Ndzima 15

“I Mani Loyi Swi N’wi Fanelaka Ku Pfula Buku-nsongwa?”

1. I yini leswi yeke emahlweni swi humelela exivonweni xa Yohane?

I XI KULUKUMBA! XA CHAVISA! Xexo i xivono lexi hlamarisaka xa leswi xiluvelo xa Yehovha xi nga xiswona exikarhi ka timboni ta ndzilo, makerubu, vakulu va 24 ni lwandle ra nghilazi. Kambe Yohane u ye emahlweni a vona yini? Loko a langutisisile exikarhi ka xivono lexi xa le tilweni, u te: “Kutani evokweni ra xinene ra Loyi a tshameke exiluvelweni ndzi vona buku-nsongwa leyi tsariweke endzeni ni le handle, yi lemiwe swi tiya hi swilemo swa nkombo. Ndzi vona ni ntsumi ya matimba yi huwelela hi rito lerikulu yi ku: ‘I mani loyi swi n’wi fanelaka ku pfula buku-nsongwa, a lemula swilemo swa yona?’ Kambe a a nga ri kona ni un’we etilweni ni la misaveni ni le hansi ka misava loyi a kotaka ku pfula buku-nsongwa kumbe ku languta endzeni ka yona. Hiloko ndzi rila ngopfu hikuva a nga kumekanga ni un’we loyi a swi n’wi fanela ku pfula buku-nsongwa kumbe ku languta endzeni ka yona.”—Nhlavutelo 5:1-4.

2, 3. (a) Hikwalaho ka yini Yohane a swi navele hi mbilu hinkwayo leswaku ku kumeka la nga ta pfula buku-nsongwa, kambe ku humelele yini? (b) I yini leswi vanhu va Xikwembu lava totiweke va swi rindzeleke hi mahlo-ngati enkarhini wa hina?

² Yehovha hi yexe, Hosi Leyi Lawulaka ya ntumbuluko hinkwawo, u tamele buku-nsongwa yoleyo. Yi fanele yi tele hi rungula ra nkoka, hikuva yi tsariwe endzeni ni le handle. Se hi navela ku tiva. Xana buku-nsongwa leyi yi tamele yini? Hi tsundzuka loko Yehovha a rhamba Yohane a ku: “Tlhandlukela haleno, ndzi ta ku komba swilo leswi fanelaka ku endleka.” (Nhlavutelo 4:1) Hi swi langutele hi mahlo-ngati ku tiva swilo sweswo. Kambe khombo ra kona, buku-nsongwa yi pfariwe yi tiya, yi lemiwe hi swilemo swa nkombo!

³ Xana ntsumi ya matimba yi ta n’wi kuma munhu la faneriwaka hi ku pfula buku-nsongwa leyi? Hi ku ya hi Bibele leyi vuriwaka Kingdom Interlinear, buku-nsongwa leyi yi le “vokweni ra xinene” ra Yehovha. Leswi swi vula leswaku yi le xandleni xakwe lexi pfulekeke. Kambe ku vonaka ku ri hava ni un’we etilweni kumbe emisaveni la faneriwaka hi ku amukela ni ku pfula buku-nsongwa yoleyo. Hambi ku ri ehansi ka misava, exikarhi ka malandza lama tshembekaka ya Xikwembu lama feke, a nga kona la fanelekelaka lunghelo leri ra xiyimo xa le henhla. A swi hlamarisi leswi Yohane a vonakaka a hlunamile! Kumbexana a nge swi tivi “swilo leswi fanelaka ku endleka.” Ni le nkarhini lowu wa hina, vanhu va Xikwembu lava totiweke va yimele Yehovha hi mahlo-ngati leswaku a tisa ku vonakala kakwe ni ntiyiso lowu hlamuselaka buku ya Nhlavutelo. Leswi u ta swi endla hi ku famba ka nkarhi hi nkarhi lowu vekiweke wa ku hetiseka ka vuprofeta, leswaku a yisa vanhu vakwe eku ‘ponisiweni lokukulu.’—Pisalema 43:3, 5.

La Fanelekaka

4. (a) I mani loyi a fanelekaka ku pfula buku-nsongwa ni swilemo swa yona? (b) Hi yihi hakelo leyi lava ntlawa wa Yohane ni vanghana va vona sweswi va tiphinaka hi yona?

