Vangoma Va Tinyeleti Va Vhakela Yesu

Ku fike vavanuna van’wana va huma hi le Vuxeni. I vangoma va tinyeleti—lava xiyisisaka tinyeleti naswona va vula leswaku sweswo swi va pfuna leswaku va tiva swiendlakalo swa vutomi bya vanhu. (Esaya 47:13) Loko va ha ri ekaya le Vuxeni, va vone nyeleti kutani va yi landzelela tikhilomitara ta madzana yi va yisa eYerusalema ku nga ri eBetlehema.

Loko vangoma va tinyeleti va fika eYerusalema va vutisa va ku: “U kwihi loyi a nga velekeriwa ku va hosi ya Vayuda? Hi vone nyeleti ya yena loko hi ri eVuxeni, kutani hi tele ku ta n’wi khinsamela.”—Matewu 2:1, 2. 

Loko Hosi Heroda wa le Yerusalema a twa leswi, a hlundzuka swinene. Hiloko a vitana vaprista lavakulu ni varhangeri van’wana va vukhongeri bya Xiyuda kutani a va vutisa leswaku Kreste a fanele a velekeriwa kwihi. Va n’wi hlamula leswi nga eMatsalweni va ku: “EBetlehema.” (Matewu 2:5; Mikiya 5:2) Kutani Heroda a vitana vangoma va tinyeleti exihundleni a va byela a ku: “Fambani mi ya lava n’wana hi vukheta, loko mi n’wi kumile mi vuya mi ta ndzi byela, leswaku na mina ndzi ta ya n’wi khinsamela.” (Matewu 2:8) Kahlekahle leswi Heroda a swi lavaka i ku kuma n’wana loyi leswaku a n’wi dlaya!

Loko vangoma va tinyeleti va famba, ku endleka nchumu wo hlamarisa. “Nyeleti” leyi va yi voneke loko va ri eVuxeni yi va rhangela ndlela. Swi le rivaleni leswaku leyi a hi nyeleti leyi tolovelekeke kambe yi tele ku va kongomisa. Vangoma va tinyeleti va yi landzela ku kondza yi fika yi yima ehenhla ka yindlu leyi Yosefa na Mariya va tshamaka eka yona ni n’wana wa vona.

Loko vangoma va tinyeleti va nghena endlwini, va kuma Mariya ni n’wana wakwe Yesu. Hiloko vangoma va tinyeleti va khinsamela Yesu. Kutani va n’wi nyika tinyiko, ku nga nsuku, murhi wa risuna ni mira. Endzhaku ka sweswo, loko va ha lava ku tlhelela eka Heroda, Xikwembu xi va lemukisile enorhweni leswaku va nga endli tano. Hiloko va tlhelela etikweni ra ka vona hi ku tirhisa ndlela yin’wana.

U ehleketa leswaku a yi huma eka mani “nyeleti” leyi a yi kongomisa vangoma va tinyeleti? Tsundzuka leswaku nyeleti liya a yi va yisanga hi ku kongoma laha Yesu a a ri kona eBetlehema. Ku ri na sweswo, yi rhange yi va yisa eYerusalema laha va nga fika va hlangana na Hosi Heroda loyi a a lava ku dlaya Yesu. Naswona a a ta va a n’wi dlayile loko Xikwembu a xi nga nghenelelanga xi lemukisa vangoma leswaku va nga n’wi byeli Heroda laha Yesu a nga kona. A swi kanakanisi leswaku a ku ri nala wa Xikwembu Sathana loyi a a lava ku dlaya Yesu naswona u tirhise kungu leri leswaku a ringeta ku fikelela xikongomelo xakwe.