Ndzima 33

Ku Hetisisa Vuprofeta Bya Esaya

ENDZHAKU ka loko Yesu a tive leswaku Vafarisi ni ntlawa wa valandzeri wa Heroda va lava ku n’wi dlaya, yena ni vadyondzisiwa vakwe va suka va ya eLwandle ra Galeliya. Laha vunyingi lebyikulu lebyi humaka ePalestina hinkwayo, ni le handle ka mindzilakano ya rona, yi n’wi rhendzelaka. A hanyisa vo tala, ku fikela laha hinkwavo lava nga ni mavabyi va manyulutaka va ya eka yena leswaku va ta n’wi khumba.

Hi leswi mintshungu yi kuleke, Yesu u byela vadyondzisiwa va yena leswaku va tshama va ri na byatso leswaku a byi tirhisa. Hi ku suka eribuweni, a ta swi kota ku susa mintshungu eku n’wi kavanyeteni. A va dyondzisa a ri ebyatsweni kumbe a ya endhawini yin’wana eribuweni ku pfuna vanhu kwalaho.

Mudyondzisiwa Matewu a xiya leswaku ntirho wa Yesu wu hetisisa “leswi vuriweke hi muprofeta Esaya.” Kutani Matewu u tshaha vuprofeta lebyi Yesu a byi hetisisaka:

“Vonani nandza wa mina loyi ndzi nga tihlawulela yena, murhandziwa wa nga, loyi mbilu ya mina yi n’wi tsakelaka. Ndzi ta veka moya wa mina ehenhla ka yena, kutani ú ta tivisa vamatiko leswaku ku avanyisa loko lulama ku kona; a nga ka a nga holovi, a nga ka a nga bi huwa; a ku na munhu la nga ta twa rito ra yena emintsendzeleni. A nga ka a nga tshovi rihlanga leri khinyekeke, na swona a nga ka a nga timi rivoni leri nge ketiketi, a kondza a khanisa ku avanyisa loko lulama; kutani vamatiko va ta tshemba vito ra yena.”

Kavula, Yesu i nandza la rhandzekaka loyi Xikwembu xi n’wi amukelaka. Kutani Yesu u swi veke erivaleni leswi swi nga nawu lowunene, leswi swi sandziweke hi mikhuva ya vukhongeri bya mavunwa. Hikwalaho ka ku tirhisa ka nawu wa Xikwembu hi ndlela yo biha, Vafarisi a va nga n’wi pfuni hambi ku ri muvabyi hi Savata! Loko a veka nawu wa Xikwembu erivaleni, Yesu u rhula vanhu mindzhwalo ya mikhuva leyi nga riki leyinene, kutani hikwalaho ka leswi, varhangeri va vukhongeri va ringeta ku n’wi dlayela swona.

Xana swi vula yini leswaku a nga ka a nga ‘holovi, a nga ka a nga bi huwa; a ku na munhu la nga ta twa rito ra yena emintsendzeleni’? Loko a horisa vanhu, Yesu u ‘tshinya swinene leswaku va nga tshuki va n’wi twarisa.’ A nga lavi leswaku ku biwa huwa yo n’wi twarisa eswitarateni kumbe ku va ku vulavuriwa hi swiviko leswi nyanyulaka ni ku soholotiwa.

Nakambe, Yesu u yisa mahungu yakwe lama chavelelaka, eka vanhu lava hi ku fanekisela va fanaka ni rihlanga leri fayekeke, leri khinyekeke ni leri kandziyeriwaka. Va fana ni rivoninyana leri nge ketiketi, leri langavi ra rona ro hetelela ri nga kusuhi ni ku timeka. Yesu a nga ri tshovi rihlanga leri khinyekeke kumbe ku tima rivoninyana leri mbulukaka musi ri lava ku timeka. Kambe hi musa ni rirhandzu, u tlakusa vatitsongahati hi vutlhari. Entiyisweni, Yesu hi loyi matiko ya nga n’wi tshembaka! Matewu 12:15-21; Marka 3:7-12; Esaya 42:1-4.

▪ Xana Yesu u veke ku lulama erivaleni hi ndlela yihi, a nga holovi kumbe ku tlakusa rito rakwe emintsendzeleni?

▪ I vamani lava fanaka ni rihlanga leri khinyekeke ni rivoninyana leri nge ketiketi, naswona xana Yesu u va khoma hi ndlela yihi?