Vatirheli Va Nkarhi Hinkwawo Va Kongomisa Ntirho Wa Ku Chumayela

Kumbexana munhu wo sungula wa Timbhoni ta Yehova la ku endzeleke a ku ri mutirheli wa phayona ra nkarhi hinkwawo kumbe murhumiwa. Leswi Timbhoni ta Yehova ti nga tirheliki mali, u nga ha va u hlamarile leswaku vanhu lava va swi kotisa ku yini ku tirha evutirhelini bya nkarhi hinkwawo.

Timbhoni hinkwato ta Yehova leti tinyiketeleke ni ku khuvuriwa i vatirheli, kambe nhlayo leyikulu yi na vutihlamuleri bya ndyangu kumbe byin’wana lebyi byi va sivelaka ku heta tiawara to tala hi vhiki evutirhelini bya vona. Hambi swi ri tano, magidi ya Timbhoni emisaveni hinkwayo ma ehlise mpimo wa wona wa ku hanya leswaku ma ta kota ku tihanyisa hi ntirho wa nkarhinyana kutani va nyikela tiawara ta 1 000 kumbe ku tlula hi lembe evutirhelini.

I ntiyiso, vatirheli va nkarhi hinkwawo va maphayona a va na mali yo tala yo yi tirhisela swa vona, kambe eka vona leyi i ndlela yo lava Mfumo wa Xikwembu ku sungula. Kutani va kuma mikateko yo tala. Ntsena hi ku swi kota ku vulavula ni van’wana hi Rito ra Xikwembu hi maawara lama nga vaka 90 hi n’hweti i ntokoto lowunene eka vona. Mutirheli wa nkarhi hinkwawo u antswisa vutshila byakwe evutirhelini kutani u tlhela a va na nkarhi wo va landzelela kahle lava tsakelaka. Leswi swi tswala mimbuyelo leyi khutazaka. Va na swona leswi va swi pfumalaka etlhelweni ra leswi vonekaka, nakona va swi tlangela swinene leswi va nga na swona.—Matewu 6:33.

Hi February 1943, Sosayiti ya Watch Tower yi sungule Xikolo xa Bibele xa Watchtower xa Gilead. Xikongomelo a ku ri ku letela vatirheli va maphayona ya nkarhi hinkwawo lava nga ni ntokoto ku tirha tanihi varhumiwa ematikweni ya le handle. Dyondzo ya tin’hweti ta ntlhanu yi endliwa hi dyondzo yo enta ya Bibele, matimu ya Bibele, nhlengeletano ya Yehova ni tinhloko-mhaka tin’wana leti fambelanaka ni malunghiselelo ya ntirho ensin’wini ya le handle.

Sosayiti yi hakela mali ya swo famba ya xiavelo xa vurhumiwa naswona yi lunghiselela swakudya leswinene ni ndzhawu leyinene yo tshama etindlwini ta varhumiwa. Nakambe yi nyika murhumiwa un’wana ni un’wana xipfuno lexintsongo xo xava leswi a swi lavaka. Varhumiwa va cincana hi mintirho ya le kaya yo xava, ku lunghiselela swakudya ni ku basisa. Hi ku khathalela loku kunene varhumiwa va swi kota ku tirha maawara lama nga vaka 140 hi n’hweti eku chumayeleni hi yindlu na yindlu ni ku fambisa tidyondzo ta Bibele ni vanhu lava tsakelaka.

Vo tala va varhumiwa lava va averiwe ku tirha ekule swinene ni makaya ni mindyangu hi timayele ta magidi-gidi. Va fanela ku cinca mpimo wa mahanyelo ni ndhavuko, va va ni mikhuva leyintshwa yo dya, tshamelo-maxele leri hambaneke, ni ku vulavula ririmi rin’wana. Va endla ntirho lowu hikuva va rhandza vanhu naswona va na ku navela ka matimba ko va pfuna ku dyondza hi ta Mfumo wa Xikwembu.

Ku sukela hi 1943 ku ya eka 1985, Xikolo xa Bibele xa Watchtower xa Gilead xi fambise mintlawa ya 80 nakona xi rhumele varhumiwa lava hundzaka 6 000. Ehansi ka nkongomiso wa Sosayiti, lava va kongomisile ku andza ka dyondzo ya Bibele eAfrika hinkwayo, Amerika Xikarhi na Dzonga, eVuxeni ni le Pacific Dzonga, kutani va endlile swo tala eYuropa.

Hambi loko Timbhoni ta Yehova ti tirha vutirheli bya nkarhi hinkwawo tanihi maphayona kumbe varhumiwa kumbe nkarhinyana, va tirha handle ko hakeriwa. Va tirhisa nkarhi wa vona ni mali ya vona ni ku titirhisela ku pfuna van’wana ku kuma vutivi lebyi yisaka evuton’wini lebyi nga heriki.—Yohane 17:3.

• Xana van’wana va Timbhoni ta Yehova va swi kotisa ku yini ku nyikela nkarhi wa vona hinkwawo evutirhelini, naswona hikwalaho ka yini va endla leswi?

• Xana vatirheli va leteriwela ntirho wa vurhumiwa hi ndlela yihi?

• Xana varhumiwa va seketeriwa hi ndlela yihi exiavelweni xa vona xa le handle?

[Swifaniso leswi nga eka tluka 22]

Eximatsini: Klasi ya Xikolo xa Gilead, eBrooklyn, N.Y., U.S.A.

Exineneni: Murhumiwa u dyondzisa Rito ra Xikwembu ePapua New Guinea

[Swifaniso leswi nga eka tluka 23]

Vatirheli va maphayona ni varhumiwa va chumayela Rito ra Xikwembu ematikweni yo hambana-hambana

Brazil

Riphabliki ra Dominica

Spain

Sierra Leone, eAfrika