Ku Hetisisa Vuprofeta Bya Esaya

Endzhaku ka loko a twe leswaku Vafarisi ni ntlawa wa valandzeri va Heroda a a va lava ku n’wi dlaya, Yesu ni valandzeri vakwe va suke va ya eLwandle ra Galeliya. Mitshungu leyikulu leyi humaka hinkwakonkwako yi ye eka yena—yi huma eGaleliya, etindhawini ta le kusuhi na Tiri na Sidoni, evuhumadyambu bya Nambu wa Yordani, eYerusalema, ni le dzongeni wa Idumiya. Yesu u horisa vo tala. Kutani, lava vabyaka ngopfu va manyukuta va ya ka yena. A va nga ha yimeli ku va a va khumba, a va manyukuta va kala va ya n’wi khumba.—Marka 3:9, 10.

Leswi mitshungu a yi tele, Yesu u byele vadyondzisiwa va yena leswaku va ta ni byatso leswaku va ta tluta va ya ekulenyana ni ribuwa leswaku mitshungu yi nga n’wi tshineleli. Nakambe a a va dyondzisa a ri ebyatsweni kumbe a ya eribuweni rin’wana leswaku a pfuna vanhu vo tala.

Mudyondzisiwa Matewu a a swi lemuka leswaku ntirho wa Yesu a wu hetisisa “leswi vuriweke hi muprofeta Esaya.” (Matewu 12:17) Hi byihi vuprofeta lebyi Yesu a byi hetisisaka laha?

“Vonani! Nandza wa mina loyi ndzi n’wi hlawuleke, loyi ndzi n’wi rhandzaka, loyi ndzi n’wi amukeleke! Ndzi ta veka moya wa mina ehenhla ka yena naswona u ta endla leswaku matiko ma byi tiva kahle vululami. A nge holovi na munhu hambi ku ri ku huwelela naswona ku hava loyi a nga ta twa rito ra yena etindleleni. A nge ri tshovi rihlanga leri govekeke naswona a nge ri timi rivoni leri ketimelaka, ku fikela loko a endla leswaku ku va ni vululami. Matiko ma ta tshemba vito rakwe.”—Matewu 12:18-21; Esaya 42:1-4.

Hakunene Yesu i nandza wo rhandzeka loyi Xikwembu xi n’wi amukeleke. Yesu u swi veke erivaleni leswaku i yini ku avanyisa hi ku lulama, ku nga leswi a swi nga endliwi eka vukhongeri bya mavunwa. Leswi Vafarisi a va tirhisa Nawu wa Xikwembu hi ndlela yo biha, a va nga n’wi pfuni munhu la vabyaka hi Savata! Leswi Yesu a a ri ni moya wo kwetsima wa Xikwembu naswona a swi vekeke erivaleni leswaku Xikwembu xi ni vululami, u rhule vanhu ndzhwalo wa mikhuva leyi nga riki na vululami. Hikwalaho ka sweswo, varhangeri va vukhongeri a a va lava ku n’wi dlaya. Sweswo a swi bihe ngopfu.

Swi vula yini leswaku “a nge holovi na munhu hambi ku ri ku huwelela naswona ku hava loyi a nga ta twa rito ra yena etindleleni”? Loko Yesu a horisa vanhu kumbe a hlongola madimona a a nga pfumeli leswaku va ‘byela vanhu.’ (Marka 3:12) A a nga lavi leswaku vanhu va twa timhaka ta yena hi ku huweleriwa eswitarateni kumbe hi swiviko leswi tlutiweke swa mavarivari.

Nakambe Yesu a a yisa rungula rakwe leri chavelelaka eka lava hi ku fanekisela va fanaka ni rihlanga leri govekeke, leri khinyekeke ni leri kandziyeriwaka. Va fana ni rivoni leri ketimelaka leri nga ekusuhi ni ku timeka. Yesu a nga ri tshovi rihlanga leri govekeke kumbe a tima rivoni leri ketimelaka. Ku ri na sweswo, hi musa ni rirhandzu, u tlakuse lava titsongahataka. Hakunene, Yesu hi yena loyi matiko ma nga n’wi tshembaka!