Ndzima 45
Mudyondzisiwa La Nga Tshembisiki
WA NGA vona xivono lexi chavisaka loko Yesu a ri karhi a khandziya eribuweni ra lwandle! Vavanuna vambirhi lava nga tolovelekangiki va matimba va huma emasirheni lama nga kusuhi ivi va tsutsumela eka yena. Va na mademona. Tanihi leswi un’wana wa vona kumbexana a karihaka ngopfu ku tlula lon’wana naswona a xanisekeke nkarhi wo leha ehansi ka vulawuri bya mademona, nyingiso wu yisiwa eka yena.
Hi nkarhi wo leha wanuna loyi a khomisaka vusiwana a a hanya a nga ambalanga nchumu exikarhi ka masirha. Nkarhi na nkarhi, nhlekanhi ni vusiku, wa huwelela ivi a tikhandla hi maribye. U kariha swinene lerova a ku na munhu la nga na ntiya-nhlana wo hundza hi ndlela yoleyo. Matshalatshala yo n’wi boha ma endliwile, kambe u tsema tinketana ivi a tshova tinsimbi emilengeni ya yena. Ku hava loyi a nga ni matimba yo n’wi hlula.
Loko wanuna loyi a ri karhi a tshinelela Yesu ivi a wela emilengeni yakwe, mademona lawa ya n’wi lawulaka ya n’wi endla leswaku a huwelela a ku: “Mhaka ya mina na wena hi yihi ke, wena Yesu N’wana wa Xikwembu xa le henhla-henhla? Ndza ku khongela hi vito ra Xikwembu, u nga ndzi xanisi!”
Yesu u hambeta a ku: “Huma eka munhu loyi, we moya wa thyaka!” Kambe manuku Yesu wa vutisa a ku: “Vito ra wena u mani?”
“Vito ra mina ndzi Vandla, hikuva hi tele,” hi yona nhlamulo. Mademona ya tsaka loko ya vona ku xaniseka ka lava ya kotaka ku va fuma, entiyisweni ya tsakela ku va hlasela hi vandla ra mimoya ya vutoya. Kambe loko ya kongomane na Yesu, ma kombela leswaku ma nga yisiwi ekheleni. Nakambe hi vona matimba lamakulu lama Yesu a veke na wona; u kote ku hlula hambi ya ri mademona lama karihaka. Leswi nakambe swi hlavutela leswaku mademona ya swi xiya leswaku ku hoxiwa ka wona ekheleni kun’we ni loku ka murhangeri wa wona, Sathana Diyavulosi, i ku avanyisa ka Xikwembu ko hetelela eka wona.
Ntlhambi wa kwalomu ka 2 000 wa tinguluve wa karhi wa dya ekusuhi entshaveni. Kutani mademona ya ri: “Wa nga hi rhumela etingulubyeni, hi ya nghena eka tona.” Entiyisweni mademona ya kuma muxaka wo karhi wa ntsako wa rimbewu lowu nga riki wa ntumbuluko, hi ku ambala mimiri ya swivumbiwa swa nyama. Loko Yesu a ya pfumelela ku nghena etingulubyeni, hinkwato ka tona ti ri 2 000 ti tsutsumela eriweni ivi ti wela elwandle.
Loko lava va khathalelaka tinguluve va vona leswi, va tsutsuma va ya vika timhaka emutini ni le tikweni hinkwaro. Kwalaho, vanhu va ta va ta vona leswi endlekeke. Kunene, loko va fika, ku na wanuna loyi mademona ma humeke ka yena. A ambarile naswona a ri kahle, a tshame emilengeni ya Yesu!
Timbhoni leti voneke hi mahlo ti hlamusela ndlela leyi wanuna loyi a hanyisiweke ha yona eka vanhu. Ti tlhela ti byela vanhu hi rifu leri tsemaka nhlana ra tinguluve. Loko vanhu va twa leswi, va teriwa hi ku chava lokukulu, kutani va khutaza Yesu hi matimba leswaku a songa rigogo ra ha tsakama etikweni ra vona. Kutani Yesu a endla tano kutani a khandziya xikepe. Khale ka loyi a a ri ni mademona u kombela Yesu leswaku a n’wi pfumelela ku famba na yena. Kambe Yesu u ri eka yena: “Famba, u ya ekaya, eka varikwenu, u ya va tivisa hinkwaswo leswi [Yehova a] ku endleke swona ni hi laha [a] ku tweleke vusiwana ha kona.”
Yesu hi ntolovelo u lerisa lava a va horisaka leswaku va nga byeli munhu, tanihi leswi a nga laviki leswaku vanhu va fikelela makumu exisekelweni xa swiviko leswi nyanyulaka. Kambe ku n’wi pfumelela loku ka fanela hikuva khale ka loyi a a ri ni mademona u ta veka vumbhoni exikarhi ka vanhu lava kumbexana sweswi Yesu a nga ta pfumala nkarhi wo va fikelela. Ku tlula kwalaho, vukona bya wanuna loyi byi ta nyika vumbhoni ehenhleni ka matimba ya Yesu yo endla leswinene, byi lwisana ni xiviko xihi na xihi lexo biha lexi nga ha hangalasiwaka malunghana ni ku lahlekeriwa hi tinguluve.
Ku pfumelelana ni xileriso xa Yesu, khale ka loyi a a ri ni mademona wa famba. U sungula ku huwelela eDekapolisi hinkwayo swilo hinkwaswo leswi Yesu a n’wi endleleke swona, naswona vanhu va hlamala. Matewu 8:28-34; Marka 5:1-20; Luka 8:26-39; Nhlavutelo 20:1-3.
▪ Kumbexana, ha yini nyingiso wu yisiwa eka un’we loyi a nga ni mademona kasi ku na vambirhi?
▪ I yini lexi kombaka leswaku mademona ya tiva hi ku hoxiwa ka wona ka nkarhi lowu taka ekheleni?
▪ Entiyisweni hikwalaho ka yini mademona ya tsakela ku khoma vanhu ni swiharhi?
▪ Ha yini Yesu a pfumelela khale ka la nga ni mademona, a n’wi lerisa ku ya byela van’wana hi ta leswi a n’wi endleleke swona?