Tindlela Leti Ti Ti Tirhisaka Ku Twarisa Mahungu Lamanene
VAKRESTE va lerisiwe ku “endla vanhu va matiko hinkwawo va va vadyondzisiwa,” kambe leswi a swi vuli swona leswaku va fanele va hundzula vanhu hi nkani kumbe hi nsindziso. Ntirho wa Yesu a ku ri ku “vula mahungu lamanene eka lavo rhula,” ku “bohelela lava vavisekeke mbilu,” ku “chavelela hinkwavo lava rilaka.” (Matewu 28:19; Esaya 61:1, 2; Luka 4:18, 19) Timbhoni ta Yehovha ti lava ku endla leswi hi ku twarisa mahungu lamanene lama humaka eBibeleni. Ku fana na muprofeta Ezekiyele wa khale, Timbhoni ta Yehovha namuntlha ti ringeta ku kuma lava “nga ni nhlomulo, lava va konyaka hikwalaho ka swilo hinkwaswo leswi nyenyetsaka leswi endliwaka.”—Ezekiyele 9:4.
Ndlela leyi tivekaka swinene leyi ti yi tirhisaka ku kuma lava va tshikileriwaka hi swiyimo swa namuntlha i ku famba hi yindlu na yindlu. Xisweswo ti endla matshalatshala lamanene yo fikelela vanhu hinkwavo, hilaha Yesu a endleke hakona loko “a famba hi muti ni muti ni hi ximutana ni ximutana, a chumayela ni ku vula mahungu lamanene ya mfumo wa Xikwembu.” Vadyondzisiwa vakwe vo sungula va endle leswi fanaka. (Luka 8:1; 9:1-6; 10:1-9) Namuntlha, laha swi kotekaka, Timbhoni ta Yehovha ti ringeta ku endzela muti wun’wana ni wun’wana hi minkarhi yo hlayanyana elembeni, ti lava ku vulavurisana ni n’wini wa muti hi timinete ti nga ri tingani ehenhleni ka mhaka yo tsakisa kumbe leyi nga ya nkoka, leyi khumbaka ndhawu yoleyo kumbe misava. Ku nga ha vulavuriwa hi tsalwa rin’we kumbe mambirhi, naswona loko n’wini wa muti a kombisa ku tsakela, Mbhoni yi lunghiselela ku tlhelela hi nkarhi lowu faneleke leswaku bulo ri ta ya emahlweni. Lava lavaka Tibibele na tibuku leti hlamuselaka Bibele va nyikiwa tona, naswona, loko n’wini wa muti a swi lava, dyondzo ya Bibele ya le kaya ya fambisiwa mahala. Timiliyoni ta tidyondzo leti ta Bibele leti pfunaka ti fambisiwa nkarhi na nkarhi ni munhu ha un’we ni mindyangu emisaveni hinkwayo.
Ndlela yin’wana leyi “mahungu lamanene ya Mfumo” ma byeriwaka van’wana ha yona i ku tirhisa minhlangano leyi khomeriwaka eTiholweni ta Mfumo ta ndhawu yoleyo. Kwalaho, Timbhoni ti fambisa minhlangano vhiki na vhiki. Wun’wana wa minhlangano ya kona i nkulumo ya le rivaleni ya mhaka ya sweswinyana leyi tsakisaka, leyi landzeriwaka hi dyondzo ya nhloko-mhaka yo karhi ya Bibele kumbe vuprofeta, hi ku tirhisa magazini wa Xihondzo xo Rindza. Nhlangano wun’wana i xikolo xo letela Timbhoni leswaku ti va vahuweleri lava antswaka va mahungu lamanene, ivi wu landzeriwa hi xiyenge lexi nga endleriwa ku vulavula hi ntirho wo veka vumbhoni ensin’wini ya kwalaho. Nakambe, kan’we hi vhiki Timbhoni ti hlangana emakaya yo karhi hi mintlawa leyintsongo, laha ti vaka ni tidyondzo ta Bibele.
Munhu un’wana ni un’wana wa amukeleka eka minhlangano leyi hinkwayo. A ku endliwi minhlengo. Minhlangano yo tano yi pfuna hinkwavo lava nga kona. Bibele yi ri: “Swa hi fanela ku vona hilaha un’wana ni un’wana wa hina a nga khutazaka van’wana hakona ku antswa leswaku va va ni rirhandzu ni vunene lebyi hanyaka, hayi ku tshika minhlangano ya hina, hilaha van’wana va endlaka hakona, kambe hi khongotelana, ngopfu-ngopfu leswi mi vonaka Siku ri tshinelaka.” Dyondzo ya munhu hi xiyexe ni ku endla ndzavisiso i swa nkoka, kambe ku hlangana ni van’wana swa phyuphyisa: “Tanihi leswi nsimbi yi lotaka nsimbi, ni munhu u lota mianakanyo ya un’wana.”—Vaheveru 10:24, 25; Swivuriso 27:17, The New English Bible.
