Tindlela Leti Va Ti Tirhisaka Ku Ku Byela Wona
Vakriste va lerisiwe ku “hundzula vamatiko hinkwawo leswaku va va vadyondzisiwa,” kambe leswi a swi vuli swona leswaku va fanele va tirhisa ntlimbeleto kumbe va hundzula van’wana hi nsindziso. Xileriso xa Yesu a ku ri ku “byela swisiwana emahungu ya ku saseka,” ku “horisa lava nga ni timbilu leti vavisekaka,” ku “chavelela hinkwavo lava vavisekaka.” (Matewu 28:19; Esaya 61:1, 2; Luka 4:18, 19) Timbhoni ta Yehova ti lava ku endla leswi hi ku twarisa “mahungu lamanene” lama humaka eBibeleni. Tanihi muprofeta Ezekiyele wa khale, Timbhoni ta Yehova namuntlha ti ringeta ku kuma lava “rilaka hikwalaho ka manyala hinkwawo lama endliwaka.”—Ezekiel 9:4.
Ndlela leyi tivekaka swinene leyi va yi tirhisaka ku kuma lava va tshikileriwaka hi swiyimo swa namuntlha i ku famba hi yindlu na yindlu. Xisweswo va endla matshalatshala lamanene yo fikelela vanhu hinkwavo, hi laha Yesu a endleke ha kona loko “a famba hi miti ni swimitana a ri karhi a vula Rito, a twarisa Evangeli ya Mfumo wa Xikwembu.” Vadyondzisiwa vakwe vo sungula va endle leswi fanaka. (Luka 8:1; 9:1-6; 10:1-9) Namuntlha, laha swi kotekaka, Timbhoni ta Yehova ti ringeta ku endzela muti wun’wana ni wun’wana hi makhamba yo tala hi lembe, va lava ku vulavurisana ni n’wini wa muti hi timinete ti nga ri tingani ehenhleni ka mhaka ya kwalaho kumbe ya misava yo tsakisa kumbe leyi nga ya nkoka. Ku nga ha vulavuriwa hi tsalwa rin’we kumbe mambirhi, naswona loko ku tsakela ku kombisiwa hi n’wini wa muti Mbhoni yi nga ha lunghiselela ku tlhelela hi nkarhi lowu faneleke leswaku ku vulavurisana ku ya emahlweni. Tibibele na tibuku leti hlamuselaka Bibele ta nyikeriwa, naswona, loko n’wini wa muti a swi lava, dyondzo ya Bibele ya le kaya ya fambisiwa mahala. Hi 1988 avhareji ya tidyondzo ta Bibele ta kwalomu ka 3 250 000 ti fambisiwe hi ndlela yoleyo nkarhi na nkarhi emisaveni hinkwayo.
Ndlela yin’wana leyi “mahungu lamanene ya Mfumo” ma byeriwaka van’wana ha yona i ku tirhisa minhlangano leyi khomeriwaka eTiholweni ta Mfumo ta ndhawu yoleyo. Timbhoni ti fambisa minhlangano kona vhiki na vhiki. Nhlangano wun’wana i nkulumo ya le rivaleni ya mhaka ya sweswinyana leyi tsakisaka, wu landzeriwa hi dyondzo ya nhloko-mhaka ya Bibele kumbe vuprofeta, hi ku tirhisa magazini wa Xihondzo xo Rindza tanihi xihlovo xa mhaka ya kona. Nhlangano wa vunharhu i xikolo xo letela Timbhoni ku va vahuweleri lava antswaka va mahungu lamanene, ivi wu landzeriwa hi xiyenge lexi nga endleriwa ku vulavula hi ntirho wo veka vumbhoni ensin’wini ya kwalaho. Nakambe, kan’we hi vhiki Timbhoni ti hlangana emakaya ya vanhu, hi mintlawa leyintsongo, ti hlanganyela tidyondzo ta Bibele.
Minhlangano leyi hinkwayo yi pfulekele mani na mani. Ku hava minhlengo leyi tekiwaka. Minhlangano yo tano yi pfuna hinkwerhu. Bibele yi ri: “Swa hi fanela ku vona hi laha un’wana ni un’wana wa hina a nga khutazaka van’wana ha kona ku antswa leswaku va va ni rirhandzu ni vunene lebyi hanyaka, hayi ku tshika minhlangano ya hina, hi laha van’wana va endlaka ha kona, kambe hi khongotelana, ngopfu-ngopfu leswi mi vonaka Siku ri tshinela.” Dyondzo ya munhu hi xiyexe ni ku lavisisa i swa nkoka, kambe ku hlangana ni van’wana swa khutaza: “Tanihi leswi nsimbi yi lotaka nsimbi, swi tano munhu u lota mianakanyo ya un’wana.”—Vaheveru 10:24, 25; Swivuriso 27:17, The New English Bible.
