyi hlanganeke. Ku kayivela xo karhi naswona vayingiseri vo karhi va ta pfilunganyeka. Kambe a swi endleki sweswo loko nkulumo yi vumbiwe hi ndlela leyi hlanganeke, leyi twisisekaka.