Hi Fanele Hi Va Ni Nhlengeletano Ya Yehovha

XANA u tshame u twa munhu a ku, “Ndzi pfumela eka Xikwembu hayi eka vukhongeri lebyi hleriweke”? Hakanyingi malangutelo yo tano ma vuriwa hi vanhu lava va tshameke va va vangheni va kereke lava hisekaka, kambe se va heleriweke hi ntshembo hileswi vukhongeri bya vona byi tsandzekaka ku enerisa swilaveko swa vona swa moya. Hambileswi va hetiweke matimba hi tinhlengeletano ta vukhongeri hi ku angarhela, vo tala va vula leswaku va ha lava ku gandzela Xikwembu. Hambiswiritano, va pfumela leswaku swa antswa ku xi gandzela hi ndlela ya vona ku ri na ku xi gandzela ekerekeni kumbe ni nhlengeletano yo karhi.

Xana Bibele yi ri yini? Xana Xikwembu xi lava leswaku Vakreste va tihlanganisa ni nhlengeletano yo karhi?

Vakreste Vo Sungula Va Vuyeriwile Hikwalaho Ko Hleleka

Hi Pentekosta ya 33 C.E., Yehovha u chululele moya wa yena wo kwetsima, hayi eka vapfumeri va nga ri vangani, kambe eka ntlawa wa vavanuna ni vavasati lava hlengeletaneke “endhawini yin’we,” hi leswaku, kamara ra le henhla emutini wa Yerusalema. (Mintirho 2:1) Vandlha ra Vukreste leri veke nhlengeletano ya misava hinkwayo ri vumbiwile hi nkarhi wolowo. Sweswo swi tikombe swi ri nkateko wa xiviri eka vadyondzisiwa volavo vo sungula. Ha yini? Xivangelo xin’wana hi leswaku a va nyikiwe xiavelo xa nkoka—xa ku chumayela mahungu lamanene ya Mfumo wa Xikwembu “emisaveni hinkwayo leyi akiweke” eku heteleleni. (Matewu 24:14) Evandlheni vanhu lava ha ku hundzukaka va kota ku dyondza ndlela yo ya emahlweni ni ntirho wo chumayela eka vapfumeri-kulobye lava nga ni ntokoto.

Hi ku hatlisa rungula ra Mfumo ri hangalake eYerusalema hinkwawo. Exikarhi ka 62 na 64 C.E., muapostola Petro u tsale papila ra yena ro sungula leri a ri ya eka Vakreste lava a va “[hangalake] ePonto, eGalatiya, eKapadokiya, eAsiya ni le Bitiniya,” tindhawu leti hinkwato ti nga eTurkey ra manguva lawa. (1 Petro 1:1) Nakambe a ku ri ni vapfumeri le Palestina, Lebanoni, Siriya, Kipra, Grikiya, Kreta na Italiya. Hilaha Pawulo a tsaleleke Vakolosa hakona hi 60-61 C.E., mahungu lamanene “[a ma chumayeriwe] eka ntumbuluko hinkwawo lowu nga ehansi ka tilo.”—Vakolosa 1:23.

Vuyelo bya vumbirhi bya ku tihlanganisa ni nhlengeletano a ku ri xikhutazo lexi Vakreste a va nyikana xona. Hi ku tihlanganisa ni vandlha, Vakreste a va twa tinkulumo leti khutazaka, va dyondza Matsalwa yo Kwetsima swin’we, va rungulelana mintokoto leyi tiyisaka ripfumelo ni ku khongela swin’we ni vapfumeri-kulobye. (1 Vakorinto, ndzima 14) Naswona vavanuna lava wupfeke a va ta ‘risa ntlhambi wa Xikwembu.’—1 Petro 5:2.

Leswi a va ri swirho swa vandlha, Vakreste va tlhele va tivana ni ku rhandzana. Ematshan’weni yo titwa va tikeriwa hi ku tihlanganisa ni vandlha, Vakreste vo sungula va akiwile ni ku tiyisiwa hi rona.—Mintirho 2:42; 14:27; 1 Vakorinto 14:26; Vakolosa 4:15, 16.

Xivangelo xin’wana lexi endleke leswaku ku laveka vandlha kumbe nhlengeletano ya misava hinkwayo, hileswaku ri ta kondletela vun’we. Vakreste va dyondze ku “vulavula hi ku twanana.” (1 Vakorinto 1:10) Leswi a swi ri swa nkoka. Swirho swa vandlha a swi ri ni swiyimo swo hambana-hambana hi tlhelo ra dyondzo ni ndhavuko. A va vulavula tindzimi to hambana-hambana, naswona swi le rivaleni leswaku vumunhu bya vona a byi nga fani. (Mintirho 2:1-11) Minkarhi yin’wana a ku va ni timholovo ta xiviri. Hambiswiritano, Vakreste va pfuniwile leswaku va tlhantlha timholovo toleto endzeni ka vandlha.—Mintirho 15:1, 2; Vafilipiya 4:2, 3.

