Nhlengeletano Ni Ntirho Wa Tona Wa Misava Hinkwayo

KU NI tindlela to tala leti tirhisiwaka ku kongomisa ntirho wo veka vumbhoni eka matiko lama tlulaka 230 lawa ntirho lowu wu endliwaka eka wona. Vukongomisi hinkwabyo byi huma eka Huvo leyi Fumaka eyindlu-nkulu ya misava hinkwayo eBrooklyn, New York. Huvo leyi Fumaka yi rhumela vayimeri lembe na lembe etindhawini to hambana-hambana emisaveni hinkwayo leswaku va ya kanerisana ni vayimeri va marhavi ya le tindhawini ta kona. Eka tihofisi ta marhavi ku na Tikomiti ta Marhavi ta swirho leswi sukelaka kwalomu ka swinharhu ku ya eka nkombo, leswi ungamelaka ntirho ematikweni lama nga ehansi ka tihofisi ta kona. Marhavi man’wana ma ni switirho swo gandlisa, man’wana ma tirhisa michini yo gandlisa hi rivilo lerikulu. Tiko kumbe ndhawu leyi khathaleriwaka hi rhavi rin’wana ni rin’wana yi avanyisiwe hi miganga, kutani miganga leyi, na yona, yi avanyisiwa hi swifundzha. Xifundzha xin’wana ni xin’wana xi na mavandlha lama nga vaka 20. Mulanguteri wa muganga u endzela swifundza emugangeni wakwe hi ku landzelelana ka swona. Xifundzha xin’wana ni xin’wana xi na tinhlengeletano timbirhi lembe na lembe. Ku na mulanguteri wa xifundzha, kutani yena u endzela vandlha rin’wana ni rin’wana exifundzeni xakwe hakanyingi kambirhi hi lembe, a pfuna Timbhoni ku hlela ni ku endla ntirho wo chumayela eka nsimu leyi averiweke vandlha rero.

Vandlha ra ndhawu yoleyo ni Holo ya rona ya Mfumo hi rona nsika ya ntirho wo vula mahungu lamanene endhawini ya ka n’wina. Tindhawu leti nga ehansi ka vandlha rin’wana ni rin’wana ti endleriwe mimepe ya masimu lamatsongo. Wona ma averiwa Timbhoni to hambana-hambana ivi tona ti ringeta ku endzela vanhu ekaya rin’wana ni rin’wana ti ya vulavula na vona. Mavandlha hinkwawo ya Timbhoni, laha man’wana ma nga ni swirho switsongo kasi man’wana ma ni swirho swa kwalomu ka 200, ma ni vakulu lava averiweke ku endla mintirho leyi hambaneke. Muhuweleri un’wana ni un’wana wa mahungu lamanene i wa nkoka eka nhlengeletano ya Timbhoni ta Yehovha. Mbhoni yin’wana ni yin’wana, hambi yi tirha eyindlu-nkulu ya misava hinkwayo, erhavini ra kona, kumbe evandlheni, ya wu endla ntirho lowu wa nsimu wo byela van’wana hi xiviri hi ta Mfumo wa Xikwembu.

Swiviko swa ntirho lowu eku heteleleni swi fika eka yindlu-nkulu ya misava hinkwayo, kutani swi nghenisiwa eka Buku Ya Lembe leyi humaka lembe na lembe. Nakambe, chati yi humesiwa lembe rin’wana ni rin’wana enkandziyisweni wa January 1 wa Xihondzo xo Rindza. Minkandziyiso leyimbirhi yi nyikela swiviko leswi nga ni vuxokoxoko bya leswi endliweke lembe rin’wana ni rin’wana eku nyikeleni ka vumbhoni ha Yehovha ni Mfumo wakwe lowu nga ehansi ka Kreste Yesu. Emalembeni ya sweswinyana, lava va veke kona eXitsundzuxweni xa rifu ra Yesu a va endla ntsengo wa kwalomu ka 14 000 000, lava katseke Timbhoni ni vanhu lava tsakelaka. Timbhoni ta Yehovha ti heta tiawara leti tlulaka 1 000 000 000 hi lembe ti ri karhi ti twarisa mahungu lamanene, naswona ku khuvuriwa vanhu lavantshwa vo tlula 300 000. Tibuku leti fambisiwaka ti fike eka tikopi ta madzana ya timiliyoni.