Ndzima 7

Yesu Ni Tintlharhi

NHLAYO ya vavanuna yi ta yi huma hi le Vuxeni. I tintlharhi—vanhu lava va tivulaka leswaku va tiva xivandla xa tinyeleti. Loko va ha ri ekaya eVuxeni, va vone nyeleti leyintshwa, naswona va yi landzelela hi timayili ta madzana ku ya eYerusalema.

Loko tintlharhi ti fika eYerusalema, ta vutisa: “Yi kwihi Hosi ya Vayuda leyi velekiweke xana? Hikuva hi vonile nyeleti ya yona le vuxeni, kutani hi tile ku ta yi gandzela.”

Loko Hosi Heroda eYerusalema a twa hi leswi, wa hlundzuka. Kutani u vitana vaprista lavakulu kutani a va vutisa laha Kriste a faneleke ku velekiwa kona. Hi ku sekela nhlamulo ya vona eMatsalweni, va hlamula va ku: “EBetlehema.” Kwalaho, Heroda u vitana tintlharhi kutani a ti byela a ku: “Fambani mi ya lavisisa xihlangi swinene; kutaku loko mi xi kumile, mi ta ndzi tivisa, leswaku na mina ndzi ta ya xi gandzela.” Kambe, kahle-kahle Heroda a lava ku kuma xihlangi a xi dlaya!

Endzhaku ka loko va fambile, xilo xin’wana lexi hlamarisaka xa humelela. Nyeleti leyi va yi voneke loko va ha ri eVuxeni yi famba emahlweni ka vona. Entiyisweni, leyi a hi nyeleti ya ntolovelo, kambe a yi vekeriwe ku va kongomisa. Tintlhari ta yi landzela ku kondza yi fika yi yima ehenhla ka yindlu leyi Mariya na Yosefa va tshamaka eka yona.

Loko tintlharhi ti nghena endlwini, ti kuma Mariya ni n’wana wa yena lontsongo Yesu. Kwalaho hinkwato ti n’wi khinsamela. Kutani ti humesa tinyiko ta nsuku, murhi wa risuna ni wa mira eminkwameni ya tona. Endzhaku, loko ti lava ku tlhela ti ya byela Heroda laha xihlangi xi nga kona, ti tsundzixiwa hi Xikwembu enorhweni leswaku ti nga swi endli sweswo. Kutani ta suka ti ya etikweni ra tona hi ndlela yin’wana.

U ehleketa leswaku i mani la tiseke nyeleti leyi fambaka empfhukeni leswaku yi kongomisa tintlharhi? Tsundzuka, nyeleti a yi va kongomisanga hi ku kongoma eka Yesu eBetlehema. Ematshan’wini ya sweswo, va ye eYerusalema laha va hlanganeke na Hosi Heroda, la laveke ku dlaya Yesu. Naswona a a ta va a endle tano loko Xikwembu a xi nga swi yimisanga hi ku tsundzuxa tintlharhi leswaku ti nga n’wi byeli Heroda laha Yesu a nga kona. A a ri nala wa Xikwembu, Sathana Diyavulosi, la laveke ku dlaya Yesu, naswona u tirhise nyeleti yoleyo ku ringeta ku hetisisa xikongomelo xa yena. Matewu 2:1-12; Mikea 5:2.

▪ I yini lexi kombaka leswaku nyeleti leyi tintlharhi ti yi voneke a ku nga ri nyeleti ya ntolovelo?

▪ Yesu a a ri kwihi loko tintlharhi ti n’wi kuma?

▪ Ha yini hi tiva leswaku Sathana u tirhise nyeleti ku kongomisa tintlharhi?