⁴ Ina, u kona loyi a swi kotaka ku pfula buku-nsongwa! Yohane wa hlamusela: “Kambe un’wana wa vakulu a ku eka mina: ‘Tshika ku rila. Waswivo! Nghala leyi nga ya nyimba ya Yuda, rimitsu ra Davhida, yi hlurile leswaku yi pfula buku-nsongwa ni swilemo swa yona swa nkombo.’” (Nhlavutelo 5:5) Hiloko Yohane a sula mihloti! Lava ntlawa wa Yohane ni vanghana va vona lava tshembekaka, namuntlha na vona va hete makume ya malembe va ri karhi va tiyisele miringo leyikulu loko va ha rindzele ku voningeriwa. Mawaku hakelo leyi chavelelaka swonghasi hi ku twisisa xivono lexi, naswona i lunghelo ronghasi ku hlanganyela eku hetisekeni ka xona hi ku huwelela rungula ra xona eka van’wana!

5. (a) I vuprofeta byihi lebyi vuriweke malunghana na Yuda, naswona vatukulu va Yuda va fume kwihi? (b) I mani Xilo?

⁵ “Nghala leyi nga ya nyimba ya Yuda”! Yohane a a byi tiva vuprofeta lebyi Yakobe, tata wa rixaka ra Vayuda, a byi vuleke malunghana ni n’wana wakwe wa vumune, Yuda, a ku: “Yuda i n’wana wa nghala. N’wananga, kunene u ta tlhandluka u suka eka lexi u xi hlaseleke. A pavalala a tiolola ku fana ni nghala, naswona ku fana ni nghala, xana i mani la nga n’wi pfuxaka? Nhonga ya vuhosi a yi nge hambukisiwi eka Yuda hambi ku ri nhonga ya ndhuna emilengeni yakwe, kukondza ku fika Xilo; naswona vanhu va ta yingisa yena.” (Genesa 49:9, 10) Rixaka ra vuhosi ra vanhu va Xikwembu ri hume eka Yuda. Ku sungula eka Davhida, tihosi hinkwato leti fumeke eYerusalema ku kondza loko Vababilona va lovisa muti wolowo a ti ri vatukulu va Yuda. Kambe ku hava ni un’we wa vona loyi a a ri Xilo loyi Yakobe a profeteke ha yena. Xilo swi vula ‘Loyi Mfanelo Yi Nga Ya Yena.’ Hi ku ya hi vuprofeta, vito leri a ri kongomisiwe eka Yesu, loyi Mfumo wa Davhida sweswi wu nga wa yena hilaha ku nga heriki.—Ezekiyele 21:30-32; Luka 1:32, 33; Nhlavutelo 19:16.

6. Xana Yesu a a ri “hluke” ra Yese a tlhela a va “rimitsu ra Davhida” hi ndlela yihi?

⁶ Yohane u hatle a swi xiya leswaku i mani loyi a nga “rimitsu ra Davhida.” Vuprofeta byi vula leswaku Mesiya la tshembisiweke, i “xirhabyana exikundzwini xa Yese [tata wa Hosi Davhida] . . . xihluke” ni “rimitsu ra Yese leri nga ta yima ri va xikombiso eka vanhu.” (Esaya 11:1, 10) Yesu a a ri hluke ra Yese, hikuva a a velekiwe erixakeni ra vuhosi ra Davhida, n’wana Yese. Ku tlula kwalaho, tanihi rimitsu ra Yese, a a ri Yena la vangeleke mfumo wa Davhida leswaku wu tlhela wu hluka, a wu nyika vutomi ni ku wu tiyisa hilaha ku nga heriki.—2 Samuwele 7:16.

7. I yini lexi endlaka leswaku Yesu a faneriwa hi ku teka buku-nsongwa evokweni ra Loyi a tshameke exiluvelweni?

⁷ A nga kona un’wana la tirheleke Yehovha hi ku tshembeka naswona a ri ehansi ka miringo leyo tika swinene ku fana na Yesu. U nyikele nhlamulo leyi heleleke eka mphikamakaneta leyi pfuxiweke hi Sathana. (Swivuriso 27:11) Xisweswo, u swi kotile ku vula hilaha a vuleke hakona eka vusiku bya le mahlweni ka rifu rakwe ra gandzelo a ku, “misava ndzi yi hlurile.” (Yohane 16:33) Hikwalaho ka sweswo, Yehovha u nyike Yesu la pfuxiweke “vulawuri hinkwabyo etilweni ni le misaveni.” Hi yena a ri yexe eka malandza hinkwawo ya Xikwembu la faneriwaka hi ku amukela buku-nsongwa, leswaku a ta twarisa rungula ra yona ra nkoka.—Matewu 28:18.

