Ku Risa Ntlhambi Wa Xikwembu Hi Vun’we

Van’wana va vutisa: ‘Xana bandlha ra misava hinkwayo ra Timbhoni ta Yehova ri fumiwa hi ndlela yihi?’ Ha hlamula: Lunghiselelo ro fuma ri landzela ntila wa bandlha ra Vukriste ra lembe xidzana ro sungula.

Hi va-1870 Charles T. Russell ni vatirhi-kulobye va teke goza ro hangalasa mimbuyelo ya dyondzo ya vona ya Bibele hi tinkulumo na tibuku. Etikweni hinkwaro, lava va hlawuleke ku tihlanganisa ni ntirho lowu va langute eka Russell ni vanghana vakwe tanihi huvo ya vavanuna lava nga ni ntokoto eku endleni ka ntirho wa Hosi ni laha va nga lavaka ndzayo mayelana ni mintirho ya vona.

Hi 1884 Sosayiti ya Zion’s Watch Tower Tract yi vumbiwile ehansi ka milawu ya Mfumo wa Pennsylvania. Russell ni vanakulobye lava nga ni vutihlamuleri va katsekile eku kongomiseni ka Sosayiti leyi kun’we ni mintirho ya Swichudeni swa Bibele. Hi 1909 va yise yindlu-nkulu ya vona eBrooklyn, New York. Hi malembe yo tala vakongomisi va Sosayiti ya Watch Tower ni vatirhi-kulobye va le kusuhi lava fanelekaka emoyeni, lava totiweke a va tirha tanihi huvo leyi fumaka ya Timbhoni ta Yehova.

Huvo leyi Fumaka yi endliwa hi ntlawa wa vavanuna va Vakriste lava totiweke (13 hi 1986), ku katsa ni 7 wa lava tirhaka eka komiti ya vakongomisi va Sosayiti ya Watch Tower. Lava va kongomisa mintirho ya misava hinkwayo ya Timbhoni ta Yehova. A va huhuteriwanga hi Xikwembu kutani a hi lava pfumalaka xihoxo, kambe va tiseketela hi Rito ra Xikwembu leri nga hava xihoxo kun’we ni vuhosi lebyi tlakukeke emisaveni, naswona va ni nkarhi wa vutomi wa ntokoto wo titsongahatela ku rhandza ka Xikwembu. Un’wana ni un’wana u na rhekhodo ya malembe yo tlula 40 entirhweni wa nkarhi hinkwawo ni Timbhoni ta Yehova.

Huvo leyi Fumaka yi kongomisa leswi Sosayiti yi swi humesaka. Leswi swi tsariweke swi tiseketele hi ku xiya swilaveko swa moya swa ntlhambi naswona i mbuyelo wa xikhongelo ni dyondzo ya nkarhi hinkwawo ni ku kambisisa Rito ra Xikwembu. Loko vavanuna lava va hambeta va dyondza Bibele ni ku xiya ku hetiseka loku yaka emahlweni ka swikongomelo swa Xikwembu, ku hetiseka ka vuprofeta eka swiendlakalo swa misava, ni xiyimo xa vanhu va Xikwembu emisaveni, minkarhi yin’wana va nga ha kuma swi fanela ku endla mindzulamiso leyi pfuletelaka eku twisiseni ka tidyondzo tin’wana. Hi ndlela leyi, vutivi bya ntiyiso byi va lebyi andzaka.—Psalma 97:11; Swivuriso 4:18; Daniel 12:4.

Huvo leyi Fumaka yi hlawule Komiti ya Rhavi ya vavanuna lava fanekelaka emoyeni eka rin’wana ni rin’wana ra marhavi lama tlulaka 90 emisaveni hinkwayo ku kongomisa mintirho ematikweni lama tlulaka 200 ni mintlawa ya swihlala. Marhavi ya vulavurisana ni mabandlha ehansi ka nkongomiso wa vona. Ku na ku vulavurisana ka minkarhi hinkwayo exikarhi ka Huvo leyi Fumaka ni Tikomiti ta Marhavi, naswona swirho swa Huvo leyi Fumaka hi swoxe swi endzela marhavi yo tala lembe na lembe leswaku swi tshama swi tiva swiyimo swa kona.

Vavanuna lava a va lawuli ripfumelo ra van’wana kambe i vatirheli lava tirhaka hi matimba leswaku vo tala va dyondza hi ta Rito ra Xikwembu. A va tirheli ku hakeriwa, kambe va nyikiwa leswi va swi pfumalaka tanihi swirho swin’wana swa mindyangu ya Bethele. Vumbhoni bya leswaku va tirha hi ku tshembeka byi voniwa hi ku hiseka, vun’we, mahanyelo lama tlakukeke lamanene ni ku tshembeka eka tidyondzo ta Bibele leti endliwaka hi Timbhoni ta Yehova emisaveni hinkwayo.—1 Vakorinto 3:5-9; 4:1, 2; 2 Vakorinto 1:24; 3:1-3; 1 Petro 5:2, 3.

• I lunghiselelo rihi ra vulawuri leri sunguriweke?

• I vamani lava tirhaka eka Huvo leyi Fumaka namuntlha, naswona mintirho ya vona hi yihi?

• Ntirho wu kongomisiwa hi ndlela yihi ematikweni man’wana?

[Mepe lowu nga eka tluka 26]

(Leswaku u vona rungula leri hleriweke hi ku helela, vona nkandziyiso wa kona)

Tindzhawu leti Timbhoni ta Yehova ti endlaka ku rhandza ka Xikwembu eka tona

[Swifaniso leswi nga eka tluka 26]

Khale ka vaungameri va Sosayiti ya Watch Tower

C. T. Russell, 1884-1916

J. F. Rutherford, 1917-1942

N. H. Knorr, 1942-1977

F. W. Franz, 1977-1992

[Swifaniso leswi nga eka tluka 27]

Tihofisi ti nga ri tingani ta marhavi lama tlulaka 90 lawa mintirho ya Timbhoni ta Yehova emisaveni hinkwayo yi kongomisiwaka hi wona

Canada

Zambia

Jarimani

Japani

Australia

Brazil