Nakambe Timbhoni ti tirhisa ngopfu minkarhi leyi pfulekeke ku vulavula ni van’wana hi mahungu lamanene loko ti hlangana na vona. Ti nga ha bula nkarhinyana ni muakelani, kumbe ni loyi ti fambaka na yena ebazini kumbe eka xihaha-mpfhuka, ti bula nkarhi wo leha ni munghana kumbe xaka, kumbe ni mutirhi-kulobye hi nkarhi wa dina. Hakanyingi Yesu a a veka vumbhoni hi ndlela leyi loko a ha ri emisaveni—loko a ri karhi a famba eribuweni ra lwandle, a tshamile exintshabyanini, loko a ri karhi a dya emutini wa un’wana, loko a ri enkhubyeni wa vukati, kumbe loko a famba hi byatso byo kukuta tinhlampfi eLwandle ra Galeliya. U dyondzise emasinagogeni ni le tempeleni eYerusalema. Kwihi na kwihi laha a a ri kona, u kume nkarhi wo vulavula hi ta Mfumo wa Xikwembu. Timbhoni ta Yehovha ti ringeta ku landzela minkondzo yakwe ni le mhakeni leyi.—1 Petro 2:21.
KU CHUMAYELA HI XIKOMBISO
Ku hava ni yin’we ya tindlela leti ta ku byela vanhu mahungu lamanene, leyi nga tirhaka eka wena loko loyi a ku byelaka a nga tirhisanga tidyondzo ta kona eka yena n’wini. Ku vula nchumu wo karhi ivi u endla leswi kanetanaka na wona i vukanganyisi, naswona vukanganyisi bya vukhongeri byi endle leswaku vanhu va timiliyoni va fularhela Bibele. Bibele a yi fanelanga yi soriwa. Vatsari ni Vafarisi a va ri na wona Matsalwa ya Xiheveru, kambe Yesu u va vule vakanganyisi. U vulavule hi ku hlaya ka vona Nawu wa Muxe, kutani a ya emahlweni a byela vadyondzisiwa vakwe a ku: “Swilo hinkwaswo leswi va mi byelaka swona, swi endleni, mi swi hlayisa, kambe mi nga endli hi ku ya hi swiendlo swa vona, hikuva va vula, kambe a va endli.” (Matewu 23:3) Ku va Mukreste a ri xikombiso emahanyelweni lamanene i swa nkoka ku tlula tiawara leti a ti hetaka a ri eku chumayeleni. Leswi swi byeriwe vavasati lava nga Vakreste lava va nga ni vanuna lava nga pfumeriki: “Va ta kokiwa handle ka rito hi ku tikhoma ka vasati va vona, hikwalaho ka leswi va veke timbhoni leti ti ku voneke hi mahlo ku tikhoma ka n’wina loku tengeke.”—1 Petro 3:1, 2.
Hikokwalaho, Timbhoni ta Yehovha ti ringeta ku bumabumela mahungu lamanene eka van’wana na hi ndlela leyi: hi ku va xikombiso lexinene xa mahanyelo ya Vukreste lawa ti ma bumabumelaka eka van’wana. Ti ringeta ku ‘endlela van’wana leswi ti lavaka leswaku van’wana va ti endlela swona.’ (Matewu 7:12) Ti ringeta ku endla tano eka vanhu hinkwavo, hayi eka Timbhoni-kulobye, vanghana, vaakelani kumbe maxaka ntsena. Leswi ti nga hetisekangiki, a hi minkarhi hinkwayo ti humelelaka. Kambe embilwini ti navela ku endlela vanhu hinkwavo leswinene, ku nga ri ku va byela mahungu lamanene ya Mfumo ntsena, kambe ni ku va pfuna loko swi koteka.—Yakobo 2:14-17.
[Xifaniso lexi nga eka tluka 19]
Hawaii
[Xifaniso lexi nga eka tluka 19]
Venezuela
[Xifaniso lexi nga eka tluka 19]
Yugoslavia
[Swifaniso leswi nga eka tluka 20]
Tiholo ta Mfumo, leti akiweke hi ndlela leyi tolovelekeke, i swivandla swo vulavula hi Bibele
[Swifaniso leswi nga eka tluka 21]
Emahanyelweni ya le kaya ka tona kun’we ni loko ti hlangana ni vanhu van’wana, Timbhoni ti ringeta hi mbilu hinkwayo ku endla swilo leswi ti swi twarisaka