8. (a) Malunghana ni Mfumo, i yini lexi kombaka leswaku Yesu wa faneleka? (b) Hikwalaho ka yini swi fanerile leswaku un’wana wa vakulu va 24 a hlavutela Yohane hi ta loyi a faneriwaka hi ku pfula buku-nsongwa leyi?

⁸ Swa fanela hakunene, leswaku Yesu a pfula buku-nsongwa. Ku sukela hi 1914 u vekiwe exiluvelweni tanihi Hosi ya Mfumo wa Mesiya wa Xikwembu, naswona buku-nsongwa yoleyo yi paluxa swo tala malunghana ni Mfumo ni leswi wu nga ta swi endla. Yesu u seketele ntiyiso wa Mfumo hi vutshembeki loko a ha ri la misaveni. (Yohane 18:36, 37) U dyondzise valandzeri vakwe ku khongelela leswaku Mfumo wolowo wu ta. (Matewu 6:9, 10) U sungule ku chumayela mahungu lamanene ya Mfumo eku sunguleni ka nguva ya Vukreste ivi a profeta leswaku ntirho wolowo wo chumayela wu ta chaputa enkarhini wa makumu. (Matewu 4:23; Marka 13:10) Hi mukhuva lowu fanaka swa fanela leswaku un’wana wa vakulu va 24 a hlavutela Yohane leswaku Yesu hi yena loyi a a ta pfula swilemo sweswo. Ha yini? Hikuva vakulu lava va tshama eswiluvelweni naswona va vehele tiharhi, tanihi leswi va nga vadyandzhaka swin’we na Kreste eMfun’weni wakwe.—Varhoma 8:17; Nhlavutelo 4:4.

‘Xinyimpfana Lexi A Xi Tlhaviwile’

9. Ematshan’weni ya nghala, i yini lexi Yohane a xi voneke xi yime “exikarhi ka xiluvelo,” naswona u xi hlamusele hi ndlela yihi?

⁹ Yohane u langutile leswaku a ta vona “Nghala leyi nga ya nyimba ya Yuda.” Kambe u hlamarisiwe hi leswi a swi voneke! Ku humelele xivumbeko xo fanekisela lexi hambaneke hi ku helela: “Hiloko ndzi vona exikarhi ka xiluvelo ni swivumbiwa leswi hanyaka swa mune ni le xikarhi ka vakulu ku yime xinyimpfana onge hiloko xi tlhaviwile, xi ri ni timhondzo ta nkombo ni mahlo ya nkombo, laha mahlo ma vulaka mimoya ya nkombo ya Xikwembu leyi rhumiweke emisaveni hinkwayo.”—Nhlavutelo 5:6.

10. Xana “xinyimpfana” lexi Yohane a xi voneke i mani, naswona hikwalaho ka yini vito leri ri n’wi fanela?

¹⁰ Exikarhi, kambe etlhelo ka xiluvelo, endzeni ka xirhendzevutana lexi vumbiwaka hi swivumbiwa leswi hanyaka swa mune ni lexi vumbiwaka hi vakulu va 24, ku ni xinyimpfana! Handle ko kanakana, Yohane u hatle a fanisa xinyimpfana lexi ni “Nghala leyi nga ya nyimba ya Yuda” ni “rimitsu ra Davhida.” A a swi tiva leswaku emalembeni lama tlulaka 60 lama hundzeke, Yohane Mukhuvuri u tivise Yesu eka Vayuda lava hlaleleke a va byela leswaku i “Xinyimpfana xa Xikwembu lexi susaka xidyoho xa misava!” (Yohane 1:29) Nkarhi hinkwawo wa ku hanya kakwe emisaveni, Yesu a nga thyakisiwanga hi misava—tanihi xinyimpfana lexi nga solekiki—leswaku a ta kota ku nyikela vutomi byakwe lebyi nga hava xisolo byi va gandzelo ra vanhu.—1 Vakorinto 5:7; Vaheveru 7:26.

11. Hikwalaho ka yini ku nga ri ku delela ku fanisa Yesu la kwetsimisiweke ni “xinyimpfana [lexi] onge hiloko xi tlhaviwile”?

