Dyondzo 35

Mhaka Yi Twananisiwa Ni Vutirheli Bya Nsimu

1-3. Ha yini swi ri swa ntikelo ku dyondza ku twananisa mhaka ya hina ni vutirheli bya nsimu?

¹ Xiphemu lexikulu xa ntirho wa hina tanihi vatirheli va Vakriste namuntlha xi katsa ku chumayela ni ku dyondzisa Rito ra Xikwembu eka vanhu lava tivaka switsongo hi Bibele. Van’wana va vona a va si tshama va va na yona; van’wana vo va na kopi ya yona ntsena exelufini. Leswi swi vula leswaku, loko va ta kuma mpfuno lowu teleke eka leswi hi va byelaka swona, hi fanele hi swi twananisa ni swiyimo swa vona. A hi swona leswaku hi cinca rungula, kambe hi endla matshalatshala yo hlawuleka yo ri phofula hi ririmi leri va nga ta ri twisisa. Entiyisweni, ku boheka ka hina ku twananisa mhaka ya hina hi ndlela leyi, swi khumba ndlela leyi hi yi twisisaka kahle ha yona.

² Ku twananisa swi vula ku cinca leswaku u fanelana ni swiyimo leswintshwa, ku tixaxameta ni swo karhi. Swi vula ku lulamisa xo karhi leswaku u tianerisa wena n’wini kumbe ku anerisa un’wana. Ku kambisisa yinhla yo twananisa mhaka ni vutirheli bya nsimu swi fanele swi kandziyisa xilaveko xo endla leswaku marungula ya le vutirhelini bya nsimu kumbe nkulumo yin’wana ni yin’wana yi olova ni ku twisiseka eka vayingiseri vo karhi, naswona ngopfu-ngopfu eka vanhu lava ha ku tsakelaka lava hi hlanganaka na vona evutirhelini bya nsimu. Hikwalaho, loko u tirhela eka mfanelo leyi exikolweni, u fanele nkarhi hinkwawo u languta vayingiseri va wena hi laha a wu ta va languta ha kona vanhu lava u hlanganaka na vona loko u nyikela vumbhoni hi yindlu na yindlu.

³ Leswi a swi vuli swona leswaku nkulumo ya wena yi fanele yi va ni xivumbeko xa mhaka ya yindlu na yindlu loko u tirhela eka mfanelo leyi. Tinkulumo hinkwato ti ta fana hi mukhuva wo ti nyikela hi laha swi andlariweke ha kona eka swiletelo swa wena swa sweswi swa xikolo. Leswi swi vulaka swona hi leswaku, ku nga khathariseki muxaka wa mhaka leyi u yi nyikelaka, tinhlamuselo leti u ti nyikelaka kun’we ni ririmi leri u ri tirhisaka swi ta va swa muxaka lowu u nga wu tirhisaka eka vanhu lava u hlanganaka na vona ensin’wini. Tanihi leswi ku vulavula ka hina ko tala ku endliwaka evutirhelini bya nsimu, leswi swi fanele swi ku pfuna ku xiya xilaveko xo vulavula hi ku olova, hi mpimo lowu vanhu vo tala lava hi hlanganaka na vona entirhweni wa nsimu va nga ta wu twisisa. U yi lunghiselerilenyana mfanelo leyi eka Dyondzo 21. Sweswi ku fanele ku langutaniwa na yona yi ri yoxe hikwalaho ka ku laveka ka yona ni nkoka wa yona lowu xiyekaka.

4, 5. Hlamusela mhaka leyi marito ya hina ma faneleke ma endliwa ma twisiseka evanhwini ha yona.

