Bandlha Ra Vukriste Ra Lembe Xidzana Ro Sungula

Hi Pentekosta ya 33 C.E., moya lowo kwetsima wu chululeriwe eka vadyondzisiwa va Yesu va 120, kutani hi tindzimi to tala va sungule ku vulavula hi swilo leswikulu swa Xikwembu. Loku a ku ri ku simekiwa ka bandlha ra Vukriste. Vadyondzisiwa lavantshwa vo ringana 3 000 va khuvuriwile hi siku rero.—Mintirho, ndzima 2.

Mabandlha etindhawini to hambana ya engetelekile loko vaapostola ni van’wana va hambete va vula Rito ra Xikwembu hi vurhena. Tanihi loko swi tsariwile eka buku ya Mintirho, hi ku hatlisa ku chumayela ku hangalake eMediterranean ku suka eBabilona ni le Afrika N’walungu ku ya eRhoma kumbexana ni le Spain.—Varhoma 15:18-29; Vakolosa 1:23; 1 Petro 5:13.

Hinkwako laha vanhu va veke vadyondzisiwa, va vumbe mabandlha. Vavanuna lava fanelekaka, lava vupfeke va vekiwile vakulu, kumbe valanguteri, ku hlayisa mpimo wa dyondzo leyinene ni mahanyelo emabandlheni. Kambe a va vumbanga ntlawa wa vafundhisi; a va ri vatirheli ni vatirhi-kulobye va Mfumo wa Xikwembu.—Mintirho 14:23; 20:28; 1 Vakorinto 3:5; 5:13; Vakolosa 4:11; 1 Timotiya 3:1-15; Vaheveru 13:17; 1 Petro 5:1-4.

Vaapostola ni van’wana vatirhi va le kusuhi va tirhe tanihi huvo leyi fumaka. Va kongomise ntirho wa ku chumayela. Va tlhantlhe swiphiqo ebandlheni ra Yerusalema. Va rhumele vamakwerhu lava fanelekaka eSamariya ni le Antiyoka ku ya tiyisa vapfumeri lavantshwa kona. Va tamerile njhekanjhekisano wa ku yimba, va rhumela leswi va swi kaneleke eka mabandlha hinkwawo leswaku ma swi hlayisa. Kambe vavanuna lava a va nga fumi van’wana kambe a va ri malandza ni vatirhi-kulobye va bandlha hinkwaro.—Mintirho 4:33; 6:1-7; 8:14-25; 11:22-24; 15:1-32; 16:4, 5; 1 Vakorinto 3:5-9; 4:1, 2; 2 Vakorinto 1:24.

Vadyondzisiwa vo sungula a va tiviwa tanihi Vakriste, va thyiwe tano hi ku rhandza ka Xikwembu. Nakambe a va ri na tidyondzo leti va hlawulaka; tona a ti vuriwa dyondzo ya vaapostola, kumbe ntila wa marito lama hanyisaka. Dyondzo leyi ya Matsalwa nakambe a yi tiviwa tanihi ntiyiso.—Yohane 17:17; Mintirho 2:42; 11:26; Varhoma 6:17; 1 Timotiya 4:6; 6:1, 3; 2 Timotiya 1:13; 2 Petro 2:2; 2 Yohane 1, 4, 9.

A va ri nhlengeletano ya misava hinkwayo ya vamakwavo leyi nga ni vun’we erirhandzwini. Va kombe ku tsakela vapfumeri-kulobye ematikweni man’wana. Loko va ri karhi va famba, vapfumeri-kulobye va va amukerile emakaya ya vona. Va hlayisile mpimo lowu tlakukeke wa mahanyelo lamanene, va ri vanhu lava hlawulekeke lava hambaneke ni misava. Va wu hlayisile emiehleketweni ya vona nkarhi wa siku ra vukona bya Yehova kutani hi ku hiseka va kombisa ripfumelo ra vona erivaleni.—Yohane 13:34, 35; 15:17-19; Mintirho 5:42; 11:28, 29; Varhoma 10:9, 10, 13-15; Tito 2:11-14; Vaheveru 10:23; 13:15; 1 Petro 1:14-16; 2:9-12; 5:9; 2 Petro 3:11-14; 3 Yohane 5-8.

Kambe, hi laha swi vhumbiweke ha kona, vugwinehi lebyikulu byi sungule ku humelela, eka lembe xidzana ra vumbirhi ni ra vunharhu. Leswi swi vange mafambiselo lamakulu ya kereke lama nga hlayisangiki ku tenga ka bandlha ro sungula ra Vukriste mayelana ni dyondzo, mahanyelo, ku hleleka ni xiyimo emisaveni.—Matewu 13:24-30, 37-43; 2 Vatesalonika, ndzima 2.

Hambi swi ri tano, Yesu u vhumbe leswaku a ku ta va ni ku vuyeteriwa ka vugandzeri bya ntiyiso eku heleni ka mafambiselo ya swilo. Timbhoni ta Yehova ti tshemba leswaku ku vuyeteriwa koloko ku nga voniwa emintirhweni ya vona ya misava hinkwayo enkarhini wa hina, malembe lama nga vaka 1 900 endzhaku ka vuprofeta bya Yesu. Matluka lama landzelaka ma ta hlamusela leswaku hikwalaho ka yini.

• Xana bandlha ra Vukriste ri simekiwe hi ndlela yihi, naswona ri kule njhani?

• Xana bandlha a ri kongomisiwa hi ndlela yihi?

• I swilo swihi leswi va hlawuleke kahle Vakriste va lembe xidzana ro sungula?

[Mepe lowu nga eka tluka 7]

(Leswaku u vona rungula leri hleriweke hi ku helela, vona nkandziyiso wa kona)

Lwandle ra Ntima

Lwandle ra Kasipiya

Lwandle Lerikulu

Lwandle ro Tshwuka

Nsonga wa Persia

Tindhawu leti fikeleriweke hi mahungu lamanene hi lembe xidzana ro sungula

ITALIYA

Rhoma

GRIKIYA

MELITA

KRETA

KIPRA

BITINIYA

GALATIYA

ASIYA

KAPADOKIYA

KILIKIYA

SIRIYA

ISRAYELE

Yerusalema

MESOPOTAMIYA

Babilona

Van’wana etindhawini leti va hundzuke vapfumeri

ILIRIKA

MEDIYA

PARITIYA

ELAMU

ARABIYA

LIBIYA

EGIPTA

ETIYOPIYA

[Swifaniso leswi nga eka tluka 7]

Vakriste vo sungula va twarise Rito ra Xikwembu hi vurhena

Vakriste a va amukeriwa emakaya ya vapfumeri-kulobye hinkwako laha a va famba kona