¹¹ Xana swi vonaka ku ri ku delela Yesu la kwetsimisiweke loko a fanisiwa ni “xinyimpfana [lexi] onge hiloko xi tlhaviwile”? Doo! Ku va Yesu a tshame a tshembekile ku ya fika eku feni a ku ri ku hluriwa lokukulu ka Sathana ni ku hlula lokukulu ka Yehovha Xikwembu. Ku fanisa Yesu hi ndlela leyi swi fanekisela ku hlula ka yena misava ya Sathana naswona i xitsundzuxo xa ndlela leyi Yehovha na Yesu va va rhandzaka ha yona vanhu. (Yohane 3:16; 15:13; ringanisa na Vakolosa 2:15.) Xisweswo Yesu u hlamuseriwa tanihi Mbewu leyi tshembisiweke, leyi fanelekaka kahle ku pfula buku-nsongwa leyi.—Genesa 3:15.

12. Xana timhondzo ta nkombo ta Xinyimpfana ti fanekisela yini?

¹² I yini xin’wana lexi endlaka leswaku hi hambeta hi tlangela “xinyimpfana” lexi? Hi leswaku xi ni timhondzo ta nkombo. Hakanyingi timhondzo eBibeleni ti fanekisela matimba kumbe vuhosi, naswona nkombo yi komba ku helela. (Ringanisa na 1 Samuwele 2:1, 10; Pisalema 112:9; 148:14.) Kutani, timhondzo ta nkombo ta Xinyimpfana ti yimela matimba lama heleleke lawa Yehovha a ma nyikeke Yesu. U le “[henhla] swinene ka hulumendhe yin’wana ni yin’wana ni vulawuri ni matimba ni vuhosi ni vito rin’wana ni rin’wana leri vitaniwaka, ku nga ri eka mafambiselo lawa ya swilo ntsena, kambe ni le ka lama taka.” (Vaefesa 1:20-23; 1 Petro 3:22) Yesu u tirhise matimba yo fuma, ngopfu-ngopfu ku sukela hi 1914 loko Yehovha a n’wi veke exiluvelweni tanihi Hosi ya le tilweni.—Pisalema 2:6.

13. (a) Xana mahlo ya nkombo ya Xinyimpfana ma fanekisela yini? (b) Xinyimpfana xi ya emahlweni xi endla yini?

¹³ Ku tlula kwalaho, Yesu u tele hi moya lowo kwetsima hilaha ku heleleke, hilaha swi kombiweke hakona hi matihlo ya nkombo ya Xinyimpfana, leswi vulaka “mimoya ya nkombo ya Xikwembu.” Yehovha u tirhisa Yesu ku hundzisela matimba ya yena lama tirhaka eka malandza ya Yena ya laha misaveni. (Tito 3:6) Entiyisweni, u kota ku vona leswi endlekaka laha misaveni hi ku tirhisa moya wolowo. Yesu u ni vutlhari lebyi hetisekeke tanihi Tata wa yena. Ku hava lexi a nga xi voniki. (Ringanisa na Pisalema 11:4; Zakariya 4:10.) Entiyisweni N’wana loyi—la tshameke a tshembekile kukondza a hlula misava; Nghala ya rixaka ra Yuda; rimitsu ra Davhida; loyi a nyikeleke vutomi bya yena hikwalaho ka vanhu; loyi a nga ni vulawuri lebyi heleleke, la kongomisiwaka hilaha ku heleleke hi moya lowo kwetsima ni ku twisisa loku hetisekeke loku humaka eka Yehovha Xikwembu—ina, hi yena ntsena la faneriwaka hi ku teka buku-nsongwa evokweni ra Yehovha. Xana wa kanakana ku amukela xileriso lexi xa ntirho enhlengeletanweni leyi tlakukeke ya Yehovha? Doo! Ematshan’wini ya sweswo, ‘u ya a ya yi teka buku-nsongwa evokweni ra xinene ra Loyi a tshameke exiluvelweni.’ (Nhlavutelo 5:7) Lexi i xikombiso lexinene swonghasi xa ku yingisa hi ku swi rhandza!

Tinsimu Ta Ku Dzunisa

14. (a) Xana swivumbiwa leswi hanyaka swa mune ni vakulu va 24 va endlisa ku yini loko Yesu a teka buku-nsongwa? (b) Marungula lawa Yohane a ma kumaka mayelana ni vakulu va 24 ma swi tiyisekisa njhani leswaku i vamani ni leswaku xikhundlha xa vona hi xihi?