Nakambe Timbhoni ti tirhisa ngopfu minkarhi leyi pfulekeke ku vulavula hi mahungu lamanene loko ti hlangana ni vanhu van’wana evuton’wini bya tona bya siku na siku. Ku nga ha va marito ma nga ri mangani lama vulavuriweke ni muakelani, kumbe ni loyi va fambaka na yena ebazini kumbe eka xihaha-mpfhuka, ku vulavurisana ko leha ni munghana kumbe xaka, kumbe ku vulavurisana ni mutirhi-kulobye hi nkarhi wa dina. Ku veka vumbhoni ko tala loku Yesu a ku endleke loko a ri emisaveni a ku ri ka muxaka lowu—loko a ri karhi a famba eribuweni ra lwandle, a tshamile etlhelo ka ntshava, loko a ri karhi a dya emutini wa un’wana, enkhubyeni wa vukati, kumbe loko a famba hi byatso byo kukuta tinhlampfi eLwandle ra Galeliya. U dyondzise emasinagogeni ni le tempeleni eYerusalema. Kwihi na kwihi laha a a ri kona, u kume nkarhi wo vulavula hi ta Mfumo wa Xikwembu. Timbhoni ta Yehova ti ringeta ku landzela minkondzo yakwe ni le mhakeni leyi.—1 Petro 2:21.
KU CHUMAYELA HI XIKOMBISO
Ku hava ni yin’we ya tindlela to ku byela “mahungu lamanene” leyi nga tirhaka eka wena loko loyi a ku byelaka a nga tirhisanga tidyondzo ta kona eka yena n’wini. Ku vula nchumu wo karhi ivi u endla wun’wana i vukanganyisi, naswona vukanganyisi bya vukhongeri byi tshikise timiliyoni Bibele. Bibele a yi fanelanga yi soriwa. Vatsari ni Vafarisi a va ri na wona Matsalwa ya Xiheveru, kambe Yesu u va vule vakanganyisi. U vulavule hi ku hlaya ka vona Nawu wa Muxe, kutani a engetela eka vadyondzisiwa vakwe a ku: “Endlani hinkwaswo leswi va mi byelaka swona, mi swi hlayisa, kambe mi nga endli leswi va swi endlaka; hikuva va vula, kambe a va endli.” (Matewu 23:3) Ku va Mukriste a va xikombiso xa ku hanya loku lulameke swi vula swo tlula maawara yo nhlokohata. Leswi swi kombisiwe eka vavasati va Vukriste lava va nga ni vanuna lava nga pfumeriki: “Va nga kokiwa hi mahanyelo ya n’wina vasati va vona, hambi loko va nga yingisi Rito. A va nga byeriwi hi munhu, hikuva va ta vona xichavo xa n’wina ni ku tenga ka mikhuva ya n’wina.”—1 Petro 3:1, 2.
Kutani ke, Timbhoni ta Yehova ti ringeta ku bumabumela mahungu lamanene eka van’wana na hi ndlela leyi: hi ku va xikombiso emahanyelweni ya Vukriste lawa va ma bumabumelaka eka van’wana. Va ringeta ku ‘endlela van’wana leswi va lavaka leswaku van’wana va va endlela swona.’ (Matewu 7:12) Va ringeta ku va hi ndlela leyi eka vanhu hinkwavo, hayi eka Timbhoni-kulobye, vanghana, vaakelani kumbe maxaka ntsena. Hi ku ka va nga hetisekanga, a hi minkarhi hinkwayo va humelelaka hi tiphesente ta 100. Kambe i ku navela ka timbilu ta vona ku endla leswinene eka vanhu hinkwavo, hayi eku va byeleni ka mahungu lamanene ya Mfumo ntsena, kambe ni ku va pfuna loko swi koteka.—Yakobo 2:14-17.
[Marito lama tshahiweke exihlokweni lama nga eka tluka 21]
Handle ka rito
[Swifaniso leswi nga eka tluka 20]
Tiholo ta Mfumo, leti akiweke hi ndlela leyi tolovelekeke, i swivandla swo vulavula hi Bibele
[Swifaniso leswi nga eka tluka 22]
Emahanyelweni ya le kaya ka tona kun’we ni loko ti hlangana ni vanhu van’wana, Timbhoni ti ringeta hi timbilu hinkwato ku endla swilo leswi ti swi twarisaka eka van’wana