U Ni Matimba Ku Tlula Madimona Yo Tala

Loko vadyondzisiwa va tlhelela eribuweni endzhaku ko langutana ni xiendlakalo xo chavisa elwandle, va vona nchumu wun’wana wo hlamarisa. Vavanuna vambirhi lava nga ni tihanyi naswona va nga ni madimona, va huma emasirheni lama nga ekusuhi ivi va tsutsumela eka Yesu. Un’wana wa vavanuna lava, u sungula ku va ni tihanyi letikulu naswona swi nga endleka a ri ni madzolonga hileswi a heteke nkarhi wo leha a lawuriwa hi madimona.

Wanuna loyi, loyi a terisaka vusiwana i khale a ri karhi a fambafamba a nga ambalanga. Vusiku ni nhlikanhi, u “huwelela . . . a ri emasirheni ni le tintshaveni, a titsemelela hi maribye.” (Marka 5:5) U kariha swinene lerova vanhu va chava ku hundza hi ndlela yoleyo. Van’wana va ringetile ku n’wi boha kambe u tseme tinketana ni tinsimbhi emilengeni ya yena. A ku na munhu loyi a nga ni matimba yo kota ku n’wi khoma.

Loko wanuna loyi a tshinela eka Yesu kutani a wela emilengeni yakwe, madimona lama n’wi lawulaka ma n’wi endla a huwelela a ku: “Xana ndzi ku endle yini wena Yesu, N’wana wa Xikwembu lexi nge Henhlahenhla? Ndza ku hlambanyisa hi Xikwembu leswaku u nga ndzi xanisi.” Yesu u kombisa leswaku u kota ku lawula madimona, hi ku ma lerisa a ku: “Huma eka munhu loyi, wena moya lowu nga basangiki.”—Marka 5:7, 8.

Kahlekahle, wanuna loyi u lawuriwa hi madimona yo tala. Loko Yesu a vutisa a ku: “Hi wena mani?” u hlamula a ku: “Vito ra mina ndzi Vandla, hikuva hi tele.” (Marka 5:9) Vandla ra Varhoma ri ni masocha ya magidi kutani madimona a ma tele ku fana ni vandla ra masocha wolawo naswona a ma hlasela wanuna loyi hileswi ma tsakisiwaka hi ku n’wi vona a xaniseka. Ma kombela Yesu “leswaku a nga ma lerisi ku ya ekheleni ro enta.” Kumbexana ma xiya leswi ma nga ta langutana na swona swin’we ni murhangeri wa wona Sathana.—Luka 8:31.

A ku ri ni ntlhambi wa tinguluve ta kwalomu ka 2 000 leti a ti dya ekusuhi, leti a ti tekiwa ti nga basanga hi ku ya hi Nawu naswona Vayuda a va nga fanelanga va ti fuwa. Hiloko madimona ma ku: “Hi rhumele etingulubyeni hi ya nghena eka tona.” (Marka 5:12) Yesu u ma byela leswaku ma nghena etingulubyeni. Hiloko tinguluve hinkwato ta 2 000 ti tsutsuma ti ya nwela elwandle.

Loko varisi va tinguluve va vona leswi, va tsutsuma va ya vika mahungu lawa emutini ni le ndhawini leyi nga ekusuhi ni muti wolowo. Vanhu va huma emitini leswaku va ta vona leswi endlekeke. Loko va fika, va xiya leswaku wanuna loyi madimona ma humeke eka yena u hanye kahle naswona a nga ha pengi. Phela u ambarile naswona u tshame emilengeni ya Yesu!

Vanhu lava twaka leswi kumbe lava vonaka wanuna loyi, va sungula ku chava hikuva a va swi twisisi leswaku leswi swi vula yini eka vona. Va kombela Yesu leswaku a suka emugangeni wa vona. Loko Yesu a ri karhi a khandziya xikepe leswaku a famba, wanuna loyi a a ri ni madimona u kombela ku famba na yena. Kambe Yesu u byela wanuna loyi a ku: “Muka u ya emaxakeni ya wena, u ya ma rungulela swilo hinkwaswo leswi Yehovha a ku endleleke swona ni tintswalo leti a ku kombeke tona.”—Marka 5:19.

Hi ntolovelo, Yesu u lerisa lava a va hanyisaka leswaku va nga byeli munhu hikuva a nga lavi leswaku va n’wi tiva hi ku ya hi swiviko swa mitirho yo hlamarisa leyi a yi endlaka. Emhakeni leyi, wanuna loyi a a ri ni madimona i xikombiso xa matimba ya Yesu naswona a nga nyikela vumbhoni eka vanhu lava Yesu kumbexana a nga taka a nga swi koti ku va fikelela hi xiviri. Vumbhoni byakwe byi nga ha tlhela byi hlamula xiviko xihi na xihi lexi hoxeke hi ta tinguluve leti feke. Hiloko wanuna loyi a famba a sungula ku byela vanhu eDekapolisi swilo hinkwaswo leswi Yesu a n’wi endleleke swona.