¹⁴ Xana lavan’wana lava nga emahlweni ka xiluvelo xa Yehovha va angurisa ku yini loko Xinyimpfana xi teka buku-nsongwa? “Loko xi teka buku-nsongwa, swivumbiwa swa mune leswi hanyaka, ni vakulu va 24 va wa ehansi emahlweni ka Xinyimpfana, un’wana ni un’wana a ri ni haripa ni nkambana wa nsuku lowu teleke murhi wa risuna, naswona murhi wa risuna wu vula swikhongelo swa vakwetsimi.” (Nhlavutelo 5:8) Vakulu lava 24 va nkhinsamela Yesu ku komba ku amukela vuhosi byakwe ku fana ni swivumbiwa leswi hanyaka swa mune leswi nga makerubu, leswi nga emahlweni ka xiluvelo xa Xikwembu. Kambe vakulu lava hi vona ntsena lava nga ni tiharipa ni minkambana ya murhi wa risuna.a Kutani va tlhela va yimbelela risimu lerintshwa va ri voxe. (Nhlavutelo 5:9) Xisweswo va yimela lava 144 000, lava nga “Israyele wa Xikwembu” wo kwetsima, loyi na yena a tameleke tiharipa naswona a yimbelelaka risimu lerintshwa. (Vagalatiya 6:16; Vakolosa 1:12; Nhlavutelo 7:3-8; 14:1-4) Nakambe, vakulu lava 24 va kombisiwa va ri lava hetisisaka ntirho wa le matilweni, wa vuprista, lowu fanekiseriwaka hi lowuya wa vaprista va le Israyele wa khale lava a va hisela Yehovha mirhi ya risuna etabernakeleni—ntirho lowu nga hela loko Xikwembu xi susa Nawu wa Muxe, xi wu belela emhandzini ya nxaniso ya Yesu. (Vakolosa 2:14) Xana hi gimeta hi leri nge yini emhakeni leyi hinkwayo? Hi gimeta hi leswaku vatotiwa lava hlulaka va voniwa va ri eswiavelweni leswi va swi kumaka eku heteleleni, va ri ‘vaprista va Xikwembu ni va Kreste, lava fumaka tanihi tihosi swin’we na yena ku ringana malembe ya 1 000.’—Nhlavutelo 20:6.

15. (a) Le Israyele, i mani ntsena loyi a a ri ni lunghelo ro nghena eNdhawini yo Kwetsima Ngopfu ya tabernakela? (b) Hikwalaho ka yini a swi ri khombo ku va muprista lonkulu a nghena eNdhawini yo Kwetsima Ngopfu a nga rhanganga a hisa murhi wa risuna?

¹⁵ Le Israyele wa khale, a ku nghena muprista lonkulu ntsena eNdhawini yo Kwetsima Ngopfu leyi a yi fanekisela vukona bya Yehovha. Ku tamela murhi wa risuna a yi ri mhaka ya ku fa ni ku hanya eka yena. Nawu wa Yehovha wu te: “[Aroni] u fanele a teka xo tamela ndzilo ealitarini leyi nga emahlweni ka Yehovha xi tele hi makala lama pfurhaka ndzilo ni mavoko yakwe hamambirhi ma tele hi xinun’hweriso lexinene xa murhi wa risuna, u fanele a swi tisa endzeni ka nguvu leyi sirhelelaka. U fanele a chela ni murhi wa risuna ehenhla ka ndzilo emahlweni ka Yehovha, kutani papa ra murhi wa risuna ri fanele ri funengeta xifunengeto xa Areka leyi nga ehenhla ka Vumbhoni leswaku a nga fi.” (Levhitika 16:12, 13) Muprista lonkulu a a ta fa loko o nghena eNdhawini yo Kwetsima Ngopfu a nga hisanga murhi wa risuna.

16. (a) Eka mafambiselo ya swilo ya Vukreste i vamani lava nghenaka eNdhawini yo fanekisela yo Kwetsima Ngopfu? (b) Ha yini Vakreste lava totiweke va fanele va ‘hisa murhi wa risuna’?

¹⁶ Loko swi ta emafambiselweni ya swilo ya Vukreste, eNdhawini yo fanekisela yo Kwetsima Ngopfu, leyi nga xivandla xa vukona bya Yehovha etilweni, a ku ngheni Muprista Lonkulu wo fanekisela ntsena, ku nga Yesu Kreste, kambe un’wana ni un’wana wa vaprista va 144 000 lava nga ehansi ka yena u hetelela a nghenile. (Vaheveru 10:19-23) Vaprista lavan’wana lava nga ehansi ka Yesu Kreste a va swi koti ku nghena eNdhawini yo Kwetsima Ngopfu tanihi leswi va yimeriwaka hi vakulu va 24, handle ka loko va hise “murhi wa risuna,” leswi vulaka leswaku va tshama va ri karhi va kongomisa swikhongelo ni swikombelo swa vona eka Yehovha.—Vaheveru 5:7; Yuda 20, 21; ringanisa na Pisalema 141:2.

