Dyondzo 113

Pawulo eRhoma

VONA tinketani emavokweni ya Pawulo, naswona languta socha ra Murhoma leri a ri n’wi rindzile. Pawulo a a ri mukhotsiwa eRhoma. A a rindze leswaku Khezari wa Murhoma a vula leswi a nga ta n’wi endla swona. Loko a ha ri ekhotsweni, vanhu a va pfumeleriwa ku n’wi endzela.

Endzhaku ka masiku manharhu Pawulo a fike eRhoma, u vitane varhangeri van’wana va Vayuda leswaku va ta n’wi vona. Hikwalaho, ku te Vayuda vo tala va le Rhoma. Pawulo u va chumayele hi ta Yesu ni mfumo wa Xikwembu. Van’wana va hundzukile kutani va va Vakreste, kambe van’wana a va hundzukanga.

Pawulo u tlhele a chumayela ni masocha yo hambana-hambana lawa a ma tirha ku n’wi rindza. Pawulo u tshame kwalaho ku ringana malembe mambirhi a ri mukhotsiwa naswona a chumayela un’wana ni un’wana loyi a a swi kota ku n’wi chumayela. Hikwalaho ka sweswo, hambi ku ri vandyangu wa Khezari va twe mahungu lamanene ya Mfumo, naswona van’wana va vona va ve Vakreste.

Kambe, i mani muendzi loyi a nga laha tafuleni la tsalaka? Xana u nga vhumbha? Ina, a ku ri Timotiya. Timotiya na yena a a khotsiwile hikwalaho ko chumayela hi Mfumo, kambe u tlhele a ntshunxiwa. Kutani a a te laha ku ta pfuna Pawulo. Xana wa swi tiva leswaku Timotiya u tsala yini? A hi voneni.

Xana wa wu tsundzuka muti wa Filipiya ni wa Efesa eka Xitori 110? Pawulo u pfunile leswaku ku sunguriwa mavandlha ya Vukreste emitini yoleyo. Kutani, loko a ri ekhotsweni, Pawulo u tsalele Vakreste volavo mapapila. Mapapila ya kona ma le Bibeleni, naswona ma vuriwa Vaefesa na Vafilipiya. Hi nkarhi wolowo Pawulo a a byela Timotiya leswi a faneleke a swi tsalela vanghana va yena lava nga Vakreste le Filipiya.

Vafilipiya va ve ni musa eka Pawulo. Va n’wi rhumele nyiko ekhotsweni, kutani Pawulo u nkhense nyiko yoleyo. Epafrodito hi yena la tiseke nyiko ya kona. Kambe u fike a vabya swinene a lava ni ku fa. Sweswi u hanyile naswona u lava ku muka. U ta famba ni papila leri humaka eka Pawulo na Timotiya loko a tlhelela eFilipiya.

Loko a ha ri ekhotsweni, Pawulo u tsale mapapila man’wana mambirhi lawa ma kumekaka eBibeleni. Rin’wana a ri ya eka Vakreste lava nga emutini wa Kolosa. Xana wa swi tiva leswaku ri vuriwa yini? Vakolosa. Rin’wana a ri ya eka munghana wa yena lonkulu la vuriwaka Filemoni, loyi na yena a tshamaka eKolosa. Papila leri ri vulavula hi Onesima nandza wa Filemoni.

Onesima a a balekele Filemoni kutani a ya eRhoma. Hi ndlela yo karhi Onesima u swi twile leswaku Pawulo u le khotsweni kwalaho. U n’wi endzerile, kutani Pawulo a chumayela Onesima. Ku nga ri kungani Onesima na yena u ve Mukreste. Hiloko Onesima a tisola hileswi a balekeke. Xana wa swi tiva leswaku Pawulo u tsale yini eka papila leri a ri ya eka Filemoni?

Pawulo u kombele Filemoni leswaku a rivalela Onesima. Pawulo u te: ‘Ndzi n’wi tlherisela eka wena. Kambe sweswi a nga ha ri nandza wa wena ntsena. Kambe se i makwenu lonene la nga Mukreste.’ Loko Onesima a tlhelela eKolosa, u fambe ni mapapila wolawo mambirhi, rin’wana ri ya eka Vakolosa kasi rin’wana ri ya eka Filemoni. Mawaku ndlela leyi Filemoni a a tsake ha yona loko a twa leswaku nandza wa yena se i Mukreste.

Loko Pawulo a tsalela Vafilipiya na Filemoni, a a ri ni mahungu lamanene ngopfu. Pawulo u byele Vafilipiya a ku: ‘Ndzi mi rhumela Timotiya. Kambe na mina ndzi ta mi endzela ku nga ri khale.’ Naswona eka Filemoni u te: ‘Ndzi lunghiselele ndhawu yo tshama kwalaho.’

Loko Pawulo a ntshunxiwile, u endzele vamakwavo va Vakreste etindhawini to tala. Kambe endzhakunyana Pawulo u tlhele a khotsiwa eRhoma. Enkarhini wolowo a a swi tiva leswaku u ta dlayiwa. Kutani u tsalele Timotiya a n’wi kombela leswaku a ta hi ku hatlisa. Pawulo u tsale a ku: ‘Ndzi tshame ndzi tshembekile eka Xikwembu, naswona Xikwembu xi ta ndzi hakela.’ Endzhaku ka malembe ma nga ri mangani Pawulo a dlayiwile, Yerusalema wu tlhele wu lovisiwa, kambe enkarhini wolowo wu lovisiwe hi Varhoma.

Kambe ku ni swo tala eBibeleni. Yehovha Xikwembu u endle leswaku muapostola Yohane a tsala tibuku to hetelela, ku katsa ni buku ya Nhlavutelo. Buku leyi ya Bibele yi hi byela hi swa nkarhi lowu taka. Sweswi a hi kumeni leswi vumundzuku byi hi khomeleke swona.

Mintirho 28:16-31; Vafilipiya 1:13; 2:19-30; 4:18-23; Vaheveru 13:23; Filemoni 1-25; Vakolosa 4:7-9; 2 Timotiya 4:7-9.