⁴ Marito ma endliwa ma twisiseka eka vanhu. Xilaveko xa mfanelo leyi xi kombisiwa hi marito lawa vamakwerhu van’wana va ma tirhisaka evutirhelini bya yindlu na yindlu ni le ka tidyondzo letintshwa. Ku twisisa ka hina Matsalwa ku hi nyike marito lawa ma nga tiviwiki ngopfu. Hi tirhisa marito yo tanihi “masalela,” “tinyimpfu tin’wana” ni man’wana. Loko hi ma tirhisa eku vulavuleni ka hina, hakanyingi marito yo tano a ma twisiseki nikatsongo eka vanhu lava hi hlanganaka na vona entirhweni wa nsimu. Ma fanele ku hlamuseriwa hi ku tirhisa vamavizweni lava faneleke kumbe nhlamuselo leyi nga ta twisiseka. Hambi ku ri ku kombetela eka “Armagedoni” na “ku simekiwa ka Mfumo” a swi twisiseki loko ku ri hava nhlamuselo mayelana ni leswi ma vulaka swona.

⁵ Loko a kambisisa mhaka leyi, mutsundzuxi wa wena u ta tivutisa, Xana munhu la nga wu tolovelangiki ntiyiso wa Bibele a a ta yi twisisa yinhla yoleyo kumbe rito rero? A nge ku tshikisi ku tirhisa marito yo tano ya swa le tilweni. I xiphemu xa marito lawa hi ma tirhisaka naswona hi lava leswaku vanhu lava ha ku tsakelaka va ma tolovela. Kambe loko marito lawa u ma tirhisa, ú ta xiya loko u ma hlamusela kumbe e-e.

6-8. Loko hi lunghiselela tinkulumo ta hina, ha yini hi fanele hi va ni vukheta leswaku hi hlawula tinhla leti faneleke?

⁶ Tinhla leti faneleke ti hlawuriwa. Ku hlawula ka wena ka mianakanyo yo yi nyikela entirhweni wa nsimu ku ta cinca-cinca tanihi leswi marito lawa u ma tirhisaka ma cinca-cincaka, swi titshege hi maandlalelo ya wena. Sweswo swi vangiwa hi leswi hakanyingi ku nga na swilo swin’wana leswi hi nga ta ka hi nga swi hlawuli leswaku hi bula ha swona ni munhu la ha ku tsakelaka. Eka swiyimo swo tano, ku hlawula mhaka swi le ka wena hi ku helela. Kambe loko u nyikiwa xiavelo exikolweni, mhaka leyi u nga ta yi hlanganisa u hlawuleriwa yona ka ha ri emahlweni. U nga hlawula ntsena eka leswi nga eka xiavelo xa wena. U fanele ku endla yini?

⁷ Xo sungula, tanihi leswi u hikeriweke tinhla leti u nga ti tirhisaka, u fanele u hlawula maandlalelo ya nkulumo ya wena lama nga ta ku pfumelela leswaku u hlawula tinhla to tala leti faneleke. Mutsundzuxi wa wena u ta xiya-xiya tinhla leti u ti hlawulaka ni ndlela leyi ti fanelaka swiyimo swa nkulumo ya wena ha yona. Sweswo swi vangiwa hi leswi, eka mfanelo leyi yi kambisisiwaka, u kombisaka leswaku swivumbeko swo hambana-hambana swa ntirho wa nsimu swi lava timhaka to hambana-hambana. Hi xikombiso, loko u rhambela munhu la ha ku tsakelaka enhlanganweni a wu nga ta tirhisa mhaka leyi fanaka ni ya yindlu na yindlu. Kutani ke, hambi xiavelo xa wena xi lava ku vulavurisana ni n’wini wa muti kumbe xi ta va nkulumo leyi tolovelekeke ya le platifomo, endla swilo leswi u swi vulaka ni tinhla leti u ti hlawulaka emhakeni leyi u averiweke yona swi fanela vayingiseri lava u vulavulaka na vona.