Risimu Lerintshwa

17. (a) Hi rihi risimu lerintshwa leri vakulu va 24 va ri yimbelelaka? (b) Xana xiga lexi nge “risimu lerintshwa” hakanyingi xi tirhisiwa njhani eBibeleni?

¹⁷ Sweswi ku pfuma risimu ra miloti. Ri yimbeleleriwa Xinyimpfana hi vaprista-kulobye ku nga vakulu va 24: “Kutani va yimbelela risimu lerintshwa, va ku: ‘Swa ku fanela ku teka buku-nsongwa u pfula swilemo swa yona, hikuva u tlhaviwile naswona hi ngati ya wena u xavele Xikwembu vanhu lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo.’” (Nhlavutelo 5:9) Xiga lexi nge “risimu lerintshwa” xi humelela ko tala eBibeleni naswona hakanyingi xi vula ku dzunisa Yehovha hikwalaho ka ntirho wo karhi wa matimba wa ku kutsula. (Pisalema 96:1; 98:1; 144:9) Xisweswo, risimu leri i rintshwa hikuva sweswi muyimbeleri wa rona a nga huwelela mintirho leyi engetelekeke yo hlamarisa ya Yehovha ni ku kombisa ku tlangela loku pfuxetiweke ka vito ra Yena leri vangamaka.

18. Ha yini vakulu va 24 va dzunisa Yesu hi risimu ra vona lerintshwa?

¹⁸ Kambe, laha vakulu va 24 va yimbelela risimu lerintshwa emahlweni ka Yesu ku nga ri emahlweni ka Yehovha. Kambe xikongomelo xa rona xa fana. Va dzunisa Yesu hikwalaho ka swilo leswintshwa leswi yena, tanihi N’wana wa Xikwembu, a va endleleke swona. Hi ngati yakwe, u endle ntwanano lowuntshwa ivi a endla leswaku swi koteka ku humesa tiko lerintshwa tanihi tiko leri hlawulekeke ra Yehovha. (Varhoma 2:28, 29; 1 Vakorinto 11:25; Vaheveru 7:18-25) Swirho swa tiko leri lerintshwa ra moya swi huma ematikweni yo tala ya xiviri, kambe Yesu u swi hlanganisile evandlheni rin’we swi va tiko rin’we.—Esaya 26:2; 1 Petro 2:9, 10.

19. (a) I nkateko wihi lowu Vaisrayele va nyama va hlulekeke ku wu vona hikwalaho ka leswi va nga tshembekangiki? (b) I nkateko wihi lowu tiko lerintshwa ra Yehovha ri wu kumaka?

¹⁹ Loko Yehovha a endle Vaisrayele va va tiko ra yena enkarhini wa Muxe, u endle ntwanano na vona ivi a va tshembisa leswaku loko vo tshama va tshembekile eka ntwanano wolowo, va ta va tiko ra vaprista emahlweni ka yena. (Eksoda 19:5, 6) Vaisrayele a va tshembekanga kutani a va ku vonanga ku hetiseka ka xitshembiso xexo. Hi hala tlhelo, tiko lerintshwa, leri vumbiweke hikwalaho ka ntwanano lowuntshwa lowu hlanganisiweke hi Yesu, ri tshame ri tshembekile. Hikwalaho, swirho swa rona swi ta fuma misava tanihi tihosi ni ku va vaprista, swi pfuna vanhu lava tshembekaka leswaku va vuyelelana na Yehovha. (Vakolosa 1:20) Swi hilaha risimu lerintshwa ri swi vekaka hakona loko ri ku: “Naswona u va endle va va mfumo ni vaprista eka Xikwembu xa hina, va ta va tihosi emisaveni.” (Nhlavutelo 5:10) Anakanya ndlela leyi vakulu volavo va 24 va swi tsakelaka ha yona ku yimbelela risimu leri lerintshwa leri dzunisaka Yesu la kwetsimaka!

