Xikongomelo Xa Xikwembu Se Xi Fikelela Nhlohlorhi Ya Xona
Xikongomelo xa Xikwembu eku tumbuluxeni ka misava a ku ri leswaku yi akiwa hi vanhu lava tsakeke lava hanyaka eka matshamelo lamanene. Leswaku va hambeta va hanya, vanhu va fanele ku yingisa milawu ya Xikwembu, kambe vatekani vo sungula a va yingisanga kutani va ve vadyohi, va avanyiseriwe rifu. Leswi swi tise xidyoho na rifu eka vana va vona hinkwavo.—Genesa 1:27, 28; 2:16, 17; 3:1-19; Varhoma 5:12.
Xikwembu, lexi vito ra xona ku nga Yehova, xi kongomele ku susa vuyelo bya ku nga yingisi ni xidyoho emisaveni. Hi ku famba ka nkarhi xi languta misava kutani exikarhi ka vanhu xi vona munhu la tshembekaka, Abram, loyi vito rakwe Xi ri cinceke ri va Abrahama. Xikwembu xi tshembise Abrahama leswaku vana va yena a va ta va tiko lerikulu ni leswaku ha tiko leri Xikwembu a xi ta lunghiselela rixaka leri mindyangu hinkwayo ya misava a yi ta tikatekisa ha rona.—Genesa 12:1-3; 18:18, 19; 22:18; Psalma 83:18; Vaheveru 11:8-16.
Ekusuhi ni ku hela ka lembe xidzana ra vu-16 B.C.E., vana va ntukulu wa Abrahama Yakobo, kumbe Israyele, va vile tinxaka leti hanyaka ta 12 evuhlongeni aEgipta. Yehova u ntshunxe Vaisrayele lava aEgipta kutani a va endla rixaka. Ha Muxe eNtshaveni ya Sinayi u va nyike Nawu tanihi nongonoko wa milawu ya tiko ra vona. Yehova a a ri Hosi ya vona, Muavanyisi ni Munyiki wa vona wa Nawu. Tiko ra Israyele ri ve vanhu lava hlawuriweke hi Xikwembu, timbhoni ta xona, leti hlengeleteriweke ku hetisisa xikongomelo xa xona. Ha vona a ku ta ta Mesiya, loyi a a ta tlhoma mfumo lowu nga heriki leswaku ku pfuneka vanhu va matiko hinkwawo.—Eksoda 19:5, 6; 1 Tikronika 17:7-14; 1 Tihosi 4:20, 25; Esaya 33:22; 43:10-12; Varhoma 9:4, 5.
Endzhaku ka malembe xidzana ya 15, kumbe malembe lama nga vaka 2 000 lama hundzeke, Xikwembu xi rhumele N’wana wa xona la nga swakwe ku suka etilweni ku ta emisaveni, a ta velekiwa hi wanhwana lontsongo wa Muyuda, Mariya. U thyiwile Yesu naswona a a ta dya ndzhaka ya Mfumo lowu Xikwembu xi wu tshembiseke kokwa wakwe Davhida. Loko a ri na malembe ya 30, Yesu u khuvuriwile hi Yohane Mukhuvuri kutani a sungula ku twarisa Mfumo wa Xikwembu. Hi ku hanyisa vavabyi, a a kombisa hi laha Mfumo wakwe lowu taka a wu ta katekisa vanhu ha kona. Hi ku tirhisa swikombiso, u hlamusele leswi a swi ta laveka eka hinkwavo lava lavaka vutomi lebyi nga heriki. Kutani Yesu u dlayiwile emhandzini, vutomi byakwe lebyi hetisekeke bya vumunhu byi ve nkutsulo eka vanhu.—Matewu 1:18-24; 3:13-16; 4:17-23; 6:9, 10; ndzima 13; 20:28; Luka 1:26-37; 2:14; 4:43, 44; 8:1; Yohane 3:16; Mintirho 10:37-39.
Yesu a a hlamusele leswaku Mfumo wa Vumesiya a wu ta tlhomiwa enkarhini lowu a wu ta ta, eku heleni ka mafambiselo ya swilo. Enkarhini wolowo a a ta va kona a nga vonaki ematilweni tanihi Hosi leyi fumaka naswona a a ta endla leswaku vukona byakwe byi tiveka hi ku yisa miehleketo yakwe emisaveni. Swiendlakalo swa misava swi komba leswaku hi hanye enkarhini lowu ku sukela hi 1914. Hi laha Yesu a vhumbeke ha kona, mahungu lamanene ya Mfumo ma karhi ku twarisiwa emisaveni hinkwayo tanihi vumbhoni eka matiko hinkwawo. Hikwalaho ka sweswo, vanhu va matiko hinkwawo va hlengeletanile etlhelweni ra Mfumo wa Xikwembu. Lava va ta pona makumu ya mafambiselo ya sweswi ya swilo kutani va kuma vutomi lebyi nga heriki emisaveni ehansi ka Mfumo wa Vumesiya.—Matewu, tindzima 24 na 25; Nhlavutelo 7:9-17.
Tikereke to tala ti tivula leti endlaka ku rhandza ka Xikwembu namuntlha. Kambe u nga ri hlawula njhani bandlha ra Vukriste bya ntiyiso xana? Hi ku kambela Matsalwa lama vulavulaka hi bandlha ro sungula ra Vukriste ra lembe xidzana ro sungula kutani na hi ku vona lava namuntlha va landzelaka ntila wolowo lowu fanaka.
• I xiphemu xihi lexi Abrahama na Israyele va xi endleke eku hetisekeni ka xikongomelo xa Xikwembu?
• Xana Yesu u hetisise yini hi vutirheli byakwe na hi rifu ra yena?
• I swiendlakalo swihi leswi profeteriweke ku fungha nkarhi wa hina wa sweswi?