⁸ Leswaku a vona loko tinhla ti faneleka kumbe ti nga faneleki, mutsundzuxi wa wena u ta xiya xikongomelo xa nkulumo ya wena. Eka riendzo ra yindlu na yindlu xikongomelo xa wena hi ntolovelo i ku dyondzisa ni ku khutaza n’wini wa muti leswaku a hambeta a dyondza. Eka riendzo ro vuyela xikongomelo xa wena i ku kurisa ku tsakela, naswona loko swi koteka, u sungula dyondzo ya le kaya ya Bibele. Loko ku ri rungula ra le ndzhaku ka dyondzo, kutani xikongomelo i ku khutaza n’wini wa muti leswaku a va kona enhlanganweni kumbe a nghenela ntirho wa nsimu, ni swin’wana.

9, 10. Hi nga swi vona njhani loko tinhla leti hi ti hlawuleke ti fanerile?

⁹ Kavula, hambi ku ri eka xivumbeko lexi fanaka xa ntirho, ku hlawula ka wena tinhla ku nga ha hambana hi ku ya hi vayingiseri va wena. Kutani leswi na swona swi fanele swi xiyiwa. Tinhla leti nga emhakeni leyi u averiweke yona leti nga xi faneliki xikongomelo xa wena a ti fanelanga ti nghenisiwa enkulumeni ya wena.

¹⁰ Hikwalaho ka mintiyiso leyi, maandlalelo ma fanele ma hlawuriwa nkulumo yi nga si lunghiseleriwa. Tivutise: Ndzi lava ku hetisisa yini? I tinhla tihi leti lavekaka leswaku ndzi hetisisa xikongomelo lexi, naswona tinhla leti ti fanele ti vumbiwa njhani leswaku ti fanela swiyimo swa nkulumo? Loko se u kunguhatile timhaka leti, tinhla leti faneleke ti nga hlawuriwa handle ko nonon’hweriwa ivi ti nyikeriwa hi ndlela leyi yi nga ta twananisa mhaka ni vutirheli bya nsimu.

11-13. Ha yini swi ri swa nkoka ku kombisa ntikelo wa ku tirhisiwa ka mhaka leyi hi yi nyikeleke?

¹¹ Ntikelo wa ku tirhisiwa ka mhaka wu kandziyisiwa. Ku kandziyisa ntikelo wa mhaka swi vula ku kombisa n’wini wa muti hi ku kongoma, handle ko hoxisa leswaku ya n’wi khumba, leswaku i nchumu lowu a wu lavaka kumbe lowu a nga wu tirhisaka. Eku sunguleni ka nkulumo, n’wini wa muti u fanele a xiya leswaku “leswi swa ndzi katsa.” Leswi swa laveka leswaku u koka nyingiso wa vayingiseri. Kambe, leswaku u khoma nyingiso wolowo, swi fanerile ku ya emahlweni u tirhisa mhaka yoleyo nkarhi na nkarhi enkulumeni hinkwayo.

¹² Leswi swi katsa swo tala ku tlula ku vulavurisana ni vayingiseri ntsena ni ku pfuna vayingiseri va wena ku anakanyisisa. Sweswi u fanele u ya emahlweni naswona u nghenisa n’wini wa muti eka ndlela leyi mhaka yi tirhaka ha yona. Xikongomelo xa hina evutirhelini bya nsimu i ku dyondzisa vanhu ntiyiso wa Rito ra Xikwembu ni ku va pfuna leswaku va dyondza ndlela leyi yisaka eku poneni. Kutani ke, hi vuxiyaxiya ni nkhathalelo, u fanele u kombisa n’wini wa muti mimpfuno leyi tirhaka eka yena ya ku yingisela ni ku endla hi ku ya hi leswi u swi vulaka.

¹³ Hambi leswi xivumbeko lexi xa mfanelo xi boxiwaka emakumu, a hi swona leswaku a hi xa nkoka. I yinhla ya nkoka naswona a yi fanelanga yi honisiwa. Tirhela ehenhla ka yona, hikuva i ya nkoka evutirhelini bya nsimu. A hi kanyingi u nga ta swi kota ku koka nyingiso wa n’wini wa muti nkarhi wo leha handle ka loko a swi vona kahle leswaku leswi u swi vulaka i swa ntikelo wo karhi evuton’wini bya yena n’wini.