Risimu Ra Le Tilweni

20. Hi rihi risimu ro dzunisa Xinyimpfana leri yimbeleriwaka sweswi?

²⁰ Xana van’wana va vandla lerikulu ra le tilweni ra nhlengeletano ya Yehovha va angurisa ku yini eka risimu leri lerintshwa? Yohane a a tsakile loko a vona vun’we bya vona lebyo hlamarisa, u te: “Kutani ndzi languta, hiloko ndzi twa rito ra tintsumi to tala leti rhendzeleke xiluvelo ni ra swivumbiwa leswi hanyaka ni vakulu, nhlayo ya tona a yi ri timiriyadi ta timiriyadi ni magidi ya magidi, ti vula hi rito lerikulu ti ku: ‘Xinyimpfana lexi a xi tlhaviwile xi faneriwa hi ku amukela matimba ni rifuwo ni vutlhari ni ntamu ni ku xiximiwa ni ku vangama ni ku dzuneka.’” (Nhlavutelo 5:11, 12) Mawaku risimu ro tsakisa swonghasi ra ku dzunisa!

21. Xana ku dzunisiwa ka Xinyimpfana ku siva vuhosi kumbe xikhundlha xa Yehovha? Hlamusela.

²¹ Xana leswi swi vula leswaku sweswi Yesu hi ndlela yo karhi u sive Yehovha Xikwembu ni leswaku swivumbiwa hinkwaswo se swi dzunisa yena ematshan’weni ya Tata wa yena? Nikatsongo! Ematshan’weni ya sweswo, risimu leri ra ku dzunisa ri pfumelelana ni leswi muapostola Pawulo a swi tsaleke loko a ku: “Xikwembu xi n’wi [Yesu] tlakusele exiyin’weni lexi tlakukeke kutani hi musa xi n’wi nyika vito leri nga ehenhla ka mavito man’wana hinkwawo, leswaku matsolo hinkwawo ya lava nga etilweni ni lava nga emisaveni ni lava nga ehansi ka misava, ma nkhinsama hi vito ra Yesu, naswona ririmi rin’wana ni rin’wana ri fanele ku twarisa erivaleni leswaku Yesu Kreste i Hosi leswaku ku vangamisiwa Xikwembu Tatana.” (Vafilipiya 2:9-11) Laha Yesu u tlakusiwa hikwalaho ka ntirho wakwe emhakeni ya ku lulamisa mphikamakaneta leyikulu emahlweni ka swivumbiwa hinkwaswo—ku nga ku lweriwa ka mfanelo ya Yehovha yo va hosi. Leswi swi kwetsimise Tata wa yena hakunene!

Risimu Leri Pfumaka

22. Hi rihi risimu leri marito lama humaka emisaveni ma hlanganyelaka eka rona?

²² Exivonweni lexi hlamuseriweke hi Yohane, mavandla ya le tilweni ma yimbelelela Yesu risimu ra miloti leswaku ma tlangela vutshembeki bya yena ni vuhosi byakwe bya le tilweni. Eka risimu ra vona va joyiniwa hi marito lama humaka emisaveni loko lava nga emisaveni va hlanganyela na vona eku dzuniseni ka Tatana ni N’wana. Tanihi leswi vatswari va nga tibumaka hikwalaho ka mintirho ya n’wana wa vona, vutshembeki bya Yesu bya vonaka exikarhi ka swivumbiwa hinkwaswo lerova sweswo swi endla leswaku “ku vangamisiwa Xikwembu Tatana.” Xisweswo, Yohane u ye emahlweni a ku: “Kutani ndzi twa xivumbiwa xin’wana ni xin’wana lexi nga etilweni ni la misaveni ni le hansi ka misava ni le lwandle, ni swilo hinkwaswo leswi nga eka swona swi ku: ‘Ku dzuneka ni ku xiximiwa ni ku vangama ni matimba a swi ve eka Loyi a tshameke exiluvelweni ni le ka Xinyimpfana hi masiku ni masiku.’”—Nhlavutelo 5:13.

23, 24. (a) I yini lexi kombaka leswaku risimu leri a ri ta sungula rini ku yimbeleriwa etilweni, ni leswaku a ri ta sungula rini ku yimbeleriwa emisaveni? (b) Xana mpfumawulo wa risimu leri wu engeteleka hi ndlela yihi loko malembe ma ri karhi ma famba?

