Nhlengeletano Ni Ntirho Wa Vona Wa Misava Hinkwayo

Ku na tindlela to tala leti tirhisiwaka eku kongomiseni ka ntirho wo veka vumbhoni eka matiko lama tlulaka 200 laha wu endliwaka kona. Vukongomisi hinkwabyo byi huma eka Huvo leyi Fumaka eyindlu-nkulu ya misava hinkwayo eBrooklyn, New York. Huvo leyi Fumaka yi rhumela vayimeri lembe na lembe eka “miganga-nkulu” ya 15 kumbe ku tlula ku ya vulavurisana ni vayimeri va rhavi eka muganga-nkulu wun’wana ni wun’wana. Eka tihofisi ta marhavi ku na Tikomiti ta Marhavi ta swirho leswi sukelaka eka swinharhu ku ya eka nkombo leswi ungamelaka ntirho ematikweni lama nga ehansi ka vulawuri bya vona. Vunyingi bya marhavi byi na switirho swo gandlisa, man’wana ma tirhisa michini yo gandlisa ya rivilo lerikulu. Tiko kumbe ndhawu leyi khathaleriwaka hi rhavi rin’wana ni rin’wana yi avanyisiwe hi miganga, kutani miganga, na yona, yi avanyisiwe ku huma swifundza. Xifundza xin’wana ni xin’wana xi na mabandlha lama nga vaka 20. Mulanguteri wa muganga u endzela swifundza emugangeni wakwe hi ku landzelelana. Xifundza xin’wana ni xin’wana xi na tinhlengeletano timbirhi lembe na lembe. Ku na mulanguteri wa xifundza, naswona u endzela bandlha rin’wana ni rin’wana exifundzeni xakwe hakanyingi kambirhi hi lembe, a pfuna Timbhoni ku hlela ni ku endla ntirho wo chumayela eka nsimu leyi averiweke bandlha rero.

Bandlha ra ndhawu yoleyo ni Holo ya rona ya Mfumo i ntsindza wo vula mahungu lamanene endhawini ya ka n’wina. Swivandla leswi nga ehansi ka bandlha rin’wana ni rin’wana swi endleriwa mimepe ya tinsimu letintsongo. Tona ti averiwa Timbhoni ha yin’we-yin’we leti ringetaka ku endzela vanhu ni ku vulavula na vona ekaya rin’wana ni rin’wana. Bandlha rin’wana ni rin’wana, leri nga ni kwalomu ka Timbhoni ti nga ri tingani ku ya eka 200, ri na vakulu lava averiweke ku endla mintirho leyi hambaneke. Muhuweleri un’wana ni un’wana wa mahungu lamanene i wa nkoka eka nhlengeletano ya Timbhoni ta Yehova. Un’wana ni un’wana wa Timbhoni, hambi u tirha eyindlu-nkulu ya misava hinkwayo, emarhavini, kumbe emabandlheni, wa wu endla ntirho lowu wa nsimu wo byela van’wana hi xiviri hi ta Mfumo wa Xikwembu.

Swiviko swa ntirho lowu eku heteleleni swi fika eka yindlu-nkulu ya misava hinkwayo, kutani Yearbook ya lembe na lembe ya hlengeletiwa ni ku humesiwa. Nakambe, chati yi humesiwa lembe rin’wana ni rin’wana enkandziyisweni wa January 1 wa Xihondzo xo Rindza. Tibuku leti timbirhi ti nyikela swiviko leswi nga ni vuxokoxoko swa leswi endliweke swa lembe rin’wana ni rin’wana eku nyikeleni ka vumbhoni ha Yehova ni Mfumo wakwe ehansi ka Kriste Yesu. 1989 Yearbook yi vika leswaku hi 1988 Timbhoni ta 9 201 071 ni vanhu lava tsakelaka a va ri kona eka xitsundzuxo xa rifu ra Yesu. Hi lembe ra ntirho ra 1988, Timbhoni ta Yehova ti tirhise maawara lama tlulaka 785 000 000 ti ri karhi ti twarisa mahungu lamanene naswona ku khuvuriwile vanhu lavantshwa va 239 268. Tibuku leti fambisiweke ti fike eka tikopi ta madzana ya timiliyoni.