Swivutiso swa nkoka leswi vakulu va kwalaho a va nga koti ku swi hlamula a swi yisiwa eka valanguteri lava famba-fambaka lava wupfeke, vo kota Pawulo. Timhaka leti khumbaka tidyondzo ta nkoka a ti yisiwa eka huvo leyi fumaka leyi a yi ri eYerusalema. Eku sunguleni huvo leyi fumaka a yi vumbiwe hi vaapostola va Yesu Kreste kambe endzhakunyana yi ndlandlamuxiwile yi katsa ni vakulukumba va vandlha ra le Yerusalema. Vandlha rin’wana ni rin’wana a ri xixima vulawuri lebyi humaka eka Xikwembu bya huvo leyi fumaka swin’we ni vayimeri va yona malunghana ni ku hlela vutirheli, ku hlawula vavanuna lava nga ta endla ntirho ni ku endla swiboho etimhakeni ta tidyondzo. Loko mhaka yi bohiwe hi huvo leyi fumaka, mavandlha a ma amukela xiboho xolexo ivi ma “tsakel[a] xikhutazo xa kona.”—Mintirho 15:1, 2, 28, 30, 31.

Ina, Yehovha u tirhise nhlengeletano eka lembe-xidzana ro sungula. Kambe ku vuriwa yini hi namuntlha?

Hi Fanele Hi Va Ni Nhlengeletano Namuntlha

Ku fana ni vanakulobye va tona va lembe-xidzana ro sungula, Timbhoni ta Yehovha namuntlha ti teka xileriso xo chumayela mahungu lamanene ya Mfumo xi ri xa nkoka. Ndlela yin’wana leyi ti hetisisaka ntirho lowu ha yona i ku hangalasa Tibibele ni tibuku to pfuneta ku dyondza Bibele, leswi lavaka leswaku ku va ni nhlengeletano.

Tibuku ta Vukreste ti fanele ti lunghiseleriwa kahle, ti kambisisiwa loko ti pakanisa, ti kandziyisiwa ivi ti rhumeriwa emavandlheni. Endzhaku ka sweswo, Vakreste hinkwavo va fanele va tirha hi ku tirhandzela leswaku va yisa tibuku leti eka vanhu lava lavaka ku ti hlaya. Rungula ra Mfumo ri fikelele vanhu va timiliyoni hi ndlela yoleyo. Vahuweleri va mahungu lamanene va lwela ku hetisisa ntirho wa vona wo chumayela hi ndlela leyi hlelekeke, va tiyiseka leswaku a ku na nsimu leyi tirhiwaka ngopfu yin’wana yi nga tirhiwi. Hinkwaswo leswi swi lava leswaku ku va ni nhlengeletano.

Tanihi leswi ‘Xikwembu xi nga yiki hi nghohe,’ ku fanele ku hundzuluxeriwa Tibibele ni tibuku leti sekeriweke eBibeleni. (Mintirho 10:34) Sweswi magazini lowu wu kumeka hi tindzimi ta 132 kasi nakulobye wa wona Xalamuka!, wu kandziyisiwa hi tindzimi ta 83. Sweswo swi lava mintlawa leyi hleriweke kahle ya vahundzuluxeri emisaveni hinkwayo.

Swirho swa vandlha swi kuma xikhutazo loko swi ya eminhlanganweni ni le tinhlengeletanweni ta Vukreste. Kwalaho va fika va twa tinkulumo ta Bibele leti nyanyulaka, va dyondza Matsalwa swin’we, va rungulelana mintokoto leyi akaka ni ku khongela swin’we ni vapfumeri-kulobye. Ku fana ni vamakwavo va le ka lembe-xidzana ro sungula, va tiphina hi maendzo lama tiyisaka ripfumelo ya valanguteri lava famba-fambaka, lava nga ni rirhandzu. Hikwalaho, namuntlha Vakreste va vumba “ntlhambi wun’we, murisi a va un’we.”—Yohane 10:16.

Ina, Timbhoni ta Yehovha a ti hetisekanga ku fana ni vanakulobye va tona vo sungula. Hambiswiritano, ti tirhisana hi vun’we. Hikwalaho, ntirho wo chumayela hi Mfumo wa hetisisiwa emisaveni hinkwayo.—Mintirho 15:36-40; Vaefesa 4:13.

[Xifaniso lexi nga eka tluka 31]

Namuntlha Vakreste va vumba “ntlhambi wun’we, murisi a va un’we”