²³ Xana risimu leri ro hlamarisa ri yimbeleriwa rini? Ri sungule ku yimbeleriwa eku sunguleni ka siku ra Hosi. Endzhaku ka loko Sathana ni madimona yakwe va hlongoriwile etilweni, “xivumbiwa xin’wana ni xin’wana lexi nga etilweni” xi hlanganyele eka risimu leri ro dzunisa. Naswona, hilaha rungula leri tsariweke ri kombaka hakona, ku sukela hi 1919 vunyingi lebyi kulaka emisaveni byi hlanganise marito ya byona ku dzunisa Yehovha, byi andza ku suka eka magidi ma nga ri mangani byi ya tlula timiliyoni ta tsevu hi lembe ra 2005.b Endzhaku ka loko mafambiselo ya Sathana ya laha misaveni ma herisiwile, “xivumbiwa xin’wana ni xin’wana . . . la misaveni” xi ta va xi yimbelela swidzuniso eka Yehovha ni N’wana wa yena. Hi nkarhi lowu faneleke wa Yehovha, ku pfuxiwa ka vafi va ntsandza-vahlayi ku ta sungula, kutani ‘xivumbiwa xin’wana ni xin’wana lexi nga ehansi ka misava’ lexi tsundzukiwaka hi Xikwembu xi ta kota ku hlanganyela eku yimbeleleni ka risimu rero.

²⁴ Ana se ‘ku sukela emakumu ya misava, ya lwandle ni ya swihlala,’ timiliyoni ta vanhu ti yimbelela risimu lerintshwa swin’we ni nhlengeletano ya Yehovha ya misava hinkwayo. (Esaya 42:10; Pisalema 150:1-6) Ku dzunisa loku ko tsakisa ku ta chaputa eku heleni ka Gidi ra Malembe, loko vanhu va endliwe lava hetisekeke. Endzhaku ka sweswo nyoka yoleyo ya khale, muxisi lonkulu Sathana hi yexe, u ta va a loviseriwe makumu leswaku Genesa 3:15 yi hetiseka hilaha ku heleleke, naswona swivumbiwa hinkwaswo leswi hanyaka, swa moya ni swa nyama, swi ta yimbelela hi vun’we swi ku: “Ku dzuneka ni ku xiximiwa ni ku vangama ni matimba a swi ve eka Loyi a tshameke exiluvelweni ni le ka Xinyimpfana hi masiku ni masiku.” Emisaveni hinkwayo a ri nge vi kona rito leri kokelaka tlhelo.

25. (a) Loko hi hlaya rungula ra Yohane ra risimu leri yimbeleriwaka emisaveni hinkwayo ri hi susumetela ku endla yini? (b) I xikombiso xihi lexinene lexi hi vekeriweke xona hi swivumbiwa leswi hanyaka swa mune ni vakulu va 24 loko xivono xi hela?

²⁵ Wolowo wu ta va wu ri nkarhi lowu tsakisaka! Hakunene, leswi Yohane a swi hlamuselaka laha swi tata timbilu ta hina hi ntsako naswona swi hi susumeta leswaku hi hlanganyela ni mavandla ya le tilweni, hi yimbelelela Yehovha Xikwembu na Yesu Kreste swidzuniso hi mbilu hinkwayo. Hakunene hi tiyimisele swinene ku namarhela ku endla mintirho leyinene ku tlula rini na rini! Loko hi endla tano, hi nga rindzela leswaku hi mpfuno wa Yehovha, ha un’we wa hina a va kona eku chaputeni loku tsakisaka, hi engetela marito ya hina eka risimu rero ra misava hinkwayo ra ku dzunisa. Entiyisweni, swivumbiwa leswi hanyaka swa mune leswi nga makerubu ni Vakreste lava totiweke lava pfuxiweke, va pfumelelana hilaha ku heleleke hikuva xivono xi gimeta hi marito lawa: “Hiloko swivumbiwa leswi hanyaka swa mune swi ku: ‘Amen,’ kutani vakulu va wa ehansi va gandzela.”—Nhlavutelo 5:14.

26. Hi fanele ku kombisa ripfumelo eka yini, naswona Xinyimpfana xi tilulamisela ku endla yini?

²⁶ Onge wena muhlayi la rhandzekaka, u nga va ni ripfumelo egandzelweni ra Xinyimpfana—lexi ‘fanelekaka’—naswona onge matshalatshala ya wena yo gandzela Yehovha ni ku n’wi tirhela ma nga katekisiwa—hi yena “Loyi a tshameke exiluvelweni.” Pfumelela lava ntlawa wa Yohane va ku pfuna namuntlha tanihi leswi va phamelaka “mpimo wa . . . mphakelo wa swakudya [swa moya] hi nkarhi lowu faneleke.” (Luka 12:42) Kambe vona! Xinyimpfana xi lunghiselela ku pfula swilemo swa nkombo. I yini leswi hi nga ta paluxeriwa swona hi ndlela leyi tsakisaka?

[Tinhlamuselo ta le hansi]

[Xifaniso lexi tataka tluka hinkwaro lexi